Бэлиэ түгэн. Улуу тренер сырдык аата чиэстээхтик үйэтитиллэр

Бүгүн, балаҕан ыйын 5 күнүгэр – биллиилээх тренер, педагог, Саха АССР оскуолаларын үтүөлээх учуутала, Саха АССР, РСФСР уонна ССРС үтүөлээх тренерэ, Бочуот Знага, Октябрьскай революция орденнар кавалердара – Дмитрий Петрович Коркин төрөөбүтэ 91 сылын туолла.

 Дмитрий Петрович 1928 с. балаҕан ыйын 5 күнүгэр Чурапчы оройуонун Кытаанах нэһилиэгэр төрөөбүтэ. Аҕата Коркин Петр Кириллович, ийэтэ Мария Андреевна эрдэ өлөннөр, үс оҕо тулаайах хаалаллар. Алта саастаах Диманы Лазаревтар дьиэ кэргэн иитэ ылар. Сотору сэрии саҕаланан, Чурапчы колхуостара хоту көһөрүллэллэр, Лазаревтар Булуҥҥа бараллар.

 Дмитрий Булуҥ оройуонун Бороҕон нэһилиэгин сэттэ кылаастаах оскуолатын ситиһиилээхтик үөрэнэн бүтэрэр, оскуолаҕа үөрэнэр кэмигэр гимнастиканан утумнаахтык дьарыктанар. Салгыы Дьокуускай куорат 2 №-дээх оскуолатыгар спортивнай секцияларга дьарыктанар, ГТО-ҕа куорат үс төгүллээх кыайыылааҕа буолар.

 1952-1956 cc. Ленинградтааҕы Герцен аатынан педагогическай институкка үөрэнэр. Биир сыл көҥүл тустуунан уонна самбонан дьарыктанан, бастакы разряд нуормаларын толорор, кэлин Ленинград чемпиона, “Буревестник” ДСО күрэхтэһиитин иккис призера буолар.

 Дойдутугар эргиллэн кэлэн, Одьулуун сэттэ кылаастаах оскуолатыгар завуһунан, нуучча тылын уонна литературатын учууталынан үлэлиир. Оройуон киинигэр Чурапчыга тустуу секциятын тэрийэр, 12 биэрэстэлээх сиргэ нэдиэлэҕэ үстэ сатыы кырынан – оҕолору  эрчийэр. Түөрт сыл буолан баран, тустууга таптала букатыннаахтык баһыйан, Чурапчыга көһөн киирэр уонна олоҕун сүрүн сыалын – оҕо спортивнай оскуолатын тэрийиигэ утумнаах, өр сыллаах үлэтин саҕалыыр.

 Кураанах миэстэҕэ эрчийэр оҕолору кытта үс саалалаах спорт корпуһун тутан таһаарар, тустууга сөп түбэһэр спортивнай тренажердары оҥотторор. Эрчийии бастыҥ методтарыгар олоҕурбут спортивнай уһаарыллыыны барбыт Коркин үөрэнээччилэрэ сотору кэминэн үрдүк чыпчааллары дабайан бараллар. Ол курдук, 1965 с. Вячеслав Карпов саха спортсменнарыттан бастакынан ССРС оҕолорго чемпиона буолар, 1969 с. оҕолорго аан дойду чемпионатыгар Илларион Федосеев бастакы, Семен Макаров үһүс буолаллар, 1967 c. Николай Захаров Польшаҕа буолбут “Олимпийскай эрэллэр” күрэхтэһиилэригэр кыайыылааҕынан тахсар. 1969 c. ССРС чемпионатыгар Роман Дмитриев чемпионнуур, Гавриил Дмитриев уонна Николай Захаров иккис миэстэлэнэллэр. 1972 с. Мюнхеҥҥа буолбут ХХ Олимпиадаҕа Роман Дмитриев чемпион үрдүк аатын ылан, тренерин үөрдэр-көтүтэр.

 Чурапчы оскуолатыттан 175 – ССРС спордун маастара, 12 – норуоттар икки ардыларынааҕы кылаастаах спорт маастара, 4 – ССРС спордун үтүөлээх маастара иитиллэн тахсыбыта.

 Ол гынан баран, Дмитрий Петрович тренер быһыытынан сулустаах чааһа 1976 с. буолбута. Кини үөрэнээччилэрэ Роман Дмитриев, Павел Пинигин уонна Александр Иванов Монреальга буолбут XXI Олимпиадаҕа ситиһиилээхтик кыттан, спорт эйгэтигэр дьоһун кылааты киллэрэллэр.

 1977 с. Д.П. Коркин Дьокуускайга көһөн кэлэн Үрдүкү спортивнай маастарыстыба оскуолатын уонна Саха сирин хамаандатын сүрүн тренердэринэн ананар.

 Дмитрий Петрович Коркин 1984 c. олунньу 22 күнүгэр Дьокуускайга өлбүтэ. Көмүс уҥуоҕа төрөөбүт дойдутугар – Чурапчыга кистэммитэ.

 Улуу тренер Д.П. Коркин үтүө, сырдык аата сиэрдээхтик үйэтитиллэр. Ол курдук, кини аатын Чурапчытааҕы оҕо спортивнай интернат-оскуолата чиэстээхтик сүгэр. Дмитрий Петрович ыра санаатын толорон, 1999 с. Чурапчыга – Физическэй култуура уонна спорт института аһыллыбыта. Улуу тренер, педагог Дмитрий Петрович Коркин аатынан Саха Республикатын физическэй култуураҕа уонна спорка эйгэтигэр Государственнай бириэмийэтэ олохтоммута, сыллата көҥүл тустууга кини кэриэһигэр норуоттар икки ардыларынааҕы турнир ыытыллар…

 Бэчээккэ бэлэмнээтэ Петр ПАВЛОВ.          

 

  

Добавить комментарий

Ваш адрес email не будет опубликован. Обязательные поля помечены *