Чысхааннар, Елена Вяльбе бирииһигэр хайыһарга күрэхтэһии тэрийдилэр

Куорат дьоно дьиэҕэ хаайтаран  олорбокко, сааскы чаҕылхай күннээх ылааҥы күн сибиэһэй салгыҥҥа тахсан эттэрин-хааннарын эрчийэн хааман, сүүрэн, хайыһардаан доруобуйаларын бөҕөргөтүнэллэр. Холобур, өрөбүл күннэргэ Сайсары күөлгэ дьон толору, ким хайыһардыыр, ким хаҥкылыыр, ким хаалыктаах хаамар…  

 

Оттон бэҕэһээ, Россия хайыһарга федерациятын президенэ, үс төгүллээх олимпийскай чемпионка, аан дойду 15 төгүллээх кыайыылааҕа, спорт үтүөлээх маастара Елена Вяльбе бирииһигэр хайыһарга аһаҕас республикатааҕы турнир буолла.

Дьахталлар классическай ньыманан 2,5 км сири алтыа буолан сүүрдүлэр. Түмүккэ кыайыылааҕынан Екатерина Никитина буолла. Иккис миэстэҕэ Василиса Слепцова таҕыста. Үһүс бириистээх миэстэни Валентина Саввина ылла.

Эр дьоҥҥо хайыһар суолугар отут үс кыттааччы таҕыста. Кинилэр классическай ньыманан биэс километрга сүүрдүлэр. “Кандикап” диэн саастарынан арааран сүүрдүүлэрин түмүгэр, саамай аҕа саастаахтарга Степан Абрамов бастаата. Ити курдук, бэйэлэрин бөлөхтөрүгэр бастыҥ бириэмэни Ярослав Котлярчук, Егор Иванов, Константин Матаннанов, Семен Федоров, Афанасий Илларионов, Степан Контоев көрдөрдүлэр.

Бу күрэхтэһиини “Чысхаан” любитель хайыһардьыттар спортивнай кулууптара тэрийэн ыытта. Кыайыылаахтар мэтээллэринэн, дипломнарынан уонна өйдөбүнньүк бэлэхтэринэн наҕараадаланнылар.

Петр ПАВЛОВ.

 

 

Добавить комментарий

Ваш адрес email не будет опубликован. Обязательные поля помечены *