Амма улууһун нэһилиэктэрин исписэлиистэрэ спорт боппуруостарыгар сүбэлэстилэр

Амма улууһун нэһилиэктэрин исписэлиистэрэ спорт боппуруостарын тула сүбэ мунньахха кытыннылар. Кэмитиэт саҥа салайааччытынан анаммыт Владимир Капитонов спорт инструктордарын түмсүүлээхтик үлэлииргэ ыҥырда.


Амма улууһун спортка исписэлиистэрэ сыллааҕы былаан,  ГТО нуорматын туттарыы, нэһилиэктэр икки ардыларыгар ыытыллар комплекснай спартакиада тэрээһин боппуруостарын туһунан сүбэлэстилэр. Бу сылга кыһыҥҥы IV оонньуулар Дьокуускай, Алдан, Нерюнгри куораттарга, кэлэр сылга Манчаары XXI оонньуулара Горнай улууһугар буолуохтаахтара эмиэ этилиннэ.


Сүбэ мунньаҕы физкультураҕа уонна спортка улуустааҕы кэмитиэт начаалынньыгынан саҥа ананан иккис нэдиэлэтин үлэлээн эрэр Владимир Капитонов салайан ыытта. Түмүккэ Кэбээйи улууһугар сэттэ сыл спорт кэмитиэккэ үлэлээбит Сулҕаччыттан төрүттээх волейбол көрүҥэр идэтийбит  исписэлиис бэйэтин былааннарын, баҕа санааларын эттэ уонна бары бииргэ түмсүүлээхтик үлэлииллэригэр  ыҥырда.

Владимир Капитонов, физкультураҕа уонна спортка улуустааҕы кэмитиэт начаалынньыга: «Мин үлэбин нэһилиэктэр исписэлиистэрин кытта билсиһииттэн саҕалаатым. Кинилэр былааннарын туһунан, күрэхтэһиилэр боппуруостарыгар, баар кыһалҕалары  кэпсэттибит. Амма улууһа сайын буолан ааспыт улахан оонньууларга иккис миэстэ буолбута элбэҕи этэр. Нэһилиэнньэ эт – хаан өттүнэн сайдыылаах буоларыгар, оҕо спордун оскуолатын сайыннарарга салгыы үлэлиэхпит. Чурапчыга үөрэнэн, Кэбээйиттэн кынаттанан, төрөөбүт Аммабар төннөн кэлэн улууһум сайдарын туһугар нэһилиэнньэ чөл олоххо тардыһыытыгар, үүнэр ыччаттарбыт Амма аатын улахан түһүлгэлэргэ дьоһуннаахтык ааттаталларыгар, үрдүк чыпчааллары дабайалларыгар күүс, көмө буолар, кылааппын киллэрэр баҕалаахпын».

Александр Артемьев, Бөтүҥ нэһилиэгин спортка инструктора:«Нэһилиэк исписэлиистэрэ саҥа салайааччыбытын  кытта билистибит, сыллааҕы былааммытын кэпсэттибит. Мин үс боппуруоска санаабын эттим. Бастатан туран, бэйэбит улууспут иһигэр буолар комплекснай күрэхтэһиилэри атын күрэхтэһиилэри кытта биир күҥҥэ ыыппаттарыгар этии киллэрдим. Тоҕо диэтэххэ, нэһилиэк дэгиттэр спортсменнара атын күрэхтэһиигэ кыттыбакка хаалаллара, айаннаан кэлэллэригэр транспордара эбэтэр бензиннэрэ суох буолан хаалара да баар суол. Иккиһинэн, үс сыллааҕыта депутаттар, салайааччылар, лидердэр, спорт инструктордара ГТО нуорматын көмпүүтэргэ бэлиэтэниитэ суох туттарбыппыт дьиҥэ суоҕунан ааҕыллыбыта. Ону Владимир Владимирович бүгүҥҥү күнтэн саҕалаан булгуччу бэлиэтэнэр туһунан уонна күн бүгүн улууска ГТО испииһэгэр 926 киһи баарын туһунан иһитиннэрдэ. Үсүһүнэн, кыһыҥҥы оонньууларбыт өрөспүүбүлүкэтээҕи оонньуулары кытта араа – бараа ыытыллаары туралларынан бэйэбит күрэхтэһиилэрбитин кэмин иннинэ оҥорор ордугун уонна өрөспүүбүлүкэтээҕи күрэхтэһиилэр балаһыанньаларын улууска уларыппакка хайдах баарынан ыытар сөптөөҕүн эттим. Саҥа салайааччыбыт Владимир Владимирович салалтатынан тэрээһиннээхтик үлэлиэхпит диэн эрэнэбин».

Ааптар: Алтана Артемьева

Сообщение Амма улууһун нэһилиэктэрин исписэлиистэрэ спорт боппуруостарыгар сүбэлэстилэр появились сначала на Ulus.Media — все главные новости из районов Якутии.

Комментарии закрыты.