Дьокуускай куорат көҥүл тустууга чемпионата ыҥырар

Саха Республикатын физическэй култуураҕа уонна маассабай спорка управлениетын (начаалынньык А.А. Мохов), СР Спорка бэлэмнэнии киинин (дириэктэр Л.Н. Спиридонов), Дьокуускай куорат физическэй култуураҕа уонна спорка управлениетын (начаалынньык К.С. Бурцев), СР спортивнай тустууга федерациятын (президент С.М. Березин) көҕүлээһиннэринэн уонна бэлэмнээн, тэрийэн ыытыыларынан, бу нэдиэлэ бүтүүтүгэр, сэтинньи 9-10 күннэригэр Дьокуускай көҥүл тустууга аһаҕас чемпионата ыытыллар.

Биллэрин курдук, чемпионат иккис сылын Российскай Федерация физическэй култуураҕа уонна спорка үтүөлээх үлэһитэ, Саха Республикатын үтүөлээх тренерэ Валерий Петрович Керемясов сырдык кэриэһигэр ананан ыытыллар.

Чемпионат сүрүн сыалынан – чөл олоҕу пропагандалааһын, тустууктар тустар таһымнарын үрдэтии, Дьокуускай куорат бастыҥ бөҕөстөрүн быһаарыы уонна Валерий Керемясов аатын үйэтитии буолаллар.

Чемпионакка – 57, 61, 65, 70, 74, 79, 86, 92, 97, 125 кг ыйааһыннаахтар бастыҥнары быһаарсыахтара. Биһиэхэ иһитиннэрбиттэринэн, Казахстаҥҥа Д.Кунаев турнирыгар барааччылартан уонна эчэйиилээхтэртэн ураты Семен Владимиров, Ньургун Сергин, Тимур Николаев, Георгий Окороков, Алексей Копылов, Егор Вензель, Дьулус Булатов уо.д.а. күүстээхтэр кыттыахтара.

Чемпионат кылаабынай судьуйатынан – республикатааҕы категориялаах судьуйа Станислав Афанасьев, оттон кылаабынай секретарынан Бүтүн Россиятааҕы категориялаах судьуйа Василий Уйгуров үлэлиэхтэрэ.

Кыайыылаахтар уонна иккис-үһүс миэстэлээхтэр мэтээллэринэн, грамоталарынан уонна өйдөбүнньүк бириистэринэн наҕараадаланыахтара.

Чемпионат “Кыайыы 50 сыла” Спорт дыбарыаһыгар ыытыллар.

Чемпионат бырагыраамата

Сэтинньи 9 күнэ, субуота

14:00-16:30 Мандат хамыыһыйатын үлэтэ (В.П. Керемясов аатынан спортивнай оскуола).

16:30-17:00 Хамаандалар бэрэстэбиитэллэрэ кыттыылаах судьуйалыыр коллегия сүбэ мунньаҕа.

17:00-18:00 Кыттыылаахтар ыйааһыннаныыны уонна сэрэбиэйи барыылара.

Сэтинньи 10 күнэ, баскыһыанньа

09:00-12:00 Чемпионат барыллааһын хапсыһыылара (Спорт дыбарыаһа)

12:00-12:30 Чемпионаты үөрүүлээхтик аһыы.

12:30-19:00 Чемпионат салгыыта. Финаллар, кыайыылаахтары наҕараадалааһын.

“Дьулурҕан”.

 

Добавить комментарий

Ваш адрес email не будет опубликован. Обязательные поля помечены *