Индия тустууга сулуһа Сушил Кумары көрүөхпүт

Улуу тренер Дмитрий Петрович Коркин кэриэһигэр көҥүл тустууга норуоттар икки ардыларынааҕы XII турнир биир улахан ааттаах-суоллаах кыттааччытынан – Олимпиада икки төгүллээх призера, аан дойду чемпиона индус Сушил Кумар буолара күүтүллэр. Биһиэхэ биллибитинэн, соторутааҕыта Нур-Султаҥҥа аан дойду чемпионатыгар кини биһиги спорка салайааччыларбыт Д.П. Коркин турнирыгар ыҥырыыларын ылыммыт уонна кэлэргэ эрэннэрбит.

 

 

Сушил Кумар – Индия көҥүл тустууга сулуһунан биллэр. Билиҥҥитэ индустартан көҥүл тустууга аан дойду соҕотох чемпиона. Элбэх наҕараадалардаах, дойдутугар улаханнык ытыктанар киһи. Кини төһө да 36 саастааҕын үрдүнэн, билигин даҕаны үрдүк таһымнаах күрэхтэһиилэргэ кытта сылдьар. Ол курдук, быйыл сайын Дагестаҥҥа тиийэн анал эрчиллиини баран, салгыы Минскэйгэ албан аатырбыт Александр Медведь бирииһигэр норуоттар икки ардыларынааҕы турнирга 74 киилэҕэ түөрт эргиир тустан, бочуоттаах бэһис миэстэни ылбыта. Манна даҕатан эттэххэ, Сушил быйылгыттан дагестанец Камал Маликов салалтатынан дьарыктанар.

Оттон Нур-Султаҥҥа буолбут аан дойду чемпионатыгар тэҥ киирсиигэ Азербайджантан кыттар дагестанец Гаджимурад Гаджиевка 9:11 ахсаанынан хотторбута. Өйдөөн көрбүккүт буолуо, биир түгэҥҥэ утарсааччытын илиитин хам тутан баайа сылдьан “кочергалаан” түһэрэн, 4 баалы сүүйбүтэ. Биһиги Николай Охлопковпыт быйыл Европа чемпионатыгар армянин Арсен Арутюнянныын киирсиитигэр оруобуна итинник, киһитин илиитин кууһан ылан быраҕан түһэрбитин, көҥүллэммэт албас диэн, аахсыбатахтара.

Саха тустууну таптааччылара Сушил Кумары өйдөөн хаалбыт биир түгэннэринэн, 2008 сыллаахха Пекиҥҥэ ыытыллыбыт Олимпийскай оонньууларга 66 кг ыйааһыҥҥа боруонса мэтээли ким ыларын быһаарсар хапсыһыыга Леонид Спиридоновы кытта тустуута буолар. Ол тустууну харахпар бу баардыы өйдүүбүн. Тэҥ киирсиигэ сэрэбиэй быһыытынан, атахтан ылыы (оччолорго итинник быраабыла баара) биһиги бөҕөспүтүгэр тосхойбута. Ону Леонид киһитин атаҕыттан ылан туруйалата сылдьан, утары албаска түбэһэн, бэрт кыһыылаахтык хотторбута.

Ылан көрдөххө, Сушил Кумар үс Олимпиадаҕа кыттыбыта: Афиныга 2004 сыллаахха 60 киилэҕэ 14-c буолбута, 2008 сылаахха Пекиҥҥэ боруонса, 2012 сыллаахха Лондоҥҥа үрүҥ көмүс мэтээллэринэн наҕараадаламмыта. Итини тэҥэ биир улахан ситиһиитинэн, 2010 сыллаахха Москваҕа аан дойду чемпионатыгар кыайыыта буолар.

Сушил 2014 сыллаахха тустуутун тохтотон баран, 2017 сылга норуоттар икки ардыларынааҕы көбүөргэ иккистээн төннүбүтэ.

Дьэ, итинник улахан баай уопуттаах бөҕөс – аан дойду, Азия чемпиона, Олимпиада икки төгүлээх призера Сушил Кумар быйылгы, Д.П. Коркин аатынан турниры киэргэтиэ.

Петр ПАВЛОВ.       

Хаартыскаҕа: аан дойду чемпиона Сушил Кумар тренердэрин кытта.

Ааптар түһэриитэ.

Добавить комментарий

Ваш адрес email не будет опубликован. Обязательные поля помечены *