Д.П. Коркин өҥөтө тустууктары эрэ иитэн таһаарыыга сытар курдук анаарар сыыһа

Кинини кытта бииргэ алтыһан оскуоланы бүтэртээбит оҕолор бары чулуу тустууктар буолан тахсыбатахтара. Саамай улахана сытар эбит, кини уонна кинини кытта үлэлээбит көлүөнэ – эдэр көлүөнэ олоҕун оҥкулун акылаатын уурбуттарыгар. Саха сирин араас муннуктарыттан кэлбит ыччат оскуоланы ситиһиилээхтик бүтэрэн, үрдүк, орто анал үөрэхтэри Сэбиэскэй Сойуус улахан куораттарыгар үөрэнэн, атын омук оҕолорун кытта алтыһан, кинилэртэн элбэххэ үөрэнэн, үрдүк кылаастаах учууталларга, профессордарга үөрэнэн, үрдүк култуураны кытта алтыһан, төрөөбүт улуустарыгар, нэһилиэктэригэр төннөн кэлиилэрэ улахан суолталаммыта.

 

Кинилэр саха интеллигенцията ыйбыт, үөрэппит суолун салҕаабыттара. Тустууга буолбакка үлэҕэ, олоххо ситиһиилэрин аахтахха, ырыттахха улахан да үлэлэри үлэлээн кэлбиттэр эбит. Олоххо саамай ыарахан буккуурдаах кэмнэргэ кинилэр сайдыы, сиэр-туом, этнос, доруобай буолуу суолун тутуспуттара. Бу буолар, Дмитрий Петрович Коркин уонна кинини кытта үлэлээбит учууталлар, иитээччилэр, техническэй үлэһиттэр ситиһиилэрэ.

Манна ахтан ааһыахпытын наада, кинилэр бэйэлэрин олохторун, оҕолорун, кинилэр ситиһиилэрин, Макаренко да, Сухомлинскай даҕаны оҕону кыратыттан, аҕам сааһыгар диэри атаҕар туруоран, онтон кининэн саха норуотун ыччатын иитиигэ туһанан, бүтүн нация иитэр систиэмэтигэр улахан кылааттарын киллэрбиттэрэ. Олох туох баар араҥатыгар барытыгар кинилэр иитэн таһаарбыт ыччаттара үлэлээбиттэрэ. Манна учууталтан, быраастартан, тутуу үлэһиттэриттэн, нэһилиэк, улуус салайааччыларыттан, суоппардарга, тыа хаһаайыстыбатыгар, промышленноска барытыгар күүстээх санаалаах кинилэр илиилэрин иһинэн тахсыбыт специалистар, патриоттар үлэлээбиттэрэ. БУ БУОЛАР, СААМАЙ УЛАХАН СИТИҺИИ!

Саха этноһыгар, саха олоҕор улахан, тугунан да сыаналаммат кыайыы, бу кыайыы мэтээлэ суох, грамотата даҕаны суох. Бу саха олоххо тардыһыытын күүһүн көрдөрбүт үлэ. МАНЫ ДЬОНҤО, ЭДЭР ЫЧЧАККА БАСТАКЫ КЭККЭҔЭ ТУРУОРАН БЫҺААРАН кэпсиэххэ наада, маны өссө ырытан, анааран үлэ ситиһиилэрин суруйталаан үйэтитии үлэтэ барыахтаах.

Спорт, ырыа тойук – бу олох салаалара, олох хорук тымырдара, кинилэрэ суох үтүө мааны олох суоҕун кэриэтэ. Култуура үтүөлээх үлэһиттэрэ, тыа хаһаайыстыбатын үтүөлээхтэрэ, улуустарын, нэһилиэктэрин бочуоттаах олохтоохторо, РФ араас бочуоттаах бэлиэлэрин хаһаайыттара, Учууталлар учууталлара, үтүөлээх быраастар, Н.К. Крупская аатынан бэлиэ хаһаайына… киһи ааҕан сиппэт ситиһиилэр, үтүөлээх суоппардар, сылгыһыттар буолунайдар.

Дмитрий Петрович Коркин үлэтин киэҥник, дириҥник ырытыахха наада, кылаабынайа сиэрдээх киһи иитиллэн тахсыыта буоллаҕа дии, Алампа эппитэ: “ Норуот туохха барытыгар норуот, тойон” — диэн.

Гаврил КАПРИН, көҥүл тустууга ССРС спордун маастара, Украина чемпиона, ССРС Сэбилэниилээх Күүстэрин хас да төгүллээх кыайыылааҕа.

Таатта.

 

Добавить комментарий

Ваш адрес email не будет опубликован. Обязательные поля помечены *