Иннокентий Игнатьев 90 сылыгар дойдутугар Мэҥэҕэ тустуу күрэхтэһиитэ тэрилиннэ

Бу күннэргэ республика үрдүнэн ССРС народнай депутата, “Бочуот Бэлиэтэ” уордьаннар кавалердара, РСФСР култууратын үтүөлээх үлэһитэ, Саха АССР норуотун хаһаайыстыбатын үтүөлээх үлэһитэ, РСФСР Миниистэрдэрин Сэбиэтин иһинэн Саха АССР Миниистирдэрин Сэбиэтин бастайааннай бэрэстэбиитэлэ, Саха сирин, Дьокуускай, Алдан куораттарын, Мэҥэ Хаҥалас улууһун бочуоттаах гражданина Иннокентий Гаврилович Игнатьев төрөөбүтэ 90 сылыгар аналлаах араас тэрээһиннэр ыытылыннылар.

Олортон биирдэстэринэн, төрөөбүт улууһугар бу кэрэ бэлиэ түгэҥҥэ анаан 2004-2006 сылларга төрөөбүт уолаттарга көҥүл тустууга республикатааҕы турнир буолла. Манна сыһыары тутан эттэххэ, Иннокентий Гаврилович Москватааҕы физическэй култуура институтун үөрэнэн бүтэрэн кэлэн, биир идэлээхтэринээн Николай Тарскайдыын, Валерий Кочневтыын, Роман Бурнашевтыын Саха сирин спордун өрө тардыыга элбэх өрүттээх үлэни ыытыспыт үтүөлээх.

Күрэхтэһиигэ Амма, Томпо, Чурапчы, Нам улуустарын уонна Мэҥэ Хаҥалас нэһилиэктэрин эдэр бөҕөстөрө, барыта 121 тустуук күөн көрүстэ.

Сытыы хапсыһыылар түмүктэригэр күрэхтэһии кылаабынай судьуйатынан үлэлээбит норуоттар икки ардыларынааҕы категориялаах судьуйа Аркадий Тастыгин уонна сүрүн сэкиритээр Андриан Захаров быһаарыыларынан, бэйэлэрин ыйааһыннарыгар кыайыылаахтарынан буоллулар: 32 кг – Ньургун Птицын (Төҥүлү), 35 – Юра Орлов (Томпо), 38 кг – Артур Андреев, 41 кг – Мичил Мандаров (иккиэн – Чурапчыттан), 44 кг – Арсений Атласов (Хара), 48 кг – Коля Захаров (Нам), 52 кг – Дамир Явловскай, 57 кг – Арсен Халгаев (иккиэн – Чурапчыттан), 62 кг – Игорь Гермогенов (Нам), 68 кг – Айтал Белолюбскай (Аллараа Бэстээх), 75 кг – Ян Егоров (Чурапчы), 75-тэн үөһэ кг – Сеня Кононов (Амма).

Кыайыылаахтар мэтээлинэн, грамотанан уонна өйдөбүнньүк бэлэхтэринэн наҕараадаланнылар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *