Болтоҥо нэһилиэгэр Кэриэстэбил күнүгэр пааматынньык туруордулар

Чурапчы улууһугар хоту көһөрүллүү сиэртибэлэригэр анаммыт Кэриэстэбил күнүгэр араас тэрээһиннэр буолуталаатылар. Болтоҥо нэһилиэгэр Аҕа дойду  Улуу сэриитин кыттыылаахтарыгар уонна көһөрүллүүгэ барбыт биир дойдулаахтарга анаан пааматынньык туруорулунна.


Болтоҥо нэһилиэгин иһинэн үлэлиир „Утум“ СО НКО (бэрэсэдээтэл М. И. Егорова) Саха Өрөспүүбүлүкэтин Ил Дархан граныгар  бырайыак суруйан, көмүскээн, 492,8 тыһ. солк. ылбыта. Олохтоох дьаһалта 314,7 тыһ. солк. утары үбүлээн пааматынньык оҥоһулунна.

Пааматынньыгы арыйыыга нэһилиэк олохтоохторо кырдьаҕаһыттан оҕотугар тиийэ муһунна. Бу ыарахан кэмнэргэ Аҕа дойдуларын көмүскээбит, хоту көһөрүллүбүт дьону кэриэстээн миитин ыытылынна. Өйдөөн-санаан, чиэстээн биир мүнүүтэ чуумпуран турдулар. Бүтүн Россия үрдүнэн ыытыллар „Вахта памяти“ хамсааһыҥҥа кыттыһан мас олортулар. Оҕолорго эстафета  ыытылынна, хоһоон ааҕыыта,  оскуолаҕа кылаас чаастара буоллулар. Нэһилиэк дьокутааттара, олохтоох дьаһалта үлэһиттэрэ хоту көһөрүллүүгэ сылдьыбыттарга дьиэлэригэр сылдьан кэпсэтэн, кыһалҕаларын билистилэр.

Болтоҥо нэһилиэгин 4 колхуоһуттан барыта 435 киһи Кэбээйигэ, Эдьигээн, Булуҥ оройуоннарыгар көһөрүллүүгэ сылдьыбыта. „Кыым“ колхуостан—126, „Кыһыл сиэмэ“ колхуостан—135, „Куйбышев“ колхуостан—120, „Кыһыл үүнүү“ колхуостан—54 киһи. Кинилэртэн дойдуларыгар 307 киһи эргиллибитэ. 128  киһи хоргуйан, ыалдьан өлбүтэ. Күн бүгүн кинилэртэн 4 бэтэрээммит баар, өй-санаа өттүнэн күүс-көмө буолаллар.

Нэһилиэкпит дьоно-сэргэтэ Аҕа дойду сэриитигэр кыттыбыттары, хоту көһөрүллүүгэ сылдьыбыттары кэриэстииллэр—Туох да умнуллубат, ким да умнуллубат!

Ааптар: Л. ЕФРЕМОВА.

Сообщение Болтоҥо нэһилиэгэр Кэриэстэбил күнүгэр пааматынньык туруордулар появились сначала на Ulus.Media — все главные новости из районов Якутии.

Комментарии закрыты.