“Коркинныы үлэлиэххэ! Коркинныы айыахха!” быыстапка үөрүүлээхтик аһылынна!

 

“Строительнай” Атыы-эргиэн киинин Быыстапкалыыр саалатыгар биһиги улуу киһибит, Саха сирин үтүөлээх учуутала, ССРС, РСФСР, Саха АССР үтүөлээх тренерэ Дмитрий Петрович Коркиҥҥа аналлаах “Коркинныы үлэлиэххэ! Коркинныы айыахха!” диэн, республикатааҕы быыстапка үөрүүлээхтик аһылынна.

 

 

Быыстапкаҕа Олимпиада үрүҥ көмүс призера, спорт үтүөлээх маастара Александр Иванов спорка ситиспит мэтээллэрэ, наҕараадалара, олимпийскай чемпион Павел Пинигин тус олоҕун, тустууларын көрдөрөр хаартыскалара, ССРС үс, Европа икки төгүллээх чемпиона, спорт үтүөлээх маастара Василий Гоголев хаартыскалара, мэтээллэрэ, спортивнай суруналыыстар Владислав Коротов, Петр Павлов тустуу туһунан таһаарбыт кинигэлэрэ, спорт төлөннөөх пропагандиһа, биллиилээх коллекционер Михаил Друзьянов муспут эриэккэс кубоктара, мэтээллэрэ, былыргы халандаардара, вымпеллара, Саха АССР үтүөлээх тренерэ Константин Сергеевич Постников архыыбыттан кини төрөппүт кыыһа Саргылана Постникова оҥорбут альбомнара, тустуу туһунан вымпеллара, Чурапчытааҕы Д.П. Коркин аатынан спортивнай интернат-оскуолатын (дириэктэр Н.Н. Гуляев) уонна Р.М. Дмитриев аатынан Олимпийскай эрэл училищетын (дириэктэр А.А. Филиппов) быыстапкалыыр анал стендэлэрэ, Чурапчытааҕы Д.П. Коркин аатынан Тустуу Албан аатын мусуойун (дириэктэр Е.В. Пудов) улуу тренергэ сыһыаннаах альбомнара уонна да атыттар, тустуу сыаналаах сэдэх экспонаттара көрдөрүүгэ туруорулуннулар.

Быыстапканы “Хотугу сулус” оҕо телевидениенан уонна радионан академиятын толорооччу дириэктэрэ, Саха Республикатын култууратын үтүөлээх үлэһитэ Татьяна Афанасьевна Гоголева көҕүлээн уонна салайан иккис сылын тэрийдэ.

Үөрүүлээх аһыллыыга Р.М. Дмитриев аатынан Олимпийскай эрэл училищетын үөрэнээччилэрэ, спорду таптааччылар, улуу тренербит Дмитрий Петрович Коркиҥҥа сүгүрүйээччилэр, спорт бэтэрээннэрэ кыттыыны ылан, быыстапканы сэргээн көрдүлэр-иһиттилэр.

Кинилэри “Строительнай” Атыы-эргиэн киинин генеральнай дириэктэрэ, Ил Түмэн депутата Иван Данилов, СР Спорка уонна физическэй култуураҕа миниистирин бастакы солбуйааччы Семен Чердонов, өр сылларга спорт салайааччынан ситиһиилээхтик үлэлээбит Ил Түмэн депутата Михаил Гуляев, Олимпийскай эрэл училищетын дириэктэрэ Алексей Филиппов, олимпийскай призер Александр Иванов, спорт бэтэрээнэ Петр Попов, улуу тренер Д.П. Коркин огдообото Александра Семеновна Коркина, спорт бэтэрээнэ Семен Окоемов уо.д.а. быыстапка аһыллыбытынан эҕэрдэлээтилэр.

