Европа – Америка: Кырдьаҕас континент хамаандата инники таҕыста

Коронавирус пандемиятын кэмигэр күрэхтэһиилэр тохтоон турар түгэннэригэр арай, саахыматчыттар уонна дуобатчыттар эрэ күрэхтэһэр үөрүйэхтэрин намтаппаттар. Дьиэлэригэр олорон, интернетинэн күрэхтэһэллэрин, араас уустук задачалары суоттуулларын тохтоппоттор.

Бу, дойдулар икки ардыларыгар кэлии-барыы, айан тохтоон турар кэмигэр сүүс харахтаах дуобакка Европа уонна Америка бастыҥ дуобатчыттарын онлайн-матчтара тэриллибитэ кэрэхсэбиллээх. Үөрүүлээҕэ уонна киэн туттуулааҕа, Европа хамаандатын састаабыгар Саха сириттэн,билиҥҥи кэмҥэ спорт бу көрүҥэр биһиги тумус туттар киһибит – международнай гроссмейстер Матрена Ноговицына састаапка ылыллан, маннык улахан таһымнаах күрэхтэһиигэ төрөөбүт дойдутун, республикатын аатын көмүскүүр.

Эрдэ иһитиннэрбиппит курдук, бастакы түөрт түһүмэх түмүгүнэн кини биир кыайыылаах, икки тэҥнэһиилээх уонна биир хотторуулаах этэ. Оттон бэһис-алтыс-сэттис рауннарга Матрена – Гаити, Доминиканскай Республика уонна АХШ дуобатчыттарын кытта оонньоон, тэҥнэһиилэри ситистэ. Санатан эттэххэ, Америка хамаандата наар эр дьонтон талыллыбыт.

Балаһыанньа быһыытынан бу күрэхтэһиигэ биир дойдуттан икки спортсмен хамаандаҕа ылыллар. Россияттан иккис оонньооччу – международнай гроссмейстер Александр Гетманскай билиҥҥитэ оонньуута ортоһуор. Кини – икки кыайыылаах, үс тэҥнэһиилээх уонна икки хотторуулаах.

Аны, биһиги бириэмэбитинэн сарсын сарсыарда эрдэ, 15-тии мүнүүтэлээх үс кэнники оонньуу ыытыллыаҕа. Онно Матрена утарсааччыларынан буолуохтара: Карлос Ловерил (CWO), Кенсор Сайлор (Гаити), Игорь Рыбаков (АХШ). Бу оонньууларга кыыспыт ситиһиилээхтик оонньоон, көрдөрүүтүн тупсарарыгар баҕарыаҕыҥ.

Билиҥҥи, сэттэ түһүмэх түмүгүнэн 81:59 ахсаанынан Европа хамаандата инники иһэр.

Оонньууну интернеккэ Россия дуобакка федерациятын официальнай сайтыгар https://shashki.ru/ сиһилии көрүөххүтүн, билсиэххитин сөп. Онно Европа-Америка онлайн-матчтарын бырагыраамата, партиялара, рауннарынан көрдөрүүлэрэ тута суруллан иһэр.

Петр ПАВЛОВ. 

       

Добавить комментарий

Ваш адрес email не будет опубликован. Обязательные поля помечены *