Айаал Лазарев улахан көбүөргэ төннүүтэ ситиһиинэн саҕаланна

Кыргызстан киин куоратыгар Бишкеккэ, Кожомкул аатынан Спорт дыбарыаһыгар көҥүл тустууга бу дойду чемпионата ыытыллан түмүктэннэ. Чемпионакка барыта 218 бөҕөс күөн көрүстэ. Бу чемпионакка, кэлиҥҥи кэмҥэ биһиги тумус туттар бөдөҥ-садаҥ тустуукпут, Азия чемпиона, Азия чемпионатын үс төгүллээх призера, Риотааҕы Олимпиада кыттыылааҕа, норуоттар икки ардыларынааҕы кылаастаах спорт маастара Айаал Лазарев күүһүн холосто.

 

Кини кыттыбыт саамай ыарахан ыйааһыныгар (125 кг) барыта сэттэ бөҕөс туһунна. Биһиги бөҕөспүт улахан илистиитэ суох үс утарсааччытын кыайан баран, бүтэһик быһаарыылаах хапсыһыыга Айбек Касманбетовы очукуонан ыраастык кыайан, сыыспат буоллахпына, Кыргызстан алта төгүллээх чемпионунан буолла.

Санатан эттэххэ, 33 саастаах бухатыырбыт улахан эчэйии ылан, икки сыллаах тохтобул кэнниттэн көбүөргэ төнүннэ. Бу күрэхтэһии киниэхэ, бэйэтин эчэйиитин уонна бэлэмнэниитин тургутан көрүү этэ. Ону кини ситиһиилээхтик ааһан, улахан көбүөргэ ситиһиилээхтик төнүннэ. Аны бөҕөспүтүн улахан сыалга-сорукка угуйар атын күрэхтэһиилэр угуйаллар.

Бу кыайыытынан Айаалы бэйэтин уонна кини тренерин – РФ уонна СР үтүөлээх тренерин Иван Николаевич Сивцеви эҕэрдэлээн кэбиһиэҕиҥ! Өссө ситиһиилэри баҕарыаҕыҥ! Манна сыһыары тутан эттэххэ, кэнники кэмҥэ Айаал бииргэ эрчиллэригэр күүс-көмө, өйөбүл буолбут эдэр бөҕөс Андрей Аронов 97 киилэҕэ эмиэ Кыргызстан чемпионунан буолла. Кинилэр Кыргызстаҥҥа барыахтарын иннинэ Красноярскайга, Д.Г. Миндиашвили аатынан Тустуу академиятыгар анал бэлэмнэниини барбыттара.

Петр ПАВЛОВ. 

Добавить комментарий

Ваш адрес email не будет опубликован. Обязательные поля помечены *