Гермогенов, Апросимова, Большакова – кыайдылар!

Бу күннэргэ Дуобат аан дойдутааҕы федерациятын (FMJD) көҕүлээһининэн “Нациялар кубоктара” диэн, сүүс харахтаах дуобакка онлайн-турнир ыытылла турар. Эрдэ иһитиннэрбиппит курдук, бу күрэхтэһиигэ эр дьоҥҥо 29, дьахталларга 11 хамаанда кыттар. Хас биирдии көрсүһүү түөрт дуоскаҕа ыытыллар. Турнир от ыйын 12 күнүгэр түмүктэнэр.

 

Бу күрэхтэһиигэ Россия сүүмэрдэммит хамаандатын аатыттан биһиги дуобатчыттарбыт: гроссмейстер Николай Гермогенов, спорт маастардара Алексей Большаков, Сандаара Апросимова, Тунаара Федорова, Алена Большакова, Аяника Колодезникова, Сайаана Наумова кытталлар.

Россия эр дьон хамаандата бастакы оонньууга Италияны 5:3 ахсаанынан хоппута. Иккис көрсүһүүгэ, бөөлүүн Нидерланды хамаандатын 6:2 ахсаанынан кыайда. Бу оонньууга биһиги Николай Гермогеновпыт утарсааччытын С.Хармсманы бэринэргэ күһэйдэ. Хамаанда атын оонньооччуларыттан А.Чижов эмиэ кыайда, А.Гетманскай уонна Д.Ильин тэҥнэстилэр. Аны үһүс көрсүһүүгэ сарсын Россия – Бразилия хамаандалара оонньуохтара.

Оттон Россия дьахталларга хамаандата Суринам уонна Эстония хамаандаларын 8:0 ахсаанынан холкутук хотто. Бу оонньууларга биһигиттэн Сандаара Апросимова, Алена Большакова иккилии кыайыыны ситистилэр. Салгыы киирсиигэ россияннар бразилецтары кытта көрсүөхтэрэ. Дуобатчыттарбытыгар ситиһиилээх оонньууну баҕарыахха!

“Дьулурҕан”.  

Добавить комментарий

Ваш адрес email не будет опубликован. Обязательные поля помечены *