“Чолбон” атырдьах ыйынааҕы нүөмэрин ааҕыҥ!

«Чолбон» уус-уран литература сурунаал бу сыллааҕы 8-с нүөмэрэ үгэс быһыытынан саха уус-уран литературатын эдэр эҥэригэр ананна. Ол курдук, сурунаал таһыгар быйыл 40-ча сыл буолан баран А.М. Горькай аатынан Литература институтугар аһыллыбыт саха тылбаасчыттарын бөлөҕөр киирбит устудьуоннары куратордара, бу институту бүтэрбит идэтийбит тылбаасчыт Аита Шапошникованы кытта түспүт хаартыскаларын таһаардыбыт. Ону тэҥэ “Эдэрдэр куоластара” рубрикаҕа прозаиктар Анатолий Кириллин-Толикус, Василина Попова, бэйиэттэр Айсен Никитин, Василий Тимофеев, Мария Андреева, Николай Васильев-Харыйалаах Уола айымньылара таҕыстылар. Уус-уран литература кириитикэтин курдук уустук хайысхаҕа тумсуларын уган эрэр ХИФУ устудьуоннара Наталья Данилова, Туяра Протасова, Анна Аманатова үлэлэрин        “Эдэрдэр кириитикэҕэ холоноллор” рубрика түмтэ. Итиэннэ, “Ыалдьыппыт – “Сэргэлээх уоттара” түмсүү” диэн ааттаан Саха сирин билиҥҥи баар саамай кырдьаҕас эрээри, өрүү эдэр куттаах куруһуогар дьарыктанар ыччаттары билиннэрдибит.

Атырдьах ыйынааҕы нүөмэргэ норуот суруйааччыта Баһылай Харысхал “Ахтылҕан” романын уонна Николай Павлов-Тыаһыт “Дьолу былдьаһыы” сэһэнин салҕыылара бэчээттэннилэр. Норуот бэйиэтэ Леонид Попов төрөөбүтэ 100 сылыгар анаммыт филологическай наука кандидата Екатерина Ефремова уонна кыраайы үөрэтээччи Елена Ноговицына ыстатыйалара тахсан, кини айар үлэтин, төрдүн-ууһун ымпыктаан-чымпыктаан билиһиннэрдилэр. «Тойон кыыл» киинэ үөскүүрүгэр төрүөт буолбут бөдөҥ прозаик Василий Яковлев туһунан Сэмэн Тумат анаарыыта ааҕааччы болҕомтотун тардыаҕа.

Бу нүөмэр дьоһун ыалдьыттарынан Өрөспүүбүлүкэ маҥнайгы Ил Дархана Егор Борисов, Азербайджан суруйааччылара Акбер Гошалы уонна Аида Эйвазова буоллулар, ол туһунан Аграфена Кузьмина “Суруйааччы норуотун эрэ иннигэр эппиэтинэһи сүгэр”, Татьяна Маркова “Өбүгэлэрбит хаһан эрэ биир кутаа тула олорбуттара” диэн интервьюларыгар сиһилии ааҕыаххытын сөп. П.А. Ойуунускай аатынан Саха тыйаатырыгар турбут «Кээрэкээн» спектаклы кириитик Ангелла Попова ырытыыта олус кэрэхсэбиллээх. Чуумпутук айан-тутан ааспыт бэйиэт Андрей Борисов хоһооннорун таһаардыбыт, кини туһунан өйдөбүлү Ил Түмэн I вице-спикерэ Александр Жирков ахтыыта уонна норуот бэйиэтэ Моисей Ефимов бэлиэтээһинэ ордук кэҥэтэн, чопчулаан, ситэрэн биэрэллэр. “Суруйааччы колонкатыгар” сурунаал сүрүн эрэдээктэрин солбуйааччы Гаврил Андросов Казахстан сырыытын туһунан эссетэ таҕыста.

 

Редакция

Добавить комментарий

Ваш адрес email не будет опубликован. Обязательные поля помечены *