Абыйга «Көмүс күһүн бэлэхтэрэ» быыстапка-дьаарбаҥка ыытылынна

Абыйга бу тэрээhин сылын аайы ыытыллар буолан үгэскэ кубулуйда. Онон кыттааччылар эрдэттэн бэлэмнэнэн кэлэн сайыны быһа үүннэрбит оҕуруоттарын аһын араас көрүҥнэрин дэлэйдик туруорбуттар.


Быйылгы тэрээһин түөлбэлэр икки ардыларыгар куонкурус быһыытынан ыытылынна. «Элгэс» (сал. Чиркова А.Н.), «Түмсүү» (сал. Стручкова Ж.В.), «Уйгу» (сал. Яковлева А.Е.) кытыннылар.
Куонкурус 6 түһүмэҕинэн ыытылынна:
— Түөлбэ турар сирин киэргэтии;
— Түөлбэни билиһиннэрии (визитка);
— Түөлбэ эҕэрдэ нүөмэрэ;
— Күһүҥҥү астан бүлүүдэ;
— Оҕуруот аһынан кэнсиэрбэлэммит бородуукта арааһа (ахсаана);
— Саамай улахан (гигант) оҕуруот аһа.
Хас биирдии түөлбэ олохтооҕо араас дьикти үүнээйитин, оҕуруотун, сирин аhын быыстапка-дьаарбанкаҕа аҕалла. Бары да бэркэ бэлэмнэммиттэр, күһүҥҥү кэмҥэ дьүөрэлээх биир тэҥ атрибуттаахтар. Турар миэстэлэрин киэргэппиттэрэ олус үчүгэй!
Бастакы түһүмэххэ «Элгэс» түөлбэ олохтоохторун ураты дьарыктарын хомоҕой хоһоонунан хоһуйдулар уонна түөлбэ аҕа саастаах оҕуруотчутугар Сухомясова Тамара Васильевнаҕа сэмэй бэлэҕи туттардылар.

«Түмсүү» түөлбэ оҕуруот, сибэкки олордуутунан дьарыктанар олохтоохторун кэпсээтэ. Сыл ахсын оҕуруот олордон, өлгөм үүнүүнү ылар, элбэх сибэкки эгэлгэлээх Анна, Алемпий Дохунаевтар дьиэ кэргэңңэ бэлэх туттардылар. «Уйгу» түөлбэ аҕа саастаахтан саҕалаан оҕотугар тиийэ “Аал луук” мас уруһуйдаан сырдаттылар.

Эҕэрдэ нүөмэрдэри бары да киһи эрэ сэргиэх курдук толордулар. Элгэстэр оҕуруотчуттарга анаан музыкальнай импровизация туруордулар, онно аҕа саастаах дьоммут кыттыбыттара үөртэ. Түмсүүлэр частушкалаатылар. Уйгулар оҕолуун, улаханныын бары кытыннылар, Антошка оруолун Любовь Григорьева үҥкүүлээн дьону сэргэхситтэ.
Yһүс түһүмэххэ Анна Никифоровна Дохунаева («Түмсүү») тэллэй, сэбирдэх көрүҥнээх минньигэс бэчиэнньэ астаан, Марина Андреевна Слепцова («Уйгу») сып-сымнаҕас балык көрүҥнээх бөрүөк оңорон, Марта Васильевна Бережнова («Элгэс») «Күһүңңү бэлэх» бүлүүдэ — фаршируйдаммыт сибиэһэй уомул; искэх; балыктан, күстэхтэн паштеттар; хаппыыста, оҕурсу салааттара, помидор, лук, хортуоппуй көрөөччүлэр сэҥээриилэрин ыллылар. Кыайыылааҕынан Марта Васильевна — «Элгэс» түөлбэ буолла. Кэнсиэрбэлэммит ас арааһынан элгэстэр тэҥнээхтэрин булбатылар.

Биһиги тыйыс айылҕабытыгар соҕуруу сиртэн итэҕэһэ суох оҕуруот астара үүнэллэр эбит. “Саамай улахан оҕуруот аһа» түһүмэх ону көрдөрдө. Күрэҕи оскуола үлэһиттэрэ Слепцова С.Г., Афанасьева А.В. ыыттылар. Бу түһүмэххэ кыайыылаахтарынан саамай улахан хаппыысталаах (6520 гр.) Черемкина Елена Егоровна, моркуоптаах (552 гр.) Слепцова Вера Агитовна, хортуоппуйдаах (530 гр.) Черемкина Мария Васильевна, сүбүөкүлэлээх (1372 гр.) Дохунаева Вера Васильевна, биэрэстээх (156 гр.) Слепцова Светлана Алексеевна, кабачоктаах (2888 гр.) Жиркова Оксана Семеновна, помидордаах (236 гр.) Черемкина Елена Егоровна, оҕурсулаах (954 гр.) Слепцова Вера Агитовна ааттаннылар. Кыайыылаахтар сертификат уонна сэмэй бэлэх туттулар.
Бары түһүмэхтэр түмүктэринэн кыайыылааҕынан “Элгэс”түөлбэ (сал. Чиркова А.Н.) таҕыста.
Итини таһынан Жиркова Мария Николаевна аатынан ыытыллар сибэкки күрэҕин түмүгэ таҕыста. Бу күрэххэ олбуорун иһигэр араас эгэлгэ сибэккилэри олордубут В.М.Никулина кыайыылаах аатын ылла. Кини олохтоох дьаһалта бирииһин тутта. Мария Николаевна оҕолорун, аймахтарын ааттарыттан «Ветеран цветовод» — Т.В.Сухомясова, «Молодой цветовод» — Н.Г. Григорьева  анал ааттарынан бэлиэтэннилэр, бириистэри кийиитэ Оксана Семеновна Жиркова туттарда.
Бу күн култуура үлэһиттэрэ кинигэ быыстапкатын тэрийдилэр.

Ааптар: Слепцова А.Н.

Сообщение Абыйга «Көмүс күһүн бэлэхтэрэ» быыстапка-дьаарбаҥка ыытылынна появились сначала на Ulus.Media — все главные новости из районов Якутии.

Комментарии закрыты.