Үөһээ Бүлүү дьонун урууна суруктаах сымара таастар араҥаччылыахтара

Балаҕан ыйын 10 күнүгэр Үөһээ Бүлүү улууһугар биир бэлиэ хамсааһын саҕаланна. Ол курдук, Сахабыт сирин 4 уустара сымара таастарга урууна суруктарынан Алгыс уура кэллилэр.  Суруктаах таастар аэропорт уонна М. А. Алексеев аатынан Өрөспүүбүлүкэтээҕи лиссиэй-интэринээт икки ардыларыгар оннуларын булан туруоруллуохтара.


Чурапчы Мырааныттан төрүттээх Василий Попов – Бааха уус, Үөһээ Бүлүү Дүллүкүтүттэн Спартак Афанасьев, Тамалакаантан Спартак Терентьев уонна Чурапчы ууһа Анатолий Константинов анаан-минээн өбүгэлэрбит төрүт былыргы чараас эйгэни кытары быһа алтыһар, алгыс ылар урууна суруктарын үөрэтэн, бастаан Уус Алдан улууһугар, онтон Чурапчыга үлэлээбиттэрэ, үһүс сиринэн Үөһээ Бүлүүгэ алгыс уураллар.

Уус Спартак Терентьев:

Үөһээ Бүлүү улууһун олохтоохторугар итии-истиҥ эҕэрдэ. Урууна суруктар диэн былыргы өбүгэлэрбит хаалларбыттарын бу күөдьүтэ сылдьабыт. Убайдарбыт Андрей Кривошапкин уонна Владимир Поскачин идеялара. Бу урууна суруктар мээнэ буолбатахтар, өбүгэлэрбит хаалларбыт суруктара-бичиктэрэ, ону биһиги дьоммутугар-сэргэбитигэр тарҕата сылдьабыт. Бааха Уус, Спартак Афанасьев, Анатолий уонна мин 4 буолан кэллибит. Бу таастарга урууна суруктары суруйуохтаахпыт. Урууна суруктар суолталарын кистэлэҥнэрин Тамалакааҥҥа, Кэнтиккэ нэһилиэнньэҕэ быһаарыахпыт, кэпсиэхпит. Уус Алдаҥҥа уонна Чурапчыга 9 тааска суруйбуппут, үсүһүнэн манна Үөһээ Бүлүүгэ туруоран эрэбит. Бу таастар сүдү күүһү биэриэхтээхтэр, үөһээ айыыларга көнөтүнэн түргэнник тахсаллар. Тоҕус таас турдаҕына Үөһээ Бүлүү улууһун дьоно-сэргэтэ сайдыахтаах, уһуктуохтаах, эбэбит ырааһырыахтаах.

Василий Попов — Бааха Уус:

Урууна суругунан дьарыктаммытым үһүс сылым буолла.
Урууна сүрүн анала тугуй? Урууна сурук чараас эйгэни кытта үлэлиир. Туох баар улахан хамсааһын, холобур, ыал буолуу, киһиэхэ чугаһынан чараас эйгэҕэ сөпкө оҥоһуллуохтаах. Ол сөпкө оҥоһулларыгар күүс-көмө буолар бу урууна суруктар өбүгэлэрбит чараас эйгэни, Айыылары, иччилэри кытары быһа алтыһар ньымалара. Ол ньымаларынан сахалыы тылынан, урууна суругунан алгыстары уураллар. Биһиги олоҥхобутугар “аҕыс иилээх саҕалаах Аан Ийэ дойду”, “аҕыска айыыбытын арыаллаатын, сэттэҕэ иэйэхситин эҥээрдэстин” эҥин диэни урууна суругунан таҥан уурталыыбыт таастарга. Тоҕус тааһы тоҕо толуктуугутуй диэтэххэ, аҕыһа киһи өйүн-санаатын таһымын аайы алгыстара, хас биирэ таһыма туспа алгыстаах, туспа айыылаах уонна туспа аналлаах. Киһи, холобур, эт сааһынан даҕаны, бэйэтэ да билбэтинэн, дьиҥинэн, ааһар, онно күүс көмө буоларыгар бу алгыстары уурабыт.
Бу бүтүн Евразияны биир гына суруллан турар урууна суругунан таҥыллыбыт урукку өбүгэ үрүҥ ойууттара хаалларбыт алгыстарыттан талан- талан, сөп түбэһэллэрэ бу сылдьаллар диэн олорор сирбитигэр уурталаан эрэбит.

Спартак Афанасьев, уус:

Бэйэм Дьокуускайга олоробун, уһанабын. Былыр былыргыттан анаан кэлбит идэм быһыылаах. Бу уурбут суругу киһи улаханнык саҥарбат, мээнэ дьон ылла да битийбэт, суруйбат, билиилээх, тугу суруйалларын билэр эрэ дьон суруйуохтаах. Ол быһыытынан кэлэн турабын дойдубар. Сиэр-туом оҥоһуллуохтаах, иччилэртэн көрдөһүү барыахтаах. Сиэрин –туомун былыргылыы сахалыы тылынан бэйэм оҥорорго үөрэнэн оҥоробун. Манна суруллубут суруктар инникитин киэҥ сири тайаан Үөһээ Үрдүк Айыылартан алгыс тардан, бар дьоммутугар, Ийэ сирбитигэр үчүгэйи эрэ аҕалыахтара диэн баҕа санаанан салайтаран сылдьабыт.

Кэпсэттилэр Аграфена Долгунова, Ульяна Гаврильева, Галина Семенова

Сообщение Үөһээ Бүлүү дьонун урууна суруктаах сымара таастар араҥаччылыахтара появились сначала на Ulus.Media — все главные новости из районов Якутии.

Комментарии закрыты.