Аммаҕа төлөпүөн түөкүннэриттэн сэрэхтээх буоларга ыҥыраллар

Аммаҕа ааспыт сыл түмүгүнэн ис дьыала отделыгар төлөпүөн түөкүннэриттэн эмсэҕэлээбит үс киһи бэлиэтэммитэ. Маннык албыннааһыҥҥа киирэн биэрбэт туһуттан сотрудниктар уонна баан үлэһиттэрэ нэһилиэнньэни сэрэхтээх буоларга ыҥыраллар.


СӨ ис дьыалаҕа министиэристибэтэ төлөпүөнүнэн түөкүннээһин Саха сиригэр тарҕанан эрэрин иһитиннэрэр. Түөкүттэр бэйэлэрин банк үлэһитин эбэтэр куттал суох буолуутун сотруднигын аатыттан эрийэллэр, сороҕор харчыны тыыттарбат программаны туруортарар курдук этэллэр. Эрийбит дьонноругар докумуоннарын уонна карталарын сибидиэнньэлэрин, күлүүс тылларын (паролларын) этэллэригэр көрдөһөллөр. Ис дьыала отделын сотрудниктара мунаарар боппуруостаах буоллаххытына бааҥҥа тиийэн эбэтэр тэрилтэ төлөпүөнүгэр эрийэн сиһилии билсэргитигэр сүбэлииллэр. Оттон баан үлэһиттэрэ төлөпүөннэрин сүтэрбиттэр карталарын харчытын тыыттарбат туһуттан тута 900 диэн баан нүөмэригэр эрийэн биллэрэллэригэр ыҥыраллар. Ааспыт сыл түмүгүнэн төлөпүөнүнэн түөкүннээһиҥҥэ өрөспүүбүлүкэҕэ 60, оттон Амма улууһугар 3 дьыала көбүтүлүннэ.

Николай Турантаев, холуобунай ирдэбил начаалынньыга, полиция капитана: «Ааспыт сыл түмүгүнэн түргэн ситиминэн төлөпүөнүнэн түөкүннээһиҥҥэ улуус иһинэн үс үҥсүү киирбитэ. Түөкүттэр төлөпүөнүнэн баан үлэһитин аатыттан дьыалабыайдык эрийэллэр уонна пааспардарын, карталарын сибидиэнньэлэрин ылаллар, сороҕор харчы ыыталларыгар этэллэр уонна харчы уоруллубутун кэннэ сибээстэн сүтэн хаалаллар. Итинник дьыала арыллара уустук. Ити үксүн соҕуруу куораттартан интэриниэт ситиминэн оҥоһуллар эрдэттэн былааннаммыт, толкуйдаммыт түөкүннээһин буолар. Манна сааһыттан тутулуга суох хайа баҕарар итэҕэйимтиэ киһи киирэн биэриэн сөп. Түөкүн хайдах үлэлиириттэн эмиэ тутулуктаах. Куйаар ситимигэр аныгы олох тэтиминэн олорор эдэр дьон эмиэ түбэһэллэр. Кинилэр интэриниэт маҕаһыынтан удамыр сыаналаах табаары ылаары биир күннээх сайтарга киирэннэр харчыларын ыытан кэбиһэллэр. Сороҕор биллибэт нүөмэртэн кылгас иһитиннэриини, вируһу ыыталлар, ону арыйдахха харчыларын барытын ыытан кэбиһиэн сөп. Баан үлэһиттэрэ хаһан даҕаны эрийэн докумуоннарыҥ, картаҥ туһунан сибидиэнньэни ыйыппаттар. Түөкүн накаастабыла уоруллубут суумматыттан, эмсэҕэлээччи материальнай балаһыанньатыттан тутулуктаах. Уорбаланааччы эрдэ тутулла сылдьыбыт буоллаҕына ыстатыйата эмиэ ыарыыр. Ортотунан биэс сылга диэри хаайыыга барыан сөп. Түөкүннээһиҥҥэ Саха сиригэр ордук промышленнай оройуон олохтоохторо түбэһэллэр. Дьон барыта кэриэтэ куйаар ситиминэн туһанар, төлөпүөнүнэн хайа баҕарар сайтка киирэр кыахтаах. Төлөпүөҥҥэ элбэх иһитиннэриилэр, сибидиэнньэлэр хараллаллар, онон ханнык да боппуруоска  хоруйу биэрэргит кутталлаах. Түөкүттэргэ өс киирбэх эппиэттээмэҥ, картаҕытыгар көҥүллүк киирэллэриттэн сэрэхтээх буолуҥ».

Марфа Кычкина, Амматааҕы сбербанк филиалын салайааччыта: «Дьон бэйэбит билбэппитинэн картабытыттан харчыны уһуллулар диэн эрийээччилэр. Харчыгытын ыллахтарына тута 900 нүөмэргэ эрийэн биллэрэн карта үлэтин тохтотуохха наада. «Онлайн» сбербаннаах дьон улахан сууммаларын киниискэҕэ көһөрөн кэбиһээччилэр. Картаҕа элбэх харчыны туппакка, уурунуу киниискэҕэ угар куттала суох буолар. Сбербанк үлэһиттэрэ саҥа картаны оҥорторбут дьоҥҥо эбэтэр кредиттэрин кэмигэр төлөөбөтөхтөргө эрэ эрийиэхтэрин сөп. Картаны страховкалыыр сбербанк өҥөтүнэн дьон эмиэ туһаналлар. Төлөпүөнү сүтэрэн кэбистэххэ атын киһи арыйбатын курдук «хатыыргытыгар» (блокировка) сүбэлиибит».

Ааптар: Алтана Артемьева

Сообщение Аммаҕа төлөпүөн түөкүннэриттэн сэрэхтээх буоларга ыҥыраллар появились сначала на Ulus.Media — все главные новости из районов Якутии.

Комментарии закрыты.