Бэргэн ытааччы Миша Аржаков 4 кыһыл көмүс мэтээли аҕалла

Улан Удэ куоратыгар Илин Уһук федеральнай уокурук буулдьанан ытыыга күрэхтэһиитэ түмүктэннэ. Дойду үрдүнэн бүрүүкээбит коронавирус содулуттан күрэхтэһиини бобуу, түөрт улахан эрэгийиэн ыспарсымыаннара номнуо ытыыларын саҕалаан саамай “уоттарыгар” турар кэмнэригэр биллэриллибитэ. Ол да иһин буолуо, күрэхтэһиини тохтоппокко салгыы ыыталларыгар көҥүл биэрбиттэрэ. Кыайыы иһин Саха сирин, Сахалин, Иркутскай уонна Бурятия күүстээх ытааччылара күөн көрүстүлэр.

Бу улахан күрэхтэһиигэ, Василий Яковлев аатынан Кытаанах орто оскуолатын 9-с кылааһын үөрэнээччитэ, улуустааҕы оҕо успуорка оскуолатын филиалын итиэннэ үтүөлээх тириэньэр Николай Смирников иитиллээччитэ Миша Аржаков, Саха сирин сүрүн хамаандатыгар киирэн 4 көрүҥҥэ кыттан түөрт кыһыл көмүс мэтээл хаһаайынынан буолла.

“Мин иитиллээччилэрбиттэн Миша, төрдүс киһинэн Илин Уһук уокурукка чөмпүйүөн буолла. Кини иннинэ Николай Миронов бистэлиэтинэн ытыыга икки төгүл бастаабыта. Миша убайа Роман Аржаков оҕолорго иккис миэстэ буолбута уонна улахан дьоҥҥо чөмпүйүөннээбитэ. Биир төгүл Доржукай Монгуш чөмпүйүөн үрдүк аатын сүкпүтэ. Миша олус кыһалымтыа ыспарсымыан, былырыын сыаналаах “Вальтер 400JG” сааны бэйэлэрэ атыыласпыттара. Ону таһынан успуонсардар көмөлөрүнэн 85 тыһ. сууммалаах кэриэйдэр ытыыга кэтэр көстүүмнэрин сакаастаан тиктэрэн ылан биэрбиппит”, — диэн улууспут ытыктанар тириэньэрэ Николай Федорович кэпсиир.

Миша маҥнай ВП 40+40 (уоллаах кыыс пааралаһан 40-нуута ыталлар, онтон биэс бастакы паара тахсан атын формуланан (10+10+10+2+2+2) бириистээх миэстэлэри былдьаһаллар. Бу көрүҥҥэ кини Катя Алексеева диэн Дьокуускай куорат кыыһын кытары ытаннар, бастакы миэстэ буолары ситиһэллэр.

Иккис көрүҥүнэн ВП-60 буолла. Бу көрүҥҥэ арыый атын формуланан ыттылар. Ол курдук, талан ылыыга (отбор) кыттааччылары барыларын 40-нуута ыттардылар. Онно очукуону дэһээтэйдээбэккэ, сыалайынан аахтылар. Манна биһиги Мишабыт 392 очкуону ылан, утарылаһааччыларын лаппа куоһаран кыайыылаах буолла (маастар нуормата 395 очукуо).

Ити кэнниттэн квалификация диэн ааттанар иккис түһүмэххэ 24 бастыҥ көрдөрүүлээх ыспарсымыаннар 60-нуу ытыыны оҥордулар. Манна Миша 611,7 очукуону ылан эмиэ эрэллээхтик бастаата (маастар нуормата 615 очукуо).

Быһаарыылаах үһүс түһүмэххэ (финалга) 8 бастыҥ ытааччы анал формуланан күрэхтэстилэр. Манна даҕаны Миша кими да иннгэр түһэрбэккэ, Илин Уһук федеральнай уокурук чөмпүйүөнэ буолла.

Ол кэннэ урут хаһан да ытан көрбөтөх кыра калибрдаах, эриллиилээх саанан (тозовканан) үс балаһыанньаттан (тобуктаан олорон, сытан уонна олорон эрэ 20-тэ ытыыга) тэрийээччилэр көрдөһүүлэринэн кыттан, Миша 551 очукуону ылан арыттаахтык бастаата. Онтон аны МВ-60 көрүҥҥэ (тозовка саанан сытан эрэ 60-на ытыыга) иккис миэстэ буолбут ытааччыны 1,8 очукуонан баһыйан эмиэ бастакы миэстэ буолары ситистэ.

Онон Михаил Аржаков Илин Уһук федеральнай уокурук 21 саастарыгар диэри бэргэн ытааччылар күрэхтэһиилэригэр буулдьанан ытыыга 4 төгүл чөмпүйүөннээбитинэн бэйэтин, тириэньэрин Николай Смирниковы, Кытаанах нэһилиэгин олохтоохторун, улуустааҕы оҕо успуорка оскуолатын дириэктэрэ Яков Оконешниковы итиитик-истиҥник эҕэрдэлиибит. Өссө даҕаны үрдүк ситиһиилэри баҕарабыт.

Сэмэн ЖЕНДРИНСКЭЙ.

Чурапчы.

 

 

Добавить комментарий

Ваш адрес email не будет опубликован. Обязательные поля помечены *