«Дьулурҕан» — «Арчы» хаһыат иһинэн!

Үтүө күнүнэн, күндү ааҕааччылар! «Дьулурҕан» аны республикатааҕы «Арчы-Забота» хаһыат иһинэн сыһыарыы быһыытынан тахсар буолла. Маныаха бастатан туран, «Сахабэчээт» тэрилтэ уонна хаһыат салалталарыгар, республикаҕа сахалыы тахсар спорт туһунан соҕотох хаһыаты өйөөн, ситимин быспакка салгыы бэчээттиир буолбуттарыгар барҕа махтал! Олох салҕанар. «Дьулурҕан» иннин диэки дьулуруйар.

Санатан эттэххэ, быйыл «Дьулурҕаҥҥа» үбүлүөйдээх сыл. Сүүрбэһис сылын бэчээттэнэн, спорду уонна физическэй култуураны сырдатан, суруйан кэллэ. Бу, эмиэ да кыра, эмиэ да улахан кэм. Бу кэм устатыгар «Дьулурҕан» Саха сирин бэчээтигэр бэйэтин миэстэтин булунан, спорду таптааччылар сэҥээриилэрин ылан, этэргэ дылы, бэйэтэ туспа бэриниилээх ааҕааччыланна. Билэргит курдук, «Дьулурҕан» араҥата киэҥ. Манна республика биллиилээх спортивнай суруналыыстарын тэҥэ, улуустар кэрэспэдьиэннэрин, спорду таптааччылар суруйуулара элбэхтик бэчээттэнэр. Быһата, күүстээх, таһымнаах актыып үлэлээн кэллэ диэххэ сөп.

«Дьулурҕан» аны «Арчы» хаһыат хонноҕун аннынан бэчээттэнэр буолбута, ситим быстыбата — биһиэхэ, оҥорон таһаарааччыларга улахан үөрүүлээх.

Син уруккутун курдук, хаһыат сүрүннээн олимпийскай көрүҥнэри таһынан, спорт национальнай көрүҥнэрин, адаптивнай спорду уонна оҕо спордун хото сырдатарга дьулуһар. Саха сирин спорда уонна физическэй култуурата сайдыытыгар, чөл, чэгиэн-чэбдик олох тарҕаныытыгар үлэлэһэр. Онуоха эһиги, ааҕааччылар эмиэ күүс-көмө, өйөбүл буоларгытыгар баҕарабыт. Бэйэҕит санааҕытын, сонуҥҥутун, сүбэҕитин-амаҕытын «Дьулурҕаҥҥа» суруйуҥ.

Сахалыы тыллаах спорт хаһыата сүтэн-симэлийэн хаалбакка, өрүү баар буоллун!

 

Петр Павлов, «Дьулурҕан» редактора.

Добавить комментарий

Ваш адрес email не будет опубликован. Обязательные поля помечены *