Билгэһит Алексей Нестерев куһаҕана суох дьыл буолуо диэн сабаҕалыыр

Амма улууһун кыраайы үөрэтээччитэ Алексей Нестерев кырдьаҕас эһэтиттэн үөрэнэн күнү-дьылы билгэлии үөрэммитэ.


Бөтүҥ нэһилиэгин олохтооҕо Алексей Михайлович Нестерев күнү-дьылы билгэлиири кырдьаҕас эһэтиттэн үөрэнэн, кинини кытта элбэхтэ кэпсэтэн үөрэппитэ. Ону сэргэ өрөспүүбүлүкэ да атын “сир түннүктэрэ” диэн ааттанар ытык дьонун кинигэлэрин ааҕан, бэйэтэ эмиэ сурунан хайдах дьыл буоларын куруутун да сабаҕалыыр.


“Быйыл дьикти дьыл буолаары гынна дии саныыбын. Тыалыран, эрдэ баҕайы ириэрэн, онтон тоҥорон уутун көтүттэ. Муус устар 7 күнүгэр, билгэ күнүгэр сарсыардаттан былыттаах эрээри, күн көрөн ылара. Ити күн ириэрэн олус сылаас күн буолбута. Онон сылыктаатахха, наһаа куһаҕана суох дьыл буолуо. Уу кэлиитин туһунан этэр буоллахха, биир билгэнэн, кулун тутар саҥатыгар күөлгэ саҥа ойбону аллардахха, уута аһары тааҥныыра уу угуттаах дьыл буоларын кэрэһэлиир. Быйыл уу аһары улаханнык кэлбэккэ, эбэбит этэҥҥэ ааһыа диэн сабаҕалыыбын. Чурапчы улууһун Хадаар нэһилиэгин Кондратьев диэн кырдьаҕаһа, бөлүһүөгэ суруйбут кинигэтигэр 160 сылы 40 сыл гына арааран билгэлиир. Ол аата 2005 сылтан 2045 сылга диэри уу сут кэллэ диэн быһаарар. Ол иһигэр син биир барыта уу сута буолбат. Курааннаах, уйгулаах уонна үксэ уулаах-хаардаах дьыллар буолаллар диэн суруйар. Онон да түмүктээн эттэххэ, аһары кураан дьыл буолбата буолуо диэххэ сөп”, – диэн этэр Алексей Михайлович.

Ааптар: “Амма олоҕо” хаһыат

Комментарии закрыты.