«ЧОЛБОН» СУРУНААЛ САҤА НҮӨМЭРЭ ТАҔЫСТА

«Чолбон» сурунаал от ыйынааҕы нүөмэригэр норуот суруйааччыта Баһылай Харысхал өрөбөлүүссүйэ иннинээҕи саха атыыһыттарын уонна интеллигеннэрин туһунан саҥа романыттан быһа тардыытын, Аҕа дойду Улуу сэриитин кыттыылааҕа, эписиэр Николай Николаев ханна да бэчээттэммэтэх «Уһаарыллыы» сэһэнин тыҥааһыннаах түмүгүн, аатырбыт «Тэҥҥэ кырдьыбыт тэҥкэ тиит» ааптара Василий Яковлев өссө биир кэрэхсэбиллээх айымньытын – «Киһи бэйэтин туһугар кытары сэриилэһэр» диэн Өксөкүлээх Өлөксөй убайа Оонньуулаах Уйбаан ыччаттарын дьылҕатын туһунан кэпсээнин, былырыын Уһук Илиннээҕи В.К. Арсеньев аатынан бириэмийэ лауреата прозаик Анатолий Слепцов нууччалыы суруйбут «Честные люди» кэпсээнин тус бэйэтин сахалыы тылбааһыгар ааҕыҥ. Поэзияҕа аныгы үйэ хоһоонньут куота Зинаида Архипова «Хаайтарыы хоһоонноро» диэн саҥа айымньыларын бөлөҕө, фронтовик учуутал Василий Лыткин хоһоонноро таҕыстылар. Саха сиригэр олохтоох нуучча суруйааччыта Ольга Пашкевич сайдыы уонна үгэс ситимнэрин туһунан «Эдэркээммин, кыыс хотун…» кэпсээнэ Сэргэх Сэмэй тылбааһыгар бэчээттэннэ.
От ыйыгар 60 сааһын туолбут поэт уонна музыкант Виталий Власов олоҕун, дьылҕатын, айар үлэтин тула Уйбаан Ойуурдуун сэһэргэһиитин, Василий Яковлев үөһэ ааттаммыт кэпсээнигэр философ Егор Винокуров бэлиэтээһиннэрин кэрэхсээҥ.
«Улуу Кыайыы 75 сыла» рубрикаҕа кыраайы үөрэтээччи Панкратий Петров ыстатыйаларын анал тиһигиттэн Ленинград көмүскэлигэр сахалар кыттыыларын туһунан кэрчигэ, кыраайы үөрэтээччи Татьяна Андросова Саха сиринээҕи кинигэ кыһатын сүрүн редакторынан үлэлит олорон бастакы ыҥырыыга барбыт партия үлэһитэ, суруналыыс, спортсмен, старшай лейтенант Михаил Винокуров дьылҕатын биһиннэрэр суруйуута, Ил Түмэн вице-спикерэ Александр Жирков Саха Бэчээтин күнүгэр анаммыт саха суруналыыстыката үөскээһинигэр сыһыаннаах чинчийэр ыстатыйата таҕыстылар.
Сурунаал дьэрэкээн сирэйдэригэр СӨ искусствотын үтүөлээх деятела Виталий Власов сэбэрэтин, Саха сирин Суруйааччыларын сойууһа фронтовик суруйааччыларга аналлаах фотогалереятын үөрүүлээх арыллыытын туһунан репортаһы, Мытаахтааҕы музей-галерея коллекциятыттан Иннокентий Кононов от үлэтин туһунан хартыынатын уонна «Чолбон» сурунаал Саха Бэчээтин күнүнэн эҕэрдэтин көрүҥ.

Добавить комментарий

Ваш адрес email не будет опубликован. Обязательные поля помечены *