Үйэлээх бэлэх

Аҕа атааҕа, аҕа мааныта диэн кимий? Биһиги ыалга соҕотох кыыс буоламмын олус мааныланан, бүөбэйдэнэн улааппытым. Ордук аҕам атаахтатара. Кини сопхуоска «кыра» тойон буолан аска-таҥаска улаханнык наадыйбат этибит. Биир сыл соһуччу үлэтиттэн ууратаннар кырыысчык, тиийиммэт-түгэммэт күннэр үүммүттэрэ. Оҕо сааспын санаатахпына, тоҕо эрэ, орду кол үп-харчы өттүнэн ыарахан кэмнэри ахтабын. Бу санаатахпына, оннук тыйыс кэмнэргэ дьиэ кэргэммит өссө ордук түмсүбүтэ быһыылааҕа.
Аҕам «кыра» тойон эрдэҕинэ хас биирдии бырааһынньыкка, кыра да буоллар, бэлэхтээх буолара. Кини үлэтэ суох хаалбыт сылын Саҥа дьылыгар куудара баттахтаах, күөх харахтаах, маҥан ырбаахылаах куукуланы баҕарбытым. Оо, ол куукуланы өр да күүттүм этэ… Сэмээр аҕам хайа диэки хаамарын маныырым, санаабар, миигиттэн кистээн бэлэҕин ыраах уурар курдуга. Күүттэриилээх Саҥа дьыл үүнэр күнэ үүммүтэ. Бүгүн, былааным быһыытынан, аҕам куораттан ылбыт куукулатын бэлэх тутан, сарсыныгар ыалбыт аах кыыстарыгар Мааһыҥкаҕа саҥа оонньуурбун көөчүктүү тахсыахтааҕым. Арай, аҕам бэлэҕэ суох эбит, ол оннугар санныгар олордон таһырдьа таһаарда. Оҕотук санаабар куукулабын, баҕар, таһырдьа кистээбитэ буолаарай диэн санаа «күлүм» гынан ааста. Суох, баҕалаах оонньуурум таһырдьа да суох.
– Ньургуһун, ол чаҕылхай сулуһу көрөҕүн дуо? Ити сулус – эйиэнэ! Кини эн ааккынан буоллун!, – диэтин кытта хараҕым уута таҥнарардыы таммалаан хомойбуппун биллэрдэ. Аҕам барахсан санаарҕаабыт, ыгылыйбыт харахтарын күн бүгүҥҥэ диэри умнубаппын…
Билигин мин ыал ийэтэбин, тапталлаах кэргэммин, Дьокуускай дьоҕус тэрилтэтигэр аҕам курдук «кыра» хотуммун. Ол түгэнтэн отуттан тахса сыл ааста. Аҕам бэлэхтээбит сулуһа күн бүгүҥҥэ диэри суолбун сырдатар, барар-кэлэр кэмнэрбэр аргыс буолан тэҥҥэ хаамсар. Кини үйэлээх бэлэҕэ ханнык да оонньуурдааҕар күндүтүн кэлин, улаатан баран өйдөөбүтүм. Аҕам тыыннааҕар бэлэхтээбит «Ньургуһун» сулуһа биир аҕа уонна кини мааны кыыһа бу орто дойдуга олорон ааспыттарын туоһута буолан үйэттэн үйэҕэ түүҥҥү халлааны сырдата туруоҕа. Мин аҕам маанытабын, мин аҕам атааҕабын!

Добавить комментарий

Ваш адрес email не будет опубликован. Обязательные поля помечены *