Бөҕөстөрбүт дьарыктарын тохтоппоттор

Бу күннэргэ Кисловодскайга Россия тустууктарын үөрэтэр-эрчийэр түмсүүлэрэ үгэннээн буола турар. Манна Дагестан, Бурятия уонна Саха сирин бөҕөстөрө бииргэ эрчиллэллэр.

 

Үөрэтэр-эрчийэр түмсүүгэ Саха сириттэн тренердэр Александр Оконешников, Иван Дмитриев, Осип Михайлов салалталарынан тустууктар Михаил Иванов, Арыйаан Тютрин, Петр Константинов, Георгий Окороков, Федор Постников, Егор Потапов, Ньургун Александров, Петр Павлов, Айсен Потапов сылдьаллар.

Саха сирин көҥүл тустууга сүүмэрдэммит хамаандатын кылаабынай тренерэ Александр Оконешниковтан туоһулаһан билбиппит, билигин Кисловодскайга сборга уопсайа, сэттэ уонча бөҕөс анал былаан быһыытынан эрчиллэ сылдьар эбит.

Дьарыгы солбуйса сылдьан дьуһуурустубанан ыытабыт, — диир Александр Савельевич. – Тустууктар нэдиэлэҕэ иккитэ кросс сүүрэллэр. Онтон атын күннэргэ көбүөргэ эрчиллии, тренажернай саалаҕа күүһү-уоҕу хачайдааһын уонна регбол оонньуу… 

Утуйар, аһыыр усулуобуйа барыта үчүгэй. Хосторго иккилии буолан сыталлар. Аһылык – шведскэй остуол. Короновирус аймалҕана манна суох. База таһыгар, куоракка эҥин тахсыбаппыт. Кисловодскайга муус устар ыйга диэри эрчиллэбит, — диэн кылгастык билиһиннэрдэ.

Эмиэ бу күннэргэ бөҕөстөрбүт иккис бөлөхтөрө: Тимур Николаев, Герман Устинов, Ньургун Сергин, Дмитрий Аксенов, тренер Егор Пономарев баһылыктаах Красноярскайга, анал үөрэтэр-эрчийэр түмсүүгэ сылдьар.

Бары болҕомто, бэлэмнэнии – Россия чемпионатыгар ситиһиилээхтик кыттыыга ууруллар. Чемпионат былаан быһыытынан муус устар бүтүүтэ Улан-Удэ куоракка ыытыллыахтаах этэ да, короновирус ыарыынан сибээстээн биллибэт болдьоххо көһөрүлүннэ. Ол да буоллар, бөҕөстөр былааннаах үлэлэрин тохтоппокко, тиритэ-хорута дьарыктаналлар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *