ДОЛГУРА (Хоһооннор)

СҮГҮРҮЙҮҮ

1

Оо, дойдум киэҥ иэнэ!

Үрдүк халлааным, үрүҥ күнүм!

Эн сылаас хонуугар сыҥаһалаан хаампыт,

Эн холку майгыгар таалалаан улааппыт

Мааны оҕоҥ сүгүрүйэ кэлэн турабын.

Мин хоҥкуйуом – өбүгэлэрбин санаан,

Өлбөт өйү кинилэртэн иҥэринэ,

Мин долгуйуом – ыччаппын алҕаан,

Аныгы кэм дьалхаанын намырата…

2

Үрүҥ түүннээх

Үүт дойдум!

Үтүө ааккын үрдүктүк тутар

Үгүс ыччат дьоҥҥуттан

Үгүрү-сүгүрү буолуохтун!!!

Айхал тыллаах

Айыым сирэ!

Алгыстаах ааккын араҥаччылаһар

Халыҥ элбэх дьоҥҥуттан

Уруй-туску буолуохтун!!!

Күнү көрөр күндү күөммүт – эн.

Кииммитин түһэрэр кэскиллээх сирбит – эн.

Биһикпитин ыйыыр быйаҥнаах сирбит – эн.

Эйиигин

Иэримэ дьиэлии

Иччилээбиппит курдук иччилиир,

Алаһа дьиэлии

Арчылаабыппыт курдук арчылыыр

санаалаахпыт.

Эйиигиттэн атын ийэ сири билбэппит,

Эйиигиттэн ордук төрүт буору булбаппыт.

Күөҥҥэр көччүтэн көҥүл санаалаа,

Хонноххор хорҕотон хоһуун санаалаа,

Быттыккар саһыаран боотур санаалаа.

Тэһииҥҥин ыһыктыма,

Көнтөскүн мүччүрүтүмэ!

3

Хараҕым уута

Халыйа сүүрдэ,

Сүһүөҕүм хамсаата,

Сүрэҕим тэптэ –

Сүүс даа сыл кэннэ

Син биһи даа

Кырдьыкпыт кыайар,

Көҥүлбүт күөрэйэр

Күндү кэмэ үүнүө эбит…

Күүс өһүллүбэтэр,

Көҥүл сарбыллыбатар…

 

КӨҤҮЛ ТУҺУНАН

1

Күҥҥэ, күөххэ, көҥүлгэ

Көппүтүм баара даа…

Көмүс көҥүлү көрбөтүм,

Күндү күөххэ күөлэһийбэтим,

Үрүҥ күҥҥэ тиийбэтим…

Хата

Кынаппын кэриэрдэн төнүннүм,

Көппөт буоллум,

Кэҕинним…

Көмүс көҥүлү көрдөөммүн…

2

Көҥүлү

Көрдүөбүтүм күн сиригэр…

Кынаппын кэриэрдибитим

Күн күлүмүгэр…

Көрдөөбүт күндү көҥүлүм

Күнүс көстүбэтин,

Күлүмүрдэс дьүһүнэ

Күҥҥэ оонньооботун билбэтэхпин…

Көҥүлбүн дьэ буллум,

Көҥүлбүн дьэ сүтэрдим…

Эрэл

Күөх сайыным быйаҥнаах

                                           буолуо диэн эрэнимэ…

Күөнэҕим оонньуо,

Күнүм тахсыа диэн

Күүтэн күҥҥүн ыытыма…

Кыайар-кыайтарар арда чараас:

Халбас харатын курдук олохпут

Түҥнэстэ түһэрэ түргэн.

Ол эрэн

Күндэлэс күннээх күөх сайыны

Күүппэт буоллаххына

Кыһын обургу чысхаанын тулуйар,

Күөххэ үктэнэр үтүө күҥҥэ тиксэр

Күчүмэҕэйин өйдүө…

 

ҮРҮҤ ТҮҮН ИЭЙИИТЭ

Холкутук

Хоһоонно суруй диигин…

Хоргутуо эбиппин даа,

Тоҕо эрэ хомойбокко даҕаны

Истигэн оҕолуу

Иэйиибин тиһэбин,

Ол аата, туһугар,

Олох олоробун…

 

* * *

Оо, мэлдьэһиэхпин баҕарбытым

Бу сайыны,

Бу самыыры,

Бу халааны…

Эмиэ

Уруккум курдук

Барытын ыраахтан көрүөхпүн,

Туохха да кыттыспакка

Туора туруохпун сөп этэ…

Эн илиибин сиэтиэххэр диэри…

 

* * *

Ап-хомуһун

Айатыгар таптаран,

Ааппын да умнан,

Ааттаһа көрөбүн харахтаргын…

 

* * *

Бу сайын эн баҕаҕынан

Күһүҥҥэ ыксыыр,

Тохтоло суох сотору-сотору

Ардыыр,

Тыалырар,

Тымныйар,

Торҕо күөҕүн өлбөөрдөр,

Билиҥҥиттэн саһарбыт сэбирдэҕин тамныыр…

Оттон мин

Үрүҥ түүннээх сайыным бүппүтүттэн

Ардаҕы кытта тэҥҥэ ытыыбын…

Чолбон. – 2014. – №2

 

Добавить комментарий

Ваш адрес email не будет опубликован. Обязательные поля помечены *