Кинилэр, бу быыстапка – Саха сирин тустуутун историятын кэрэһитэ, биһиги историяны билиэхтээхпит уонна киэн туттуохтаахпыт, улуу тренер Дмитрий Петрович Коркин аатын үйэлэр тухары өрө тутуохтаахпыт диэтилэр. Маннык быыстапка эдэр ыччаты иитиигэ анаан сылы эргиччи үлэлииригэр баҕардылар. Итиэннэ бу тэрээһин Д.П. Коркин аатынан турнир кэмигэр ыытыллыбыта эбитэ буоллар, өссө көдьүүстээх буолуо этэ диэн санааларын тиэртилэр. Тэрийээччилэргэ барыларыгар махтаннылар.

Дьэ, ити курдук, саханы аан дойдуга ааттаппыт улуу киһибит – Дмитрий Петрович Коркин сырдык аатыгар анаммыт, киниэхэ сыһыаннаах матырыйааллары дьон-сэргэ көрүүтүгэр таһаарар киэҥ ис хоһоонноох быыстапка үлэтин саҕалаата. Манна былаан быһыытынан араас кэрэхсэбиллээх тэрээһиннэр, көрсүһүүлэр, “төгүрүк остуоллар” нэдиэлэ устата ыытыллыахтара. Бастакы тэрээһининэн – Д.П. Коркиҥҥа үөрэммит, эрчиллибит, Чурапчытааҕы спортивнай интернат-оскуоланы 1969 сыллаахха үөрэнэн бүтэрбит кылаас дьонун көрсүһүүлэрэ буолла.

Итинник, Монреаллааҕы Олимпиада үрүҥ көмүс призера Александр Иванову кытта уонна кини бииргэ үөрэммит доҕотторун кытта көрсүһүү бэҕэһээ буолла, бүгүн – спортивнай  суруналыыс Владислав Коротов Монреаллааҕы Олимпиада үрүҥ көмүс призера Александр Иванов туһунан уонна Саха сирин тустуутугар анаан бэлэмнээн таһаарбыт кинигэлэрин, альбомнарын тула аһаҕас кэпсэтии ыытыллар.

Сарсын – спортивнай суруналыыс, “Дьулурҕан” хаһыат редактора Петр Павлов “Саха сирин тустуутун сайдыытыгар спортивнай суруналыыстар оруолларын” туһунан сэһэргэһии, Д.П. Коркин үөрэнээччитэ, ССРС спордун маастара, спортивнай тэрийээччи, салайааччы, краевед, коллекционер Михаил Егорович Друзьяновтыын көрсүһүү.

Өйүүн – Россия Суруналыыстарын сойууһун чилиэнэ, Саха суруйааччыта Иван Ушницкай – тустуу туһунан санаа атастаһыыта. Олимпийскай чемпион, Ил Түмэн депутата Павел Павлович Пинигинныын көрсүһүү.

Субуотаҕа – ССРС үс, Европа икки төгүллээх чемпиона, Үтүө Дьулуур оонньуутун кыайыылааҕа, ССРС спордун үтүөлээх маастара Василий Николаевич Гоголевтыын, Д.П. Коркин аатынан Чурапчытааҕы республиканскай Олимпийскай эрэллэри бэлэмниир оскуола-интернат дириэктэрэ Николай Николаевич Гуляевы уонна спортивнай Албан аат мусуойун дириэктэрэ Егор Васильевич Пудовы кытта көрсүһүүлэр.

Баскыһыанньаҕа – Саха тустуутун сайдыытын кэрдиис кэмнэрин кэрэһиттэрэ, тустуу бэтэрээннэрин кытта көрсүһүү буолуоҕа.

Быыстапка балаҕан ыйын 17 күнүгэр диэри хас күн аайы “Строительнай” Атыы-эргиэн киинин (Жорницкай уул. 35 №-дээх дьиэтэ) Быыстапкалыыр саалатыгар үлэлиир. Кэлиҥ, көрүҥ, сыаналааҥ, санааҕытын үллэстиҥ.       

Петр ПАВЛОВ.

Ааптар хаартыскаҕа түһэриитэ.    

Добавить комментарий

Ваш адрес email не будет опубликован. Обязательные поля помечены *