ИРАИДА ПОПОВА: ДЬОКУУСКАЙ (Кэпсээн)

Бытарҕан тымныылаах Саха сириттэн үс дьүөгэлии кыыс Таиланд Пхукет арыытыгар сынньана кэлэннэр, эмискэ сииктээх салгыннаах самаан сайыҥҥа баар буола түстүлэр. Автобуһунан түһэр сирдэригэр баран иһэннэр, түннүгүнэн барытын сэргии көрөллөр.

– Тыый, бу фикустара манна адьас баараҕай мас буолан үүнэ тураллар эбит дии! – диэн Биэрэ соһуйар-өмүрэр.
– Этэҕин ээ, барыта биһиги түннүккэ үүннэрэр үүнээйилэрбит баараҕай мас буолан тураллар дии! – Санаайа бокуойа суох хаартыскаҕа «чып» гыннара олорор.
– Наһаа да үчүгэй, маннык сиргэ олорумуна, кыһыҥҥы таҥас наадата суох, дьиэлэрэ-уоттара оттуллубат, чэпчэки матырыйаалтан туттуллар, аһыҥ маска ыйанан турар, эчи хаарыаны! – диир Айыыта.

Кыргыттар, хонор сирдэрин буланнар, таҥастарын-саптарын ыскаапка уктан бардылар. Ааны тоҥсуйбуттарыгар, Биэрэ баран аста. Лакыай уолчаан:
– Мадаам, сиэйпэ бокс, – диэтэ.
– Айыытаа, бу уол туох эрэ диир, кэпсэт эрэ.
Дьүөгэтэ кэлэн английскайдыы дорооболосто, тугу эрэ ыйытта, ол аайы киһитэ бэрт олуттуҕастык хардарар уонна «сиэйпэ бокс» диэбитин кэлиилии кэбэ турар. Өйдөөбөттөр диэн ыгылыйан барда.
– Туох-туох диирэ буолла, акценнаах баҕайы, – диэн Айыыта мунаахсыйда.
Санаайа:
– Хата киллэрэн сейфэни хайдах туһанарбытын ыйыт эрэ, – диэн өйдөттө.
Айыыта хап-сабар бэртээхэй английскайынан тылбаастаан биэрдэ.
Уол:
– Йес, йес, сиэйпэ бокс! – диэн дьэ өйдөөтүлэр диэн «һуу» гынна быһыылаах.
– Ээ, бу барахсаттары, таайдар фонетикалара эмиэ биһиэнин курдук эбит буолбат дуо! – диэн Айыыта күлэн ымайда.
– Оччоҕуна сахалыы акценнаах кэпсэт ээ, били Сүөдэр Бөтүрүөбүс нууччалыы кэпсэтэрин курдук, – диэн Биэрэ күллэ.
Сиэйпэлэрин быһаарсан бараннар Санаайа мэник санаатыгар:
– «Сиэйпэ» дии сылдьар уол сахалыы кэпсэттэххэ төһө өйдүүр эбитий, – диэтэ уонна уолга туһаайан: – Биһиги Дьокуускайтан кэллибит, өйдүүгүн дуо? – диэтэ.
– Аа, Дьокууса, йес, йес, мадаам, пуул ин зэ лобби, ип ю уант суиммен, зэ биис нир пиптин минут уалк.
– Хата уолуҥ өйдөөтө быһыылаах, Дьокуускайтан сылдьар дьон баран сөтүөлээҥ, бассейн холга баар үһү, пляж уон биэс мүнүүтэлээх сиргэ диир. Барахсан, кырдьык даҕаны «бич» диэни «биис» диир эбит, – диэн Айыыта тылбаастаан биэрдэ.
Кыргыттар купальниктарын кэтэ охсоннор бассейҥа сөтүөлүү киирдилэр.
– Арба да, Дьокуускайга эрийэ сылдьыахха баара, сонуммутун дьоммутугар кэпсии иликпит дии, – диэтэ Суойа.
Ону истэн лакыай уолчаан:
– Аа, Дьокууса, нау тарн! – диэт тугу эрэ баран холбообутугар бассейннара өрө күүгэннирэ түспэт дуо?
Кыргыттар соһуйан часкыйдылар. Уоллара үөрэн ымайан баран, эрбэҕин көрдөрдө уонна ресепшеҥҥэ бара турда.
– Пахай! Олох да «дьокууса» диэн Дьокуускай диэн өйдөөбөтөх, джакузи диир тыла эбит! – диэн кыргыттар джакузиларыгар наскыйан күлсэ эрэ хааллылар.

«Чолбон», 2014 с.

Добавить комментарий

Ваш адрес email не будет опубликован. Обязательные поля помечены *