Бокс: Михаил Варламов чемпионаты кыайыынан саҕалаата

Дьэ, өр күүппүт күрэхтэһиибит бүгүҥҥүттэн саҕаланна. Самара куорат “Арена” универсальнай комплексыгар туруоруллубут икки рингэҕэ Россия боксаҕа чемпионатын киирсиилэрэ саҕаланнылар. Бэҕэһээ мандат хамыыһыйата үлэлээтэ. Кыттааччылар ыйааһыннаныыны уонна сэрэбиэйи аастылар. Ол быһыытынан, уон ыйааһыҥҥа 299 боксер күөн көрсөр буолла. Финаллар сэтинньи 16 күнүгэр буолуохтара.

 

Эрдэ иһитиннэрбиппит курдук, Россия быйылгы чемпионатыгар Саха сирин боксаҕа оскуолатын сэттэ иитиллээччитэ көмүскүүр: 49 кг – Ян Максимов, Михаил Прокопьев, Борис Сидоров, 52 кг – Василий Егоров, Николай Григорьев, 57 кг – Михаил Варламов, 63 кг – Петр Васильев.

Сэрэбиэй быһыытынан, Ян Максимов – Дамир Сагатуллины (Челябинскай), Михаил Прокопьев – Альберт Низаевы (Башкортостан), Борис Сидоров – Вадим Сагдиевы (Пермь), Василий Егоров – Мерген-Херел Болат-оолу (Новосибирск-Тыва), Николай Григорьев – Аскер Тамбиевы (КЧР), Михаил Варламов – Ай-Демир Уржанайы (Тыва), оттон Петр Васильев – Олег Мухины (Карелия) кытта киирсэллэр.

Кинилэртэн рингэҕэ бастакынан Михаил Варламов таҕыста. Кыһыл муннуктан кыттыбыт Михаил тэҥ киирсиигэ, судьуйалар ааҕыыларынан очукуонан кыайыыны ситистэ. Онон саҕалааһын үчүгэй диэххэ сөп.

Биллэн турар, бу чемпионакка биһиги саамай улахан эрэлбитинэн – Россия үс, Европа икки төгүллээх чемпиона, аан дойду чемпионатын үрүҥ көмүс призера, спорт үтүөлээх маастара Василий Егоров буолар.

Биһиги боксаҕа ССРС спордун маастара, СР үтүөлээх тренерэ, Бүтүн Россиятааҕы категориялаах судьуйа Александр Афанасьевич Тыасытовтан  киилэҕэ сэрэбиэйи уонна киирсиилэр быһа холуйан хайдах буолуохтарын туһунан сурастыбыт.

-Ыйааһыннарыгар отут боксер баар, икки киһи сынньанар. Ол аата, 28 боксер, 14 паара бастакы күн киирсэр. 16 киһи финал 8/1 хаалар, онтон финал чиэппэрэ, финал аҥаара уонна финал. Коля Григорьев уонна Вася Егоров атын-атын бөлөхтөргө түбэстилэр. Ким чопчу саамай күүстээх утарылаһааччы буоларын этэр кыах суох. Ол гынан баран, Вася биир күүстээх утарылаһаччыта Вадим Кудряковы (Крым) финал аҥаарыгар диэри көрсүбэт. Ол эрээри, саҥа ааттарга элбэх күүстээх боксердар бааллара саарбаҕа суох.

Николай Григорьев кыттар бөлөҕөр бурят Батор Сагалуев, Башкортостан Иван Абрамов, Удмуртияттан Кирилл Никифоров уо.д.а. балайда биллэр боксердар бааллар. Киирсиилэр саҕаланнахтарына, ону көрөн ким күүстээҕин сылыктыахпыт. Бары күүстээхтэр. Онон долгуйа күүтэбит эрэ, уолаттарбыт чемпионаты ситиһиилээхтик саҕалыылларын.

Чемпионат саҕаланна. Россия чемпионатын сонуннарын, уолаттарбыт хайдах киирсибиттэрин, экспертэр санааларын биһиги сайтпытыгар кэтии сылдьаргытыгар сүбэлиибит.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *