Аан дойду лоскуйдара

Бүтүн Россиятааҕы аттаран тигэр иистэнньэҥнэри түмэр Ассоциация уонна Норуоттар икки ардыларынааҕы Суздаль куоракка ыытыллар “Душа России» фестиваль тэрийэр комитета, салайааччы Римма Алиевна Быбина, Саха сиригэр араас үлэлэри ыыттылар.

Ол үлэлэр Нам улууһугар ыытыллыбыт “Олоҥхо — 2019” ыһыах ыалдьыттарыгар умнуллубат историческай суолталаах дьоһун бэлэх буолбуттара. Салгыы бу үлэлэр Дьокуускай куоракка ыытыллыбыт норуоттар икки ардыларынааҕы “Сохранение языков народов мира и развитие языкового разнообразия в киберпространстве: контекст, политика, практика» конференция чэрчитинэн турбут  «Мозаика Мира» быыстапка  биир сонун уонна кэрэхсэнэр үлэлэринэн буоллулар.

Бу быыстапкаҕа Россия, Германия, Америка, Корея, Япония, Индонезия, Австралия курдук сирдэртэн кэлбит үлэлэр турдулар. Саха республикатын Ил Дархана Айсен Сергеевич Николаев биллэрбит Сомоҕолоһуу сылыгар эппиэттэһэр тэрээһин буолла.

Манна үтүө санаалаах хотун Римма Алиевна Саха Сирин ис сүрэҕиттэн сөбүлээн, тус бэйэтинэн кэлэн кыбытыылаах тигиини сэргээн, кэрэхсээн барда. Бу быыстапкаҕа биһиги иистэнньэҥнэрбит Россия, Япония, Лондон, Италия курдук дойдуларга ыытыллыбыт быыстапкаларга кыттыбыт үлэлэрэ турдулар. Ол курдук Мирнэйтэн Ульяна Миронова,  Намтан Мария Сыромятникова, Тааттаттан Арина Большакова, Хаҥаластан Раиса Слепцова, Чурапчыттан Альбина Дьячковская уо.д.а  иистэнньэҥнэр үлэлэрэ үрдүк сэҥээриини ыллылар.

Ону таһынан саҥа ааттары арыйдылар: Намтан Марфа Корякина, Ньурбаттан Евдокия Кононова уонна тэрийээччилэр ураты биһирэбиллэрин бу үйэлээх сааһыгар  диэри илиитин үлэттэн араарбатах ытык кырдьаҕас, үлэ, тыыл бэтэрээнэ, аныгы үйэ дьахтара — Анна Слепцова ылла. Кини киһи дэбигис ылсыбат ынах тириититтэн аттаран тикпит үлэтэ хайҕанна, уонна Суздаль куоракка фестивальга кыттарга ыҥырылынна.

Мозаиканан ииһи 30 сыл аннараа өттүгэр Анна Николаевна Зверева сөргүтэн саҕалаабыта. Оччолорго Анна Николаевна маҥнайгы айар быыстапкатыгар Үлэ Геройа, норуодунай суруйааччы  Дмитрий Кононович Сивцев-Суорун Омоллоон  ыалдьыттаабыт. Үлэлэри олус өр сыныйан көрөн баран Саха норуотугар бу дьарык инники суолтатын өтө көрбүтүн туһунан маннык эппит: “Анна Николаевна, кэрэ эйгэтигэр ис сүрэххиттэн ылсаҥҥын үлэлээн эрэргин ким барыта эҕэрдэлиэн эрэ сөп. Мозаиканан дьарыктаныыҥ биир саҥа көрүҥ эбит. Онтуойун сайдарыгар тэрилтэлэр, общественность даҕаны көмө оҥороллоро бэрт сиэрдээх суол буолуохтаах. Ис сүрэхпиттэн баҕарабын эн таптыыр идэҥ өссө киэҥник, далааһыннаахтык сайдан иһэригэр».

Аттаран тигии өссө да сайдар, сэҥээрээччитэ элбиир, саҥаттан-саҥа, кэрэттэн-кэрэ үлэлэр, сонун ааттар, ааптардар тахсан иһэллэр. Бу курдук куруутун үлэлии-хамсыы, өбүгэбит үтүө үгэһин инники күөҥҥэ илдьэ сылдьан аан дойдуга аатырдалларыттан киэн туттабыт, истиҥник үөрэбит.

Добавить комментарий

Ваш адрес email не будет опубликован. Обязательные поля помечены *