Физкултуура учууталлара сыллааҕы үлэлэрин ырытыстылар

Саха Республикатын Үөрэххэ уонна наукаҕа министиэристибэтин иһинэн оҕолору уонна ыччаттары физическэй култуураҕа, спорка сайыннарыы киинэ 2019 сыллааҕы үлэтин түмүгүн таһаарда. Бу тэрээһиҥҥэ физкултуура учууталлара, тренердэр, иитиллээччилэр төрөппүттэрэ кыттыыны ыллылар.

 

 

Дириэктэр эбээһинэһин толорооччу, Саха Республикатын ыччат политикатыгар туйгуна  Афанасий Андреев республикатааҕы киин былырыыҥҥы ыыппыт үлэтин барытын иҥэн-тоҥон иһитиннэрдэ. Киин сүрүн үлэтинэн, государство сорудаҕынан быһыытынан оҕо сынньалаҥын тэрийии уонна чэбдигирдии буолар. Онуоха сыл устата эти-хааны, күүһү-уоҕу сайыннарыга, ГТО нуормаларын туттарыыга уонна спортивнай хамаандалары бэлэмнээһиҥҥэ элбэх тэрээһиннэр ыытыллыбыттара ахтылынна. Үөрэнээччилэр XV спартакиадалара, “Өбүгэ оонньуута” XIII фестиваль, саахымат олимпиадата, Ил Дархан бирииһигэр чэпчэки атлетикаҕа эстафета, “Президент оонньуулара” о.д.а. курдук улахан күрэхтэһиилэр ыытыллыбыттар.

Афанасий Андреев иһитиннэрбитинэн, аҥаардас ГТО нуормаларын туттарыыга сыл устата 48 тэрээһин ыытыллыбыт. Ол түмүгэр 308 оҕо кыһыл көмүс, 204 үрүҥ көмүс, 141 боруонса, барыта оҕо 652 бэлиэлэргэ туттарбыттар.

Киин биир сүрүн үлэтинэн “Связист” (“Эрэл”) лааҕыры үлэлэтии буолар. Лааҕырга 7-тэн 16-гар диэри саастаах оҕолор сайын устата үс сменанан (21 хонук) сынньаналлар, доруобуйаларын бөҕөргөтүнэллэр. Маны тэҥэ лааҕырга спорт көрүҥнэринэн үөрэтэр-эрчийэр түмсүүлэр тэриллэллэр. 2019 сылга барыта 213 оҕо лааҕырынан хабыллыбыт. Маны өссө элбэтиннэрэр сыал-сорук турар.

Саҥа үүммүт 2020 сылга Саха Республикатын Үөрэххэ уонна наукаҕа министиэристибэтин иһинэн оҕолору уонна ыччаттары физическэй култуураҕа, спорка сайыннарыы киинин ыытар үлэтин сүрүн сыалынан-соругунан миэстэҕэ Бүтүн Россиятааҕы ГТО нуорматын туттарыы кииннэрин аһыы; физическэй култууранан уонна спордунан дьарыктанар оҕолор уонна ыччаттар ахсааннарын элбэтии; оҕо спортивнай кулууптарын тэрийии; “Связист” (“Эрэл”) лааҕыр үлэтин тупсарыы, сайыннарыы, о.д.а. буолаллар.

Сүрүн иһитиннэрии кэнниттэн Афанасий Андреев ыйытыыларга хоруйдаата. Сүрүннээн, спортивнай инвентарынан хааччыйыы балаһыанньатын хайдаҕын, куонкурустарга кыттыы туһунан о.д.а. боппуруостары туоһуластылар.

Маннык тэрээһиҥҥэ хаһан баҕарар буоларын курдук, иһитиннэрии сүнньүнэн санаа атастаһыыта буолла. Тыл ылбыт дьон бары, республикатааҕы киин ааспыт сыллааҕы үлэтин “туйгунунан” сыаналаата.

Түмүк таһаарар түмсүү үөрүүлээх түгэнинэн наҕараадалары туттарыы буолла. Бастыҥнарга наҕараадалары СР Үөрэххэ уонна наукаҕа министиэристибэтин иһинэн оҕолору уонна ыччаттары физическэй култуураҕа, спорка сайыннарыы киин дириэктэрин эбээһинэһин толорооччу Афанасий Имматуллович Андреев уонна республикатааҕы киин ГТО отделын начаалынньыга Альберт Григорьевич Васильев туттардылар.

Ол курдук, Дьокуускай куорат үөрэххэ управлениетын физическэй култуураҕа уонна байыаннай-патриотическай иитиигэ отделын старшай методиһа Петр Иванович Хабаров – СР Үөрэххэ уонна наукаҕа министерствотын Махтал суругунан наҕараадаланна. Сусанна Михайловна Егорова “Президент оонньуулара” регионнааҕы күрэхтэһии ыытыллыытыгар көмөтүн иһин, Хатас орто оскуолатын физкултуураҕа уруогун учуутала Эдуард Николаевич Саввинов ГТО нуорматын туттарыы регионнааҕы күрэхтэһиитэ ыытыллыытыгар көмөтүн иһин эмиэ Махтал суруктарынан бэлиэтэннилэр. Дьокуускай куорат 21 нүөмэрдээх орто оскуолатын хамаандата Ил Дархан бирииһигэр чэпчэки атлетика эстафетатыгар кыайыытын иһин өйдөбүнньүк кубогынан, дипломунан наҕараадаланна.

Ити курдук, республикатааҕы киин үлэтигэр күүс-көмө, өйөбүл буолар специалистар, физкултуура учууталлара Туоһу суруктарынан бэлиэтэннилэр.

Наҕараадаламмытарга уонна көрсүһүү кыттыылаахтарыгар анаан – СР народнай артыыстара Екатерина уонна Алексей Егоровтар “Сырдык сүүрээн” оҕо студияларын иитиллээччитэ, куорат оскуолатын төрдүс кылааһын үөрэнээччитэ Алиса Ионина сахалыы ырыанан бэйэтин эҕэрдэтин тиэрдибитэ, дохсун ытыс тыаһынан сыаналанна.

Ити курдук, тэрээһин кыттыылаахтара саҥа сылга – саҥа соруктары ситиһэргэ сыалланан тарҕастылар.

Петр ПАВЛОВ.

Ааптар хаартыскаҕа түһэриитэ.  

 

Добавить комментарий

Ваш адрес email не будет опубликован. Обязательные поля помечены *