ИОСИФ КОБЯКОВ БАСТАКЫ АЙАР БИЭЧЭРЭ

Кулун тутар 24 күнүгэр П.А. Ойуунускай аатынан литература түмэлигэр Кэбээйи улууһун олохтооҕо, Россия Суруйааччыларын сойууһун чилиэнэ, бэйиэт Иосиф Кобяков бастакы айар киэһэтэ буолан ааста.

Поэзияны таптааччылар уонна суруйааччылар мустубут тэрээһиннэрин норуот бэйиэтэ Наталья Харлампьева иилээн-саҕалаан ыытта. Бэйиэт Иосиф Кобяков Дьокуускай куоракка бастакы айар биэчэрэ ыытылларыттан улаханнык долгуйарын, хоһоон айарыгар эдэр сааһыгар олохтон туораабыт убайа Григорий Кобяков тирэх буолбутун кэпсээтэ. Бастакы холонууларын Саргылаана Спиридонова биһирээн өйөөбүтүн, дьоҕура сайдарыгар көмө буолбутун иһин махтанна. Баар итэҕэстэрин тута быһаара сатыырын, сайдыы барарын туһугар үлэлэһэрин бэлиэтээтэ уонна хоһооннорун ааҕан иһитиннэрдэ. Норуот суруйааччыта Николай Лугинов ааҕааччыны өрүкүтэр хоһооннордоох «Аптаах ырыа» кинигэтин биһирээбитин, аһаҕас үөрэтэр ырытыы кэпсэтии тахсыбытын, поэт норуот сүрүн кыһалҕаларын таарыйбытын сөптөөҕүнэн аахта, суруйааччылар элбэҕи көрбүт, билбит уопуттарын туһанан киниэхэ көмөлөһөргө бэлэмнэрин эттэ. Поэтесса Саргылаана Спиридонова Иосиф Кобяковы кытта хайдах билсибитин, хоһооннорун сөбүлээбитин туһунан кэпсээтэ.

«Чолбон» сурунаал сүрүн эрэдээктэрэ Гаврил Андросов поэзия сайдарыгар духуобунай култууралаах поэттар наадаларын бэлиэтээтэ. Норуот суруйааччыта Сэмэн Тумат Иосиф Кобяков дириҥ ис хоһоонноох саҥа хоһооннорун кинигэтэ тахсарын эрдэттэн кэтэһэрин биллэрдэ. Үйэлээх-сааска норуотун туһугар тугу эрэ олус туһалааҕы, наадалааҕы айар поэт кинигэтэ тахсарыгар үбүнэн көмөлөһүү боппуруоһун быһаарарга ыҥырда. Былатыан Ойуунускай аатынан Судаарыстыбаннай бириэмийэ лауреата Елена Слепцова-Куорсуннаах суруйааччылар Алампаны, Өксөкүлээҕи, Ойуунускайы уо.д.а. үйэтитэргэ улахан тэрээһин ыытыллыахтааҕын кэпсээтэ, ааптар уонна бэйэтин хоһооннорун ааҕан иһитиннэрдэ. Дьоро тэрээһиҥҥэ бэйиэт Рустам Каженкин, суруйааччы Евдокия Иринцеева-Огдо, эдэр бэйиэт Николай Васльев-Харыйалаах Уола, Кэбээйиттэн кэлбит анал делегация эмиэ бэйэлэрин эҕэрдэлэрин тиэртилэр. Кинилэр Иосиф Кобяков саҥа кинигэтин тула санааларын үллэһиннилэр, айар үлэтэ салгыы табылла турарыгар баҕардылар.

– Айар биэчэрим наһаа үчүгэйдик ааста. Элбэх суруйааччылар, ааҕааччыларым кэлэн, санааларын үллэстэн үөртүлэр. Биэчэрбин тэрийэн ыыппыт Суруйааччыларым сойууһугар улаханнык махтанабын, — диэтэ түмүккэ Иосиф Кобяков.

  

 

Иван ОСИПОВ

Добавить комментарий

Ваш адрес email не будет опубликован. Обязательные поля помечены *