Ил Дархан бирииһэ: Мэйн Кениг былырыыҥҥы кыайыытын чиҥэтиэ дуо?

Саха Республикатын президенэ Айсен Николаев дьаһалынан бу субуотаҕа – от ыйын 4 күнүгэр Дьокуускайдааҕы ипподромҥа сайыҥҥы сүүрдүүлэр ыытыллыахтара. Бары билэ-көрө сылдьаргыт курдук, коронавирус дьаҥынан сибээстээн бу күрэхтэһии көрөөччүтэ суох ыытыллыаҕа. Ол оннугар телевизорга быһа көрдөрүү тэриллиэҕэ.

 

Сыл саамай быһаарыылаах уонна кэтэһиилээх күрэхтэһиитигэр Ил Дархан, Правительство бириистэригэр уонна саастарынан, хааннарынан араарыллыбыт хас да сүүрдүү буолуоҕа.

Биллэн турар, сүрүн киирсии Ил Дархан бирииһин буолара күүтүллэр. Бу, 2400 миэтэрэ дистанцияҕа сүүрдүү кыайыылаахтара – биэс мөлүйүөн солкуобайы үллэстиэхтэрэ. Күүстээхтэр, быһыйдар бэс ыйын 15 күнүгэр ыытыллыбыт сүүрдүү түмүгүнэн быһаарыллан, сүүмэрдэнэн тураллар. Арай, сүүмэрдиир күрэхтэһии бастакы сүүрдүүтүн кыайыылааҕа Скай Файтер (Мэҥэ Хаҥалас) эчэйиилээх буолан, туоруур буолла. Кини оннугар бириэмэтинэн көрүллэн, Свидетель Барс (Амма, баайааччыта – А.А. Баишев) киллэрилиннэ.

Сүүрдүүнү субуотаҕа сарсыарда 09:00 чаастан “Саха” национальнай көрдөрөр-иһитиннэрэр хампаанньа телевизорынан быһа биэриэҕэ. Онон бука бары “күөх экраммыт” нөҥүө күүтүүлээх, кэтэһиилээх сүүрдүүбүтүн дьэ, дуоһуйа көрүөхпүт.

Санатан эттэххэ, былырыыҥҥы Үс Хатыҥҥа буолбут сүүрдүүгэ Ил Дархан бирииһигэр Мэйн Кениг (Чурапчы) бастаабыта, Скай Файтер (Мэҥэ Хаҥалас) биэтэккэ иккиһинэн кэлбитэ. Оттон Корибиан Бой (Үөһээ Бүлүү) үһүс буолбута. Бу сырыыга дьэ хайдах буолар? Мэйн Кениг былырыыҥҥы кыайыытын чиҥэтиэ дуо? Мэйзи Кинг (Амма), Есаул (Нам), Блек Джет (Мэҥэ Хаҥалас) бэлэмнэрэ үчүгэй курдук. Бу сырыыга буккууру таһаараллара буолуо…

От ыйын 4 күнүгэр буолуохтаах сүүрдүү барыллааһын бырагыраамата:

Бастакы сүүрдүү – 800 м “Сайыҥҥы бириис”: Төлөн, Леди Левинсон, Нумизматик, Джоконда, Арктика, Афина, Ассамблея.

Иккис сүүрдүү – 1000 м “Критериум бириис”: Стар Трэк, Варадеро, Суфражистка, Кыыдаана, Кул Джет.

Үһүс сүүрдүү – 1600 м Окс: Хотуҥ Мэҥэс, Николь, Полар Стар, Армада, Атланта.

Төрдүс сүүрдүү – 2000 м: Түмэн, Губернатор, Гоин Ап, Арылхан, Норд Стар, Сириус, Артик Бой, Голден Асс, Блэк Грек.

Бэһис сүүрдүү – 2400 м Ил Дархан бирииһэ: Есаул, Блэк Джет, Корибиан Бой, Анкенди, Свидетель Барс, Джафар, Альтер, Брокер Барс, Мэйзи Кинг, Майн Кениг.

Алтыс сүүрдүү – 3200 м Правительства бирииһэ: Тускул, Литл Лайт, Сайбер Шот, Стимул, Арабика, Айнцер Гут, Жирков, Кэрэл, Марокко, Сандал.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *