Чөркөөх саҥа баһылыга талылынна

Дойду үрдүнэн бүттүүн быыбар күнүгэр Чөркөөххө баһылыгы таллылар. Быыбардааччы 70,55% кыттыыны ылла. Баһылык дуоһунаһыгар уопсайа үс кандидат турбута. Олохтоохтор баһыйар үгүс куоластарын, ол эбэтэр 66,94 % Андрей Петрович Семеновка биэрдилэр.


Чөркөөх баһылыгынан талыллыбыт Андрей Петрович Семенов Бүлүү улууһун Тоҕус нэһилиэгэр төрөөбүтэ. Төрөппүттэрэ эрдэ олохтон туорааннар орто оскуоланы Орто Халыма улууһугар бүтэрбитэ. Чөркөөх кыыһын кэргэн ылан, биэс оҕону төрөтөннөр, ыал аҕатын быһыытынан холобурга сылдьар, дьоҥҥо-сэргэҕэ ытыктанар. Андрей Петрович араас үлэҕэ сыстан, буһан-хатан улуус сэбиэтин икки ыҥырыытыгар депутатынан быыбарданан үлэлиир. Бэйэтэ «Талбан» ХЭО-ны тэринэн нэһилиэк олохтоохторугар үлэ миэстэтин таһаарар. «Талбан» тэрилтэ оҥорор пластиковай тыыларын, улахан буочукаларын уо.д.а. хаһаайыстыбаҕа туттуллар табаардарын улуус олохтоохторун эрэ буолбакка, чугастааҕы улуустар эмиэ билэн, сэргээн сакаастыыллар.

Бэйэтин суолун солонон тахсыбыт, эдэр дьоҥҥо кырдьык да холобур буолар кыахтаах Чөркөөх саҥа талыллыбыт баһылыгар Андрей Петрович Семеновка олохтоохтор сайдыыны киллэриэ, олох-дьаһах тупсарыгар үлэлэһиэ диэн бэйэлэрин итэҕэллэрин биллэрдилэр.

Ааптар: «Таатта» хаһыат.

Сообщение Чөркөөх саҥа баһылыга талылынна появились сначала на Ulus.Media — все главные новости из районов Якутии.

Комментарии закрыты.