«ЧОЛБОН» СУРУНААЛ ТЫЛБААС УЛАХАН ТҮҺҮЛГЭТИГЭР

Ахсынньы 24 күнүгэр куйаар ситимигэр Россиятааҕы үөрэх академиятын  көҕүлээһининэн Казаннааҕы (Приволжьетааҕы) федеральнай университет «Пир перевода национальных литератур» диэн тылбааска аналлаах төгүрүк остуолу уонна ырыа-хоһоон дьоро киэһэтин тэрийэн ыытта. Тэрээһини сүрүннээн ыыппыт Россиятааҕы үөрэх академиятын тылбааһы сайыннарар киинин салайааччыта, Россия тылбаасчыттарын сойууһун бэрэсидьиэнэ Ирина Алексеева киирии тылыгар бүтүн Россия үрдүнэн тылбаас үлэтэ сайдарын туһугар баар кыһалҕалары туоратарга элбэх кэпсэтии, дьүүллэһии ыытыллар кэмэ тирээн кэлбитин эттэ. Конференция кыттыылаахтара Татарстантан Ольга Иванова, Эльмира Хабибуллина, Бурятияттан Полина Дашинимаева, Чувашияттан Хузангай Этнер, Туваттан Аэлита Салчак, Хабаровскайтан Марина Осипова, Саха сириттэн М.К. Аммосов аатынан Хотугулуу-Илиҥҥи федеральнай университет преподавателлэрэ Акулина Васильева, Ирина Собакина, Алина Находкина, «Чолбон» сурунаалтан эппиэттиир сэкирэтээр Анна Прудецкая уо.д.а. тоҕоостоох түгэни мүччү туппакка кэпсэтиигэ көхтөөхтүк кытыннылар, бэйэлэрин санааларын эттилэр, тылбааска ситиһиилэрин уонна куруутун көрсөр кыһалҕаларын бэлиэтээн аастылар. Түмүккэ тылбааска Россия үрдүнэн улахан болҕомто ууруллан эрэриттэн үөрбүттэрин, маннык куйаар ситиминэн кэпсэтии, сүбэлэһии, санаа үллэстиитэ олус наадалааҕын, инникитин тылбаас үлэтэ саҥа хайысхаҕа тахсыаҕар, сайдыаҕар эрэнэллэрин биллэрдилэр.

– Төгүрүк остуолга мин «Чолбон» сурунаал төрүттэниэҕиттэн нууччалыыттан-сахалыы тылбаастанар айымньылар куруук бэчээттэнэллэрин кэпсээтим, кэнники сылларга биһигини кытары утумнаахтык үлэлэһэр тылбаасчыттарбыт тустарынан сырдаттым. Биллэн турар, бириэмэ кэмчитинэн барыта иһитиннэрии кэриэтэ, улахан дьүүллэһиитэ суох барда. Ол да буоллар биһиги сурунаалбыт тылбаасчыттары өйүүр үлэтин хайҕаатылар. Бэйэм санаабар, сорох кыттыбыт атын дойдуларга тэҥнээтэххэ, биһиэхэ унвиерситет да, бэчээт эйгэтин да өттүттэн чахчы үлэ барар эбит. Кыттыбыт дьон инникитин өссө маннык түмсэн кэпсэтиэх, санаа, уопут атастаһыах буоллубут, – диэн кэпсээтэ тэрээһин кыттыылааҕа Анна Прудецкая.

Төгүрүк остуол кэннэ«Пир первода: российское многоголосье» диэн ырыа-хоһоон түһүлгэтэ тэрилиннэ. Манна Татарстан, Бурятия, Тыва, Чувашия, Хабаровскай кыраай бэрэстэбиитэллэрэ тылбаастаммыт айымньыларын бэйэлэрин тылларынан уонна нууччалыы ааҕан иһитиннэрдилэр. Саха сириттэн тылбаасчыт Семен Феоктистов-Сэргэх Сэмэй бэйэтин хоһооннорун уонна олору бэйэтэ тылбаастаабытын ааҕан сэҥээриини ылла. Истибит дьон автоперевод диэн бу сонун, ураты хайысха диэн бэлиэтээтилэр. ХИФУ доцена Алина Находкина «Дьулуруйар Ньургун Боотур» олоҥхоттон быһа тардыыны англиялыы тылынан аахта, Хотугулуу-илиҥҥи норуоттар тылларын уонна култуураларын институтун устудьуоннара быйыл төрөөбүтэ 100 сылын туолбут суруйааччы, тылбаасчыт, сценарист Лев Габышев айар үлэтин билиһиннэрдилэр.

  

Иван ОСИПОВ

Добавить комментарий

Ваш адрес email не будет опубликован. Обязательные поля помечены *