Бөһүөлэги тупсарыыга Муома тэрилтэлэрэ холобур буолаллар

Сонуну тарҕатар ситимнэртэн биллэххэ, киин эрэгийиэннэргэ, өрөспүүбүлүкэҕэ даҕаны олорор-үлэлиир сири тупсарыыга тустаах тэрилтэлэр ылсыһаллара кэҥээтэр кэҥээн иһэр. Маннык хамсааһын биһиэхэ хаһыс үйэҕэ кэлэрэ буоллар диэн Муома олохтоохторо таайа сырыттахтарына, харахтарын далын иһигэр кыраһыабай көстүүлээх тутуулар – оҥоһуктар эмискэ киирэн кэллилэр.


Оттон тэрилтэ бэйэтин территориятын киһи дуоһуйуор диэри чороон курдук чочуонайдык оҥорбут салайааччынан ОДьКХ ГУП Муоматааҕы филиалын дириэктэрэ Д. В. Аммосов буолар.

Дмитрий Викторович Аммосов Муоматааҕы филиалга үлэҕэ анаммыт маҥнайгы күнүттэн тэрилтэ иһин-таһын тосту уларыттахха табыллар диэн туох да иһин булгуруйбат санааны ылбыта. Өбүгэлэрбит «ыал тэлгэһэттэн көстөр» диэн мээнэҕэ этиэхтэрэ дуо, оттон дьип-дьап тиэргэннээх киһи дьиэтин ис көстүүтэ да куту-сүрү тохтоторо чуолкай. Эдэр салайааччы билбэтэ кэлиэ дуо – үлэ миэстэтэ эстетикалаах уонна табыгастаах усулуобуйалаах эрэ буоллаҕына эбээһинэстээх үлэ-хамнас ордук таһаарыылаах буоларын «дугдуруй да оҕус» диэбиттии, туруоруллубут сорук олус хаачыстыбалаахтык толоруллан, Хонууга биир кыраһыабай миэстэ үөскүү оҕуста. Тэрилтэ иһэ, нууччалаатахха, «как в лучших домах Лондона» буолла. Тиэргэн сибэкки оранжереятыгар кубулуйда, аны туран түһээн да көрбөтөх фонтаммыт күн уотугар алмаас кыырпахтарын ыһар.

Маннык кэрэ көстүүлээх тэрилтэ үлэтэ да көхтөөх. Оруобуна болдьоммут күнүгэр мүнүүтэ да ааспакка атырдьах ыйын 28-гар оройуон үрдүнэн сылытыы бэриллэн, билигин олохтоохтор, омуннаан эттэххэ, Африкаҕа курдук итиигэ олороллор. Дмитрий Аммосовка сүөгэй сүмэлээх махтал тылларын тиэрдэбит.

Аны биир үчүгэй көстүүлээх тэрилтэнэн «Арктика суоллара» Муоматааҕы учаастага буолла. Бэһис сылын үлэлиир эдэр салайааччы К. К. Терешкин үлэтин сып-сылбырҕатык толорорун таһынан, аны бөһүөлэк иһин тупсарыы диэки хайыста. Урукку «Муома-Ас» тэрилтэ территорията бөҕүнэн-сыыһынан туолан турара туох үчүгэйдээх буолуоҕай. Онуоха эбии хочуол оһохторун, массыына араамаларын, о. д. а. санаатыҥ да санныгар сүппэккин – тиэхиньикэ наада. «Арктика суоллара» биир үтүө күн мунньахтаан баран быһаарыы ылар, сүүс бырыһыан куолаһынан бөҕү ыраастыахха, сыбаалкаҕа тиэйиэххэ, оҕо оонньуур былаһааккатын оҥоруохха диэн.

Сэниэлээх уолаттар үлэ кэнниттэн өрөбүлгэ кэлэннэр хайа саҕа тиэхиньикэ эргэ араамаларын кум-хам туталлар, кузовка тамныыллар. Ити түмүгэр 11 массыына тиэйиллэр. Дьэ былаһаакканы оҥоруохха дэһэллэр эр бэртэрэ. Аны туран матырыйаал хантан муох курдук элбиэҕэй. Үөһэ кэпсээбит Аммосовпыт Константин Терешкин көрдөһүүтүгэр турбалары, оттон нэһилиэк баһылыга Александр Андреев олбуоргутугар туттуҥ диэн тимир эрэһээҥкэлэри биэрэллэр, РЭС начальнига Иван Олейников уоту-күүһү холбуур.  Ый кэриҥинэн былаһаакка  бүтэр, эбиитин 21х15 кв. м иэннээх футбол хонуута оҥоһуллар. Былаһаакка хачыаллардаах, сыырдаах, турниктаах, о. д. а. элбэхтэр. Үөрүүлээх арыйыыны кэтэспэккэ оҕолор барахсаттар номнуо футболлаан, хачыаллаан, сүүрэн-көтөн, үөрүүнү кытта эттэрин-хааннарын эрчийэн абыраннылар.

Константин Терешкинтан аҕыйах киһини ааттаа диэбиппэр «барыларын суруй, хайдах эмит гынан батара сатаа» диэн көрдөстө. Идеятын олоххо киллэрбит киһиэхэ туох диэн ааккаастыахпыный. Кинилэр бу бааллар: сварщик Алексей Оконешников, үлэһиттэр Владимир Корякин, Станислав Жирков, Роман Черницын, Алексей Соркомов, Айаал Егоров, Геннадий Варламов, Анатолий Слепцов уонна Христофор Атласов. Хоһуун дьоҥҥо аламаҕай санаалаах суол хаһаайыстыбатын үлэһиттэригэр махтанабыт уонна  эһиги холобургутун атыттар да ылыахтара диэн күүстээх эрэлбитин этэбит.

Ааптар: Афанасий ИВАНОВ

Сообщение Бөһүөлэги тупсарыыга Муома тэрилтэлэрэ холобур буолаллар появились сначала на Ulus.Media — все главные новости из районов Якутии.

Комментарии закрыты.