Бүлүүгэ тыыл бэтэрээннэрэ, сэрии сылын оҕолоро саҥа дьиэ күлүүһүн туттулар

Үбүлүөйдээх кырдьаҕас Бүлүү куоратыгар  тыыл бэтэрээннэригэр уонна сэрии сылын оҕолоругар анаан тутуллубут толору хааччыллыылаах саҥа дьиэлэр үлэҕэ киирдилэр. 12 хаһаайыҥҥа күлүүстэрин үөрүүлээх быһыыга- майгыга туттардылар.


Сэрии сылларыгар тыылга бэйэлэрин харыстаммакка үлэлээбит уонна ити ыарахан кэмнэргэ оонньооботох оҕо саастара ааспыт көлүөнэ дьоҥҥо маннык дьоһун бэлэҕи Бүлүү улууһун дьаһалтата, баһылык Сергей Николаевич Винокуров Улуу Кыайыы 75 сылын көрсө оҥорбуттарын тоһоҕолоон бэлиэтиэххэ наада.

Бүлүү куоратын Оруктаах күөлүн кытыытыгар турар ыраас салгыннаах бэс чагда быыһыгар тыаһа- ууһа суох уу- чуумпу сиргэ  А.А.Арбыкин салайар «Промстроймонтаж» ХЭТ генеральнай бэдэрээтчит улуус дьаһалтатын үбүлээһининэн уонна көҕүлээһининэн быйылгы сылга түөртүү квартиралаах үс дьиэни тутан үлэҕэ киллэрдэ. Сахалыы сиэринэн саҥа дьиэҕэ киирии үөрүүлээх тэрээһинин алгысчыт Владимир Николаев аал уоту оттон, арыылаах алаадьынан, кыынньар кымыһынан айах тутан алҕаата. Ол кэнниттэн эҕэрдэ тылларын эттилэр: СӨ Бырабыыталыстыбатын Бэрэссэдээтэлин солбуйааччы, Бүлүү к. 385 сыллаах үбүлүөйүн тэрийэн ыытар өрөспүүбүлүкэтээҕи тэрийэр кэмитиэт бэрэссэдээтэлэ О.В.Балабкина, Бүлүү улууһун баһылыга С.Н.Винокуров, Бүлүү к. баһылыга Н.В.Афанасьев. Салгыы кинилэр 12 тыыл бэтэрээннэригэр, сэрии сылын оҕолоругар М.С.Тимофееваҕа, Т.С.Алексееваҕа, М.А.Прокопьеваҕа, Е.И.Протопоповаҕа, А.Т.Егороваҕа, М.И.Захароваҕа, Е.С.Филипповаҕа, А.Ф.Егоровка,Н.А.Дроботоваҕа, М.С.Волковаҕа, А.Д.Петровка, У.М.Каратаеваҕа саҥа дьиэ күлүүстэрин дохсун ытыс тыаһын доҕуһуолугар туттардылар.

Саҥа дьиэ күлүүһүн ылбыт ытык дьоммут ааттарыттан Герой ийэ, тыыл бэтэрээнэ Ульяна Михайловна Каратаева ис сүрэҕиттэн үөрэн- долгуйан туран, харда тылы эттэ. Кини чуолаан кырдьаҕас дьоҥҥо кыһамньытын, улахан болҕомтотун ууран, толору хааччыллыылаах маннык үчүгэй дьиэлэри туттаран, буор- босхо бэлэхтээбит улуус баһылыгар С.Н.Винокуровка, генеральнай бэдэрээтчит А.А.Арбыкиҥҥа, бар дьонугар барҕа махталын тириэртэ. Оройуон Сэбиэтин дьокутаата И.Е.Рожин Балаҕаччы нэһилиэгин дьаһалтатын уонна олохтоохторун ааттарыттан тыыл бэтэрээнин, Балаҕаччы бочуоттаах олохтооҕун Мария Семеновна Волкованы истиҥник эҕэрдэлээтэ уонна кинилэр ыыппыт эҕэрдэ суруктарын, бэлэхтэрин туттарда. Бүлүү улууһун бэтэрээннэрин Сэбиэтин бэрэссэдээтэлэ Г.А.Солтуев бэтэрээннэргэ анаан маннык дьиэлэри тутуу үтүө хамсааһын быһыытынан биһиги улууспутугар үһүс төгүлүн ыытылларын, ол курдук бастаан биир дьиэттэн саҕалаан билигин хайы- үйэ түөртүү кыбартыыралаах алта дьиэ дьэндэйбитин, сүрүн уратытынан ити дьиэлэр бэтэрээннэргэ бэйэлэрин бас билиилэригэр босхо бэриллибиттэрин тоһоҕолоон бэлиэтээтэ.

Түмүккэ саҥа дьиэлэр олохтоохторо СӨ Бырабыыталыстыбатыгар, улуус, куорат дьаһалталарыгар улахан махталларын бэлиэтигэр малааһын остуолун тардан кэлбит дьону күндүлээтилэр.

Ааптар: Николай Федоров

Сообщение Бүлүүгэ тыыл бэтэрээннэрэ, сэрии сылын оҕолоро саҥа дьиэ күлүүһүн туттулар появились сначала на Ulus.Media — все главные новости из районов Якутии.

Комментарии закрыты.