Чемпионаты бастакынан Ньургун Скрябин саҕалыыр

Дьэ, бүгүҥҥүттэн, олунньу 14 күнүттэн Италия киин куоратыгар Римҥэ көҥүл тустууга Европа чемпионата саҕаланар. Бэҕэһээ киэһээ ыйааһыннарга барыларыгар сэрэбиэй ыытылынна. Бырагыраама быһыытынан, бүгүн – 57, 65, 74, 86, 97 кг ыйааһыннарга күрэхтэһии саҕаланар. Эрдэ иһитиннэрбиппит курдук, бу чемпионакка саха тустууга кыһатын иитиллээччилэриттэн үс киһи кыттар: Владимир Егоров (Хотугу Македония), Николай Охлопков (Румыния) уонна Ньургун Скрябин (Беларусь).

 

Бастакынан көбүөргэ Ньургун Скрябин тахсар буолла. Кини маҥнайгы утарсааччыта 23-гэр диэри саастаахтарга аан дойду күрэхтэһиитин боруонса призера Максим Сакулцан (Молдова) буолла. Бу хапсыһыыга ким кыайбыт, аныгыскы эргииргэ Европа чемпионатын призера турок Килисчалаян уонна Венгрияттан кыттар аан дойду чемпионатын призера  Мусукаев пааратын кыайыылааҕын кытта көрсүөҕэ.

Өссө бу бөлөххө Европа чемпионатын призера румын Георге Букур уонна олимпийскай чемпион грузин Владимир Хинчегашвили бааллар.

Онон, тэҥнээн көрдөххө, 65 кг үөһээ бөлөҕүн састааба күүстээх буолбут. Оттон аллараа бөлөххө, соторутааҕыта Красноярскайга Иван Ярыгин аатынан норуоттар икки ардыларынааҕы Гран-при турнирга бастаабыт дагестанец Курбан Шираевы чорботуохха сөп.

Биллэн турар, биһиги бэйэбит уолбутугар Ньургуҥҥа ыалдьабыт. Ханныгын да иһин, кини мэтээл иһин киирсэр кыахтаах.
65 кг. Финал 8/1:

Maксим Сакулцан (Молдова) – Ньургун Скрябин (Беларусь)
Селахаттин Килисчалаян (Турция) – Исмаил Мусукаев (Венгрия)
Aбдельлатиф Мансур (Италия) – Георге Букур (Румыния)
Aли Рахимзаде (Азербайджан) – Владимир Хинчегашвили (Грузия).

———————————————————

Курбан Шираев (Россия) – Maрван Йецца (Франция)

Maлик Амин (Сан-Марино) —

Квалификация:
Никлас Дорн (Германия) – Габриэль Янатш (Австрия)
Джордж Рамм (Англия) – Кшиштоф Бьенковски (Польша)
Давид Хабат (Словения) – Володя Франгулян (Армения)
Хуан Пабло Гонсалес (Испания) – Стефан Иванов (Болгария)
Эрик Арушанян (Украина) – Фотиос Пападакис (Греция).

Оттон 61 киилэҕэ 12 кыттааччы баар. Итинтэн иккитэ – бэйэбит уолаттарбыт. Чемпионат турнирнай сеткатыгар көрөргүт курдук, Николай Охлопков сэрэбиэй быһыытынан бастаан аан дойду чемпиона грузин Бека Ломтадзены кытта тустуоҕа. Онно хайалара кыайбыта Молдова уонна Беларусь бөҕөстөрүн хапсыһыытыгар ким хоппутугар тахсыаҕа.

Салгыы күрэхтэһиигэ ким дьолуота билиэҕэ.

Европа былырыыҥҥы чемпионатын 57 киилэҕэ боруонса призера Владимир Егоров аллараа бөлөххө киирбит. Кини бастакы утарсааччытынан – Европа былырыыҥҥы чемпиона армянин Арсен Арутюнян буолуоҕа. Бу хапсыһыыга ким кыайбыт салгыы эргииргэ сэрэйдэххэ, Украина бөҕөһүгэр тахсара буолуо.

Тус санаабар, бу ыйааһыҥҥа Бека Ломтадзе уонна Александр Богомоев финалга тахсыахтарын сөп. Оччотугар, Николай Охлопков боруонса мэтээл иһин киирсэр кыахтаах курдук көрөбүн. Чэ, быһа этиллибэт, көбүөр көрдөрүө.

61 кг. Финал чиэппэрэ:

Хамза Аладжа (Турция) – Интигам Велизаде (Азербайджан)

Квалификация:
Бека Ломтадзе (Грузия) – Николай Охлопков (Румыния)
Леонид Колесник (Молдова) – Владислав Койко (Беларусь).

———————————————————-

Иван Билейчук (Украина) – Aнвар Сувиниттяи (Эстония)
Владимир Егоров (Македония) – Aрсен Арутюнян (Армения)
Aлександр Богомоев (Россия) – Георгиос Пилидис (Греция)
Владимир Дубов (Болгария) – Виктор Лизен (Германия).

Кылгастык сэрэбиэйи ырытан билиһиннэрдэххэ итинник. Биир тылынан, биһиги сэрэбиэйи “үчүгэй”, “куһаҕан” диэн талымастыыр кыахпыт суох. Уолаттар, анаан бэлэмнэнэн тиийбит дьон хайдах баарынан, бэйэлэрин кыахтарынан тустуохтаахтар.

Чемпионат барыллааһын хапсыһыылара биһиги бириэмэбитинэн, бүгүн киэһээ 19 чаас 30 мүнүүтэттэн саҕаланаллар.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *