Иван Рязанскай

Рязанскай Иван Иванович – 1951 сыллаахха Абый оройуонугар, Майыар нэһилиэгэр төрөөбүтэ, үрдүк үөрэхтээх. Дьааҥы улууһугар олорбута, үлэлээбитэ. 323 нүөмэрдээх профессиональнай училищеҕа хаһаайыстыбаннай чаас солбуйааччытынан, кэлин директорынан үлэлээбитэ. РФ профүөрэхтээһиҥҥэ бочуоттаах үлэһитэ, СӨ профүөрэхтээһиҥҥэ туйгуна. РФ үлэҕэ бэтэрээнэ. Билигин Дьокуускай куоракка олорор.

 

 

 

 

Ахтылҕан

Санаам түспүт түгэннэрэ,
Күлүм алан эрдэхтэрэ,
Тэһэ аспыт кэрдиистэрэ,
Сүтэн оһон истэхтэрэ…

Бүгүн кэлэн дьэ саныыбын
Кэрэ кэмнэр саспыттарын,
Доҕор-атас дьоннорбунаан
Арахсыспат буоларбытын.

Үөрэхтэнэн үлэ булан,
Онон-манан тарҕастахпыт.
Кэргэн ылан, дьиэ тэринэн,
Оҕо-уруу төрөттөхпүт.

Сааһырдахпыт — олох устун
Санаһабыт өрүү ахатан.
Дөрүн, дөрүн кэпсэтэбит,
Билсэ-көрсө олоробут.

Оҕолорбут билсиһэннэр
Сибээстэһэ олордоллор,
Биһигини утумнааннар
Дьоһун киһи буолуохтуннар.

Баҕарабын эһиэхэ

Сааскы кэммит өрөгөйө,
Оҕо-аймах өйдөбүлэ.
Куруук өйгө хатаныаҕа,
Олох суолун санатыаҕа.

Баҕарабын бары дьоммор,
Иллээх, чэгиэн доҕоттору.
Олох уустук түгэнигэр,
Бэйэҥ өйгүн тургутары.

Күн сирин бары үтүөтүн,
Тулалыыр эйгэ кэрэтин,
Хараҥа күн күөрэйбэтин,
Хара былыт халыйбатын.

Бэйэ бэйэни өйөһүҥ,
Кыамматтарга тирэх буолуҥ,
Кырдьаҕаһы өрө тутуҥ,
Эһээ, эбээ тылын истиҥ.

Доҕор-атас бука бары
Иллээх сыһыан олохтуоҕуҥ,
Ыччат дьонум ону өйдөөҥ
Өрүү өрө тута сылдьыҥ!

Иллээх олоҕу ыыттаҕа

Иһийэн хоспор олорон,
Ийэм куолаһын истэбин.
Ииппит оҕо манньыйан,
Истиҥ тыл ыытабын.

Ийэм хара харахтара
Иччилээхтик көрөллөрө,
Иэйиим кэлэр кэмнэригэр,
Илдьит буолан киирдэхтэрэ.

Иллэҥ күнүм ыга кууһан,
Ийэбин санаан кэлэбин.
Иһирэхтик алгыс ыытан,
Истиҥ мичээр бэлэхтиирин.

Иэрэн туран сүбэлиирэ,
Ийэ дойдутун таптыыра,
Истиҥ тылын сипсийэрэ,
Инникилээх киһи диирэ.

Ийэм бэйэтин дууһата
Иирэ кэтэҕэр састаҕа,
Иһирэх кэрэ бэйэтэ
Иллээх олоҕу ыыттаҕа.

Сайылыгым барахсан

Сайылыгым барахсан,
Санаан кэллим эйигин,
Сойбот, оспот тапталым
Саҕаланта бу мантан.

Сибэккилээх сыһыыта,
Үрдүк систээх мыраана,
Халыҥ мастаах тайҕата,
Хатыҥ чараҥ долгуна,

Дьэҥкир уулаах күөллэрэ,
Баһаам элбэх балыга,
Кус-хаас эмиэ үөскүүрэ
Дууһам үөрэр буолара.

Дьоһун дьону кэрэхсии,
Олоробун бу сэргии,
Хаһан эрэ тиийиэҕим
Ахтылҕаммын таһаарыам.

Кэскиллээҕи эттэрбин,
Санааларбын ситтэрбин,
Олох кэрэ суолунан,
Өрүү үөрэ бардарбын.

Санаам кэрэ кэрчиктэрин

Санаам кэрэ кэрчиктэрин,
Сааһылыыбын, сыымайдыыбын.
Сайар, иэйэр үтүө тылбын,
Саҥа дьоммор бэлэхтиибин.

Сүтэн хаалбат уран тылым,
Сүһүөхтэрин дьаарыстыыбын,
Симэлийбэт өргөс этим,
Сөһүргэстии сылдьыбатын.

Сэрэнэммин талан, ылын,
Сиэтэн өйбөр киллэрэбин,
Сайа охсор тыалтан куотан,
Сыһыы устун дьаарьайабын.

Саатар биирдэ үөрэр күннэр
Салҕаныахтар этэ күүрэн,
Сэһэн буолан түүнүн үөрэн,
Сэҥээрбиччэ кууһуохтуннар.

Сааһыраммын аны кэлэн,
Саараҥныыбын арыт көрөн.
Саппаҕырбат уһун олох,
Сүппэт бу ыраас олблох.

Дабаан Уола, 2019 сыл.

Добавить комментарий

Ваш адрес email не будет опубликован. Обязательные поля помечены *