Аммалар диктант суруйуутун акциятыгар көхтөөхтүк кытыннылар

Төрөөбүт тыл, сурук-бичик күнүнэн республика үрдүнэн диктант суруйуута ыытыллар. Амма улууһун киин библиотекатыгар 17 киһи кэлэн бэйэлэрин холоннулар.


Бүгүн Амматааҕы киин библиотекаҕа таба суруйууга бэйэлэрин холонон көрүөн баҕалаах 17 киһи кэллэ. Республика киин библиотекатыттан кэлбит тиэкиһи СР үтүөлээх учуутала Александра Ивановна Артемьева аахта. Быйылгы тиэкис  – “Балыксыт” кэпсээнтэн быһа тардыы талыллыбыта мээнэҕэ буолбатах. Ааптар, саха литературатын төрүттээчилэртэн биирдэстэрэ Николай Денисович Неустроев төрөөбүтэ 125 сыла быйыл бэлиэтэнэрин үгүстэр билэллэрэ буолуо. Элбэх сурук бэлиэлээх эрээри уустуга суох тыллардаах кэпсээн. Диктант суруйалларын таһынан акция кыттааччылара үс сорудаҕы толороллор.



Аналлаах, тус нүөмэрдээх кумааҕыга суруллубут үлэлэри Александра Ивановна бэрэбиэркэлээн түмүгүн бэлэм критерийдэринэн таһаарар диэн тэрийээччилэр этэллэр. Төрөөбүт тыл, сурук-бичик күнүн биир тэрээһинэ Аммаҕа көхтөөхтүк ыытылынна.

Ааптар: “Амма олоҕо” хаһыат.

Сообщение Аммалар диктант суруйуутун акциятыгар көхтөөхтүк кытыннылар появились сначала на Ulus.Media — все главные новости из районов Якутии.

Комментарии закрыты.