Амма Чакырыгар «Кэскил» хаһаайыстыба ыанньыксыттара саҥа хотоҥҥо астына үлэлииллэр

Чакыр нэһилиэгин «Кэскил» хааччахтаммыт эппиэтинэстээх хаһаайыстыба ыанньыксыттара бу күһүн 120 миэстэлээх саҥа хотоҥҥо көһөн киирэннэр үөрүүлэрэ улахан. Аны эһиил иккис хотон тутулларын күүтэллэр.


Ааспыт сылга улууска тыа хаһаайыстыбатын тус сыаллаах программатынан 26 эдэр ыал саҥа дьиэни тутунна, сэттэ сылгы базата, алта хотон үлэҕэ киирдэ. Сайылыктааһын программатынан Чакыр уонна Сатаҕай нэһилиэктэрин улахан хаһаайыстыбалар улахан тутууларыгар бу сайын көһүөхтэрэ. Чакырга «Кэскил» хаһаайыстыба ыанньыксыттара бу күһүн 120 миэстэлээх саҥа хотоҥҥо көспүттэрэ. Ыанньыксыттар саҥа дьиэҕэ – уокка киирэнннэр астына, үөрэ – көтө үлэлииллэр.



Александр Карманов, «Кэскил» хааччахтаммыт эппиэтинэстээх тэрилтэ дириэктэрэ: Саҥа тутууну «Хаҥалас Тутуу» ХЭТ (генеральнай дириэктэр Кан Терешкин) Леонид Терешкин салайааччылаах тутуу биригээдэтэ от ыйыттан тутан саҕалаабыта. Алтынньы ыйга душтаах, туалеттаах, толору хааччыллыылаах саҥа хотоҥҥо киирдибит. Үлэлиир усулуобуйабыт биллэ тупсан, чэпчээн үлэһиттэр үөрүүлэрэ улахан. Сыл түмүгүнэн хаһаайыстыбабытыгар уопсайа 555 төбө сүөһү, ол иһигэр 194 ньирэй, 99 ыччат сүөһү, 28 бургунас, 230 ыанар ынах, 2 оҕус, 2 ат оҕус баар. Үүккэ 478,857 туоннаны ыаммыт былааммытын 100,17 бырыһыан толордубут. Хаһаайыстыбабытыгар икки хотоҥҥо ыанар ынахтар, икки хотоҥҥо ыччат сүөһүлэр тураллар. Сорох сүөһүлэрбит Аммаҕа бааллар. Саҥа хотоҥҥо 120 ынаҕы түөрт уопуттаах ыанньыксыттарбыт ыыллар. Биригэдьиир Светлана Григорьева үлэһиттэрин сатабыллаахтык салайар. Кыстыахтаах 950 туонна оппутун Анатолий Баишев биригээдэтэ оттообута. Иккис хотоммутун эһиил туттарар былааннаахпыт».

Амгарита Кириллина, ферма ыстаарсай ыанньыксыта: «1980 сыллаахха оскуоланы бүтэрээт, сопхуоска ыанньыксытынан үлэлии киирбитим. Ол тухары эргэ сыбах хотоннорго үлэлээн кэллибит. Билигин бэртээхэй усулуобуйалаах саҥа хотоҥҥо киирэммит үлэбит чэпчээн абыранныбыт. Ынахтарбытын урут шланганан уулатар эбит буоллахпытына, билигин кырааны да арыйбаппыт. Уу аптамаатынан бэйэтэ туоларынан кэлэ турар. Тыраахтар от киллэрбитин атырдьаҕынан тарыйан эрэ биэрэбит. Ноһуом транспортерунан бара турар. Билигин 25 – тии ынахтаахпыт, аны биэстии бургунаһы ылыахтаахпыт. Ааспыт сылга 64,1 туонна үүтү ыаммын былааммын толордум».

Айталина Капитонова, ыанньыксыт: «Оскуоланы бүтэрэн баран икки сыл сопхуоска ыанньыксыттаабытым. Бэтэринээр идэлээх аҕам Анатолий Петрович Иванов туйаҕын хатаран тыа хаһаайыстыбатын техникумугар бэтэринээр биэлсэр идэтигэр үөрэммитим. Идэбинэн Чакырга, Мээндигигэ, Уус Маайаҕа сүүрбэччэ сыл үлэлээтим. Билигин дойдубар төннөн кэлэммин миэстэ баарынан фермаҕа киирбитим. Ааспыт сылга 63 туонна үүтү ыатым, былааммын толордум. Маны таһынан бэтэринээр эбээһинэһин сүгэбин. Төрөөбүт ынахтар кэнэҕэскилэрэ хааллаҕына, ньирэй төрүүрүгэр, ньирэйдэр истэрэ ыарыйдаҕына мин көмөм наада буолар. Ону таһынан битэмиин биэрэбин, аттааһын эмиэ баар буолааччы».

Ферма үлэтигэр олоҕун анаабыт Семен Иванов аттынааҕы хотоҥҥо субан сүөһүлэри көрөр. Кини 1973 сылтан сопхуоска оробуочайынан, тырахтарыыһынан сылдьыбыта, кэлин сүүрбэттэн тахса сыл сүөһүнү иитиигэ үлэлиир. Семен Гаврильевич үлэтин сөбүлүүр, саҥа хотоҥҥо куруук киирэ – тахса сылдьар, үлэлиир усулуобуйаларын  хайгыыр, үлэ чэпчээбититтэн үөрэр. Хаһаайыстыба сүөһүлэрэ бары батар саҥа хотонноро баар буолалларыгар баҕа санаата улахан.

Бу туһунан «Амма олоҕо» хаһыат кэлэр нүөмэригэр ааҕаарыҥ.

Ааптар: Алтана Артемьева

 

Сообщение Амма Чакырыгар «Кэскил» хаһаайыстыба ыанньыксыттара саҥа хотоҥҥо астына үлэлииллэр появились сначала на Ulus.Media — все главные новости из районов Якутии.

Комментарии закрыты.