Бурятияҕа, Власко турнирыгар сахалартан кимнээх кытталларый?

Бу өрөбүллэргэ, ахсынньы 2-3 күннэригэр Бурятия киин куоратыгар Улан-Удэҕэ эдэрдэргэ Европа күрэхтэһиитин икки төгүллээх кыайыылааҕа, Россия Кубогын хаһаайына, норуоттар икки ардыларынааҕы кылаастаах спорт маастара Юрий Власко кэриэһигэр 23-гэр диэри саастаах спортсменнарга көҥүл тустууга норуоттар икки ардыларынааҕы иккис турнир ыытыллар.

 

 

 

Бу күрэхтэһиигэ Саха Республикатын ыччаттарга сүүмэрдэммит хамаандатын кылаабынай тренерэ Станислав Захаров салалтатынан уонча уолбут кыттыаҕа. Ол курдук, Алексей Копылов, Харысхал Григорьев, Айаал Белолюбскай, Олег Фомин тренердэрэ Станислав Афанасьевиһы кытта Бурятияҕа үнүрүүн тиийбиттэрэ.

Өссө бөҕөстөр: Петр Константинов, Дьулус Федотов, Яков Павлов, Владислав Кривошапкин, Револий Самсонов, Айсен Потапов, Петр Кириллин, Константин Капрынов тиийэллэрэ былааннанар. Санатан эттэххэ, бу иннинэ кэккэ бөҕөстөрбүт Казахстаҥҥа, Динмухамед Кунаев аатынан норуоттар икки ардыларынааҕы турнирга кыттыыны ылбыттара. Онно Айтал Захаров (61 кг) уонна Револий Самсонов (70 кг) иккис, Петр Константинов (57 кг) үһүс миэстэлэри ылбыттарын санатар тоҕоостоох.

Эдэр сааһыгар хомолтолоохтук өлбүт Юрий Власко кэриэһигэр турнирга кыайыылаахтар, иккис-үһүс миэстэлэммиттэр уонна бастыҥ тренердэр сыаналаах бириистэринэн наҕараадаланыахтара. Ол курдук, бастакы миэстэни ылбыт бөҕөс 20 тыһ. солк., кини тренерэ 10 тыһ. солк. наҕараадаланыаҕа. Ити курдук, иккис-үһүс миэстэлэри ылбыт бөҕөстөр туһааннааҕынан – 14 уонна 8 тыһ. солк. харчынан бэлиэтэниэхтэрэ.

Эдэр бөҕөстөрбүтүгэр ситиһиилэри баҕарыахха!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *