Күндү кэллиэгэлэр, национальнай бэчээт эйгэтин үлэһиттэрэ!

«Сахабэчээт» Саха Өрөспүүбүлүкэтин Судаарыстыбаннай автономнай тэрилтэтин уонна тус бэйэм ааппыттан Сахабыт сирин Национальнай бэчээтин күнүнэн истиҥник эҕэрдэлиибин!

2020 сыллаахха олунньу 13 күнүгэр Саха Өрөспүүбүлүкэтин Ил Дархана А.С.Николаев от ыйын 1 күнүгэр Национальнай бэчээт күнүн бэлиэтиир туһунан 1007 №-дээх Уураахха илии баттаабыта.  История кэпсииринэн, саха тылынан аан маҥнайгы «Саха дойдута» диэн  хаһыат бастакы нүөмэрэ 1907 сыл от ыйын 1 күнүгэр тахсыбыта. Бу историческай чахчыга олоҕуран, сахалыы тыллаах бастакы хаһыат бэчээттэнэн тахсыбыт күнэ — национальнай бэчээт күнүнэн биллэриллибитэ. Бу күн сахалыы бэчээт биһиги норуоппут сайдыытыгар сүҥкэн оруоллааҕын бэлиэтиир, инники сайдар кэскилин түстүүр суолталаах.

Бүгүн кумааҕы хаһыаттар, интернет-сайтар, социальнай ситимнэр, сайдыылаах информационнай технологиялар, ол аата урукку уонна саҥа суруналыыстыка икки ардыгар, ортотун булан, таба дьүөрэлээн сайыннарар сорук турар. Сахалыы тылынан информацияны киэҥник тарҕатар электроннай таһаарыылар интернет куйаарыгар тэҥҥэ барсан, аныгы көлүөнэ дьоҥҥо бэйэлэрин булуналларыгар, сомоҕолоһоллоругар тирэх буолуоҕа. Инникитин да сахалыы тыллаах суруналыыстыка сайдар суолунан эрэллээхтик хардыылыа диэн эрэнэбин.

Саха суруналыыстыкатын сайдыытыгар үлэлии-хамсыы сылдьар биир идэлээхтэрим, сытыы бөрүөҕүт хаһан да сыппаабатын, айымньылаах, үрдүк көрдөрүүлээх үлэни, ситиһиини баҕарабын!

Ньургуйаана СТРУЧКОВА