«ЧОЛБОН» СУРУНААЛ АЛАМПА ААТЫНАН БИРИЭМИЙЭЛЭРИ ТУТТАРДА

Олунньу 12 күнүгэр «Бэчээт дьиэтигэр» төрөөбүт тыл уонна сурук-бичик күнүн көрсө 2020 сыл түмүгүнэн «Чолбон» сурунаал бастыҥ ааптардарыгар А.И. Софронов-Алампа аатынан «Бастакы эрэдээктэр бириэмийэтин» үөрүүлээх быһыыга-майгыга туттарда.

Сурунаал суруйар, айар-тутар ааптардарын көҕүлүүр сыалтан бастакы эрэдээктэр Анемподист Софронов-Алампа аатынан бириэмийэни быйыл иккис сылын туттарда. Маныаха үбүнэн көмөнү суруйааччы биир дойдулаахтара – Петр Егорович Захаров баһылыктаах Дьохсоҕон нэһилиэгин дьаһалтата оҥордо.

Гаврил Андросов, «Чолбон» сурунаал бас эрэдээктэрэ: «Биһиги бу тэрээһининэн быйыл сурунаалбыт үбүлүөйдээх 95-с сылын арыйабыт. Наҕарааданы туттарар туһунан санаабытын хара маҥнайгыттан өйөөбүт Алампа биир дойдулаахтарыгар – дьохсоҕоннорго, баһылык Петр Захаровка, сиэрдээх быһаарыыны ылынарга сүбэ-ама буолар редколлегиябыт чилиэннэригэр махтанабыт».

Быйылгы сыл бастыҥнарынан ааттаннылар:

ПРОЗА лауреатынан норуот суруйааччыта Баһылай Харысхал иккис сылын субуруччу ааттанна, бириэмийэ уолугар Кузьма Васильевичка туттарылынна;

ПОЭЗИЯ лауреатынан норуот суруйааччыта Василий Соловьев-Болот Боотур «Биһиги саллааттар этибит» диэн ханна да бэчээттэнэ илик поэматынан ааттанна, диплом хомуйан оҥорооччуларга Болот Боотур аатын сүгэр Хатылы орто оскуолатын учууталларыгар Елена Аммосоваҕа, Наталья Батаринаҕа туттарылынна, бириэмийэ үбэ оскуола аатыгар киириэҕэ;

ДРАМА лауреатынан СӨ искусствотын үтүөлээх деятела Семен Ермолаев-Сиэн Өкөр ааттанна;

УОЧАРКА УОННА ПУБЛИЦИСТИКА лауреатынан кыраайы үөрэтээччи Панкратий Петров Аҕа дойду Улуу сэриитигэр аналлаах ыстатыйаларын иһин ааттанна.

Семен Ермолаев-Сиэн Өкөр: «Наҕараадаҕа тиксибиппиттэн олус үөрдүм. Өссө да суруйуом, айыам-тутуом!»

Болот Боотур аатынан Хатылы орто оскуолатын директора Октябрина Филиппова: «Биһиги киэн туттар биир дойдулаахпыт В.С. Соловьев-Болот Боотур аатын үйэтитиигэ үлэлэһэбит. Кэнники сылларга икки кинигэ таҕыста. Онон маннык бириэмийэни ылбыппытыттан сүрдээҕин астынныбыт, сурунаал эрэдээксийэтигэр, Алампа биир дойдулаахтарыгар махталбытын биллэрэбит».

Панкратий Петров кыыһа Майя Источкина: «Биһиги эһэбит композитор Адам Скрябин Алампа доҕоро этэ, онон аҕабыт бу бириэмийэҕэ тиксибитэ олус бэлиэ уонна долгутуулаах».

Наҕарааданы туттарыыга кыттыбыт «Сахабэчээт» СӨ САТ дириэктэрэ Ньургуйаана Стручкова, Таатта улууһун Дьохсоҕон нэһилиэгин баһылыга Петр Захаров, норуот суруйааччыта Семен Попов-Тумат, Былатыан Ойуунускай аатынан судаарыстыбаннай бириэмийэ лауреата Николай Винокуров-Урсун кыайыылаахтары эҕэрдэлээтилэр, Алампа аатын үйэтитэргэ салгыы үлэлэһэллэрин биллэрдилэр.

 

 

 

 

Иван ОСИПОВ

Добавить комментарий

Ваш адрес email не будет опубликован. Обязательные поля помечены *