Бэрдьигэстээх кыргыттарын айар холбоһуга үтүө түмүктэрдээх

Кинилэр араас өҥнөөх кыраасканы дьүөрэлээн, киистэнэн имигэстик туттан дьикти алыптаах хартыынаны холустаҕа уруһуйдууллар. Уһун субурхай матырыйаалтан хараххар ойуулаан көрөр былааччыйаҕын тигэллэр.  Айталина Никифорованы уонна Венера Романованы айылҕаттан бэриллибит талааннара айымньылаахтык бииргэ үлэлииргэ сомоҕолообут. Кыргыттар иккиэн уруһуйдуулларынан, иистэнэллэринэн Горнай улууһугар биллэллэр.


Айталина Никифорова Мэҥэ-Хаҥалас улууһуттан төрүттээх, идэтинэн художник-модельер, Бэрдьигэстээххэ кийииттээн кэлбитэ номнуо бэһис сыла. Венера Романова төрүт Бэрдьигэстээх кыыһа, модельер-конструктор.

Кыргыттар ийэлээх аҕалара иистэнэр, уруһуйдуур, уһанар талааннаах дьон. Айталина ийэтэ иис абылаҥар кыыһын үөрэтэн-такайан улаатыннарбыт, оттон Венера аҕата уһанарын, уруһуйдуурун көрөн улаатан, киниттэн элбэххэ үөрэнэн, билигин сөбүлүүр дьарыгынан дьарыктанар.

Ыал буолан, оҕолонон олорон, иистэнэр баҕа тэһэ кэйиэлээн, бастаан кыыспар таҥас тигэн саҕалаабытым, ону тэҥэ балтыларбар, бырааттарбар. Дьэ, онтон кыра-кыралаан сакаас ылан тигиэххэ сөп эбит диэн санаа үөскээбитэ уонна 2016 сыллаахха күһүнүгэр  урбаанньыт буолбутум, — диир Айталина.

Бэйэтин идэтинэн, талаанынан эрэ муҥурдаммакка, аныгы киһи сиэринэн, эбии хасыһан, “Бизнес-школа” ыытар араас маастар-кылаастарыгар билиитин хаҥатынар, иистэнньэҥ Наталья Прокопьевна Михайловаҕа үөрэнэр. Ити курдук сахалыы былааччыйаттан саҕалаан халтаҥ соннорго, бэргэһэлэргэ, түүлээххэ кытта ылсыһан тигэр.

Венера кыра эрдэҕиттэн уруһуйдуур. Мэтириэт ордук табыллан тахсар. Дьүөгэтэ сакаастыаҕыттан ыла, дьон бэйэ-бэйэлэриттэн истиһэн үбүлүөйдэргэ, сыбаайбаларга, төрөөбүт күннэргэ кэрэ бэлэх гынан биэрэллэр.

2017 с. сааһыгар оҕолорго аналлаах айар күрэскэ худуоһунньуктар холбоһуктарыттан Венера, оттон Айталина иистэнньэҥнэр холбоһуктарыттан  дьүүллүүр сүбэҕэ көрсөн, билсэн, кыргыттар интэриэстэрэ биир ситими үөскэтэн, сайын ыһыах кэмиттэн айар холбоһук буолбуттара.

Айталиналаах Венера дьон-сэргэ махталын ылан кынаттанан, бу от ыйыттан холустаҕа, таҥаска, үрэх тааһыгар уруһуйдуурга оҕолорго, улахан дьоҥҥо уонча маастар-кылаастары ыыттылар. Дьарыкка сөбүлүүр ырыаларын холбууллар, киһи ис иһиттэн арыллан, табыгастаахтык үлэлиир услуобуйатын  олохтууллар. Хаһан да киистэни тутан көрбөтөх дьон, бэйэлэрин үлэлэриттэн олус астынан, үөрэн-көтөн  бараллар. Симик да оҕолор иккистээн кэлэллэригэр арыллан, ыллаан-туойан дуоһуйа сынньаналлар уонна бэйэлэрин лайфхактарыгар кыргыттары эмиэ үөрэтэллэр эбит, онон икки өтүттэн туһалаах үлэ тахсар. Билигин “FASHION ПОРТРЕТ” аҕыс саастарыттан үөһэ саастаах кыргыттарга биир ыйдаах курс оҥордулар. Көннөрү мэтириэттэн “FASHION портрет” уратыта диэн уһун моойу, нарын сирэй ньолбуһаҕын, иэдэһин уҥуоҕун кэрэ сэбэрэлээн уруһуйдааһын, онно эбии уоһу улаатыннарыахха, хараҕы чопчулаан биэриэххэ сөп. Оҕолор манна араас өҥнөрү булкуйан биир өҥү таһаарарга, ис санааны тириэрдэргэ, тушь, акварель, маркер курдук матырыйаалларынан сөпкө туһанарга үөрэниэхтэрэ.

Инникитин лейбллаах, логотиптаах ураты истииллээх таҥас тигэн атыылыахпытын баҕарабыт. Баҕа санаа олус элбэх, ардыгар киһи толкуйдаан утуйбат даҕаны кэмнэрэ баар буолааччылар,” – диэн кыргыттар ыра санааларын кыратык сэгэтэн үллэстэллэр.

Ааптар: Юлиана Макарова

Сообщение Бэрдьигэстээх кыргыттарын айар холбоһуга үтүө түмүктэрдээх появились сначала на Ulus.Media – все главные новости из районов Якутии.

Комментарии закрыты.