“Далбар Хотун “ түмүктүүр түһүлгэтигэр ыалдьыттааҥ

XIII өрөспүүбүлүкэтээҕи “Далбар Хотун “күрэс кыттыылаахтара Дьокуускай куоракка түмсэн күрэс түһүмэхтэригэр кытталлар. Бэҕэһээ “Чороон түһүлгэтэ” балаҕаҥҥа “Кэтэх хаһаайыстыба—уйгулаах олох төрдө “ диэн тиэмэҕэ санаа атастаһыытыгар кыттыбыттара. Ол курдук “Зеркало”  фотоустуудьуйаҕа “Кэрэ сэбэрэ “ түһүмэххэ кыттан маанымсыйа хаамыахтара, олохторугар буола турар кэрэ түгэннэри хаартыскаҕа үйэтитиэхтэрэ, онтон “Палладиум “ эргиэн киинин банкетнай саалатыгар “Далбар Сандалы “ түһүмэххэ көрсөн “Тыгын Дархан “ эрэстэрээн дириэктэрэ, модератор Мария Николаевна Габышева, дьүүллүүр сүбэ иннигэр ийэлии сылаас илиилэринэн бигээн, астаан-үөллээн аҕалбыт мааны бүлүүдэлэрин билиһиннэриэхтэрэ.

Күрэһи түмүктүүр түһүлгэ бээтинсэҕэ, кулун тутар 26 күнүгэр Бэчээт дьиэтигэр, “Сахамедиа “пресскиинигэр, күнүс 2 чааска буолуоҕа. Өрөспүүбүлүкэбит араас улуустарыттан кэлэн, кыайыылаах  “Далбар Хотун “үрдүк аатын ылар иһин үгэс буолбут күрэскэ кыттар далбар хотуттар Валентина Томская (Бүлүү, Кыадаҥда), Александра Егорова (Амма, Бөтүҥ), Маргарита Семенова (Ньурба, Ынахсыт), Сардаана Атакова (Томпо, Кириэс Халдьаайы), Александра Татаринова (Таатта, Харбалаах), Галина Шкулева (Орто Халыма, Ойуһардаах), Любовь Татаринова (Нам, Хатырык) бу күн араас номинацияларынан бэлиэтэниэхтэрэ, күрэс спонсордарын бэлэхтэрин тутуохтара. Кыайыылаах аатын ылар чиэскэ тиксибит далбар хотун “Золотое кольцо “ маршрутунан айанныыр икки киһиэхэ анаммыт путевканан наҕараадаланыаҕа.

Олох тэтимигэр сөп түбэһиннэрэн, дьаҥ-дьаһах мэһэйдээн, быйыл иккис төгүлүн куйаар ситиминэн ыытыллар күрэс түмүктүүр түһүлгэтин “Сахабэчээт” сайтыгар ссылканан киирэн онлайн быһа биэриигэ көрөргүтүгэр ыҥырабыт.

Добавить комментарий

Ваш адрес email не будет опубликован. Обязательные поля помечены *