Дуобакка Европа-Америка матчтара: Бастакыга – хотторуу

Бу иннинэ сырдаппыппыт курдук, ыам ыйын 17-20 күннэригэр Дуобат аан дойдутааҕы федерацията (ФМЖД) lidraughts.org платоформаҕа, сүүс харахтаах дуобакка Европа уонна Америка континеннарын сүүмэрдэммит хамаандаларын уон дуоскаҕа интернетинэн онлайн күрэхтэһиилэрэ ыытыллар.

 

Европа хамаандатын састаабыгар биһиги биир дойдулаахпыт международнай гроссмейстер Матрена Ноговицына ылыллыбыта. Манна сыһыары тутан эттэххэ, Россия хамаандатыгар уон кыттааччыттан иккитэ – кэрэ аҥаар. Оттон Америка хамаандата аҥаардас эр дьонтон эрэ талыллылыбыт.

Бүгүн сарсыарда эрдэ ыытыллыбыт бастакы рауҥҥа хомойуох иһин, Матрена Ноговицына – Дерби Мартеска (Доминиканскай Республика) хотторон кэбистэ.

Россияттан бу матчка өссө международнай гроссмейстер Александр Гетманскай оонньуур. Кини, билигин АХШ-ка олорор Евгений Скляровтыын тэҥэнэстэ.

Онон бастакы оонньууга Европа – Американы 12:8 ахсаанынан хотто (үс кыайыы, алта тэҥнэһии, биир хотторуу).

Матрена аны бүгүн, ыам ыйын 18 күнүгэр канадец Шанг Вону кытта оонньуур. Спортсменкабытыгар ситиһиини баҕарыахха!

Оонньууну интернеккэ Россия дуобакка федерациятын официальнай сайтыгар https://shashki.ru/ көрүөххүтүн сөп. Онно Европа-Америка онлайн-матчтарын бырагыраамата, партиялара, рауннарынан көрдөрүүлэрэ тута суруллан иһэр.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *