Балыксыт бырааһынньыга Тумат олохтоохторун сомоҕолоото

Тумат нэһилиэгэр «Лааҕыр сурда» томторго 6-с төгүлүн балыксыт бырааһынньыгын бэлиэтээри муһуннулар. Тэрээһин сыала-соруга: төрөөбүт айылҕаны харыстааһын, бултааһын, балыктааһын ньымаларын кэнчээри ыччакка тиэрдии; төрүт үгэс успуордун көрүҥүн сөргүтүү буолар.


Күн ортото олохтоохтор бырааһынньыктыы киэркэйбит томторго тоҕуорустулар. Бастакынан саха тыытынан куоталаһыы күрэҕин биллэрдилэр. Түөрт кыттааччы суруттаран, балаһыанньаны билсэн күрэххэ туруннулар. 300 миэтэрэ дистанцияҕа тыынан устууга 2 мүнүүтэ 57 сөкүүндэнэн Горохов Илья Ефремович бастакынан кэллэ (бирииһэ — балаакка); былырыыҥҥы күрэх кыайыылааҕа, 3 мүн. 00 сөк. бириэмэни көрдөрөн Слепцов Геннадий Спиридонович иккис миэстэҕэ таҕыста (бирииһэ — утуйар мөһөөччүк); үhүc бочуоттаах миэстэҕэ эдэр кыттааччы Слепцов Геннадий Радикович (3 мүн. 09 сөк.) тигистэ (бирииһэ — илим); уонна төрдүс кыттааччы 3 мүн. 12 сөк. бириэмэни көрдөрөн Слепцов Маркел Иванович кэллэ (бирииһэ — гаас горелката). Манна эбэн эттэххэ: 2009 с. Томскай Николай Ефремович; 2010 с. Слепцов Андриан Спиридонович; 2012 с. Константинов Мирон Николаевич; 2016 с. Слепцов Андриан Спиридонович; 2018 с. Слепцов Геннадий Спиридонович Тумат нэһилиэгэр саха тыытынан күрэххэ чөмпүйүөн үрдүк аатын ылбыттара.


Бырааһынньыкпыт киэргэлэ, дойдубутугар үөскүүр балыктан бүлүүдэ арааһын астааһыҥҥа «Балык минньигэс ас» диэн күрэҕэр үс кыттааччы бэлэмнэнэн кэлбиттэр. Кыттааччылар астаан аҕалбыт бүлүүдэлэрэ остуолларга арыччы батта. Бэйэлэрин билиһиннэрэн, туох астары бэлэмнээбиттэрин кэпсээн иккис түһүмэхпит саҕаланна. Сэрэбиэй түбэһиитинэн бастакынан Ульяна Егоровна Слепцова; иккис кыттааччы Валентина Спиридоновна Томская уонна үhүc кыттааччы Александра Васильевна Горохова ханнык балыктан ас тахсарын кэпсээн, бүлүүдэлэрин билиһиннэрдилэр. Манна балыктан 52 бүлүүдэни бэлэмнээн В.С. Томская  холодильник хаһаайкатынан буолла.


Иккис миэстэни 44 бүлүүдэни бэлэмнээн У.Е. Слепцова электрическай мясорубка ылла. Онтон 29 бүлүүдэлээх А.В. Горохова электроблендергэ тигистэ. Куонкурус кыттыылаахтара маанылаах остуолларын аһылыктарынан кэлбит дьону күндүлээтилэр.
Бэриллибит бириэмэҕэ күөгүлээһиҥҥэ оҕо аймах кыттан, биирдии күстэҕи хаптаран мөккүөр тахса сыста. Онтон туппут күстэхтэрин улаханын, кыратын быһааран 9-с кылаас үөрэнээччитэ Руслан Томский спиннинг хаһаайына буолла. Иккис миэстэҕэ 10-с кылаас үөрэнээччитэ Гена Слепцов илим ылан үөрүүтэ үтүмэн. Yhүc бочуоттаах миэстэҕэ тахсан «селфи монопод» хаһаайынынан 4 кылаас үөрэнээччитэ Богдан Горохов буолла.
Ол кэнниттэн саха тыытыгар муҥутуур күрэххэ үс тыы киирсэн Горохов Илья Ефремович син биир иннин биэрбэтэ.


Бырааһынньыкпытын чааһынай урбаанньыт Сардаана Томская сүүйүүлээх лотереята киэргэттэ. Манна билиэт ылбыт дьон бары илии тутуурдаах бардылар. Кылаабынай бириис ыскаап Валентина Васильевна Протодьяконоваҕа түбэстэ. Сардаана Семеновнаҕа Семен Дьяконов аатынан культура дьиэтин үлэһиттэрин ааттарыттан махталбытын тиэрдэбит.
Онтон киэһэ айылҕаҕа кэнсиэр-дискотекаҕа кыттыыны ыллылар: «Кэскил» үҥкүү бөлөҕө, ыраах Тюмень куораттан кэлэ сылдьар ыалдьыппыт Виталий Наумов (бэйэтин гармошкатынан уостан туспэт нууччалыы ырыаларынан олохтоохтору эҕэрдэлээтэ), уонна биһиги киэҥ туттар оҕолорбут «Тумат» вокально-инструментальнай ансаамбыллара (салайааччы Н.И.Слепцов). Кыттааччылар араас үнкүү-битии ырыаларынан бар дьону астыннардылар.

Кэнсиэр кэнниттэн бырааһынньыктааҕы салют халлааны биир гына сырдатта. Маннык сырдык дууһалаах, чөл олоҕу тутуһан бары бииргэ буолбуппут Сомоҕолоһуу сылыгар бэлиэ түгэнинэн буолла. Бырааһынньыкка кыттыыны ылбыт, тэрийсибит дьоммутугар, бириистэринэн көмөлөспүт олохтоох дьаһалта баһылыгар Гаврил Владимирович Слепцовка; лотереяны оонньотон, шашлык, итии чэйинэн күндүлээн сынньалаҥ бүтүөр диэри бииргэ сылдьыспыт Сардаана Семеновна Томскаяҕа ис сүрэхпититтэн махтанабыт, — диэн Балыксыт күнүн тэрийээччилэрэ дириҥ махталларын тиэрдэллэр.

Ааптар: Андриан ГОРОХОВ

Сообщение Балыксыт бырааһынньыга Тумат олохтоохторун сомоҕолоото появились сначала на Ulus.Media — все главные новости из районов Якутии.

Комментарии закрыты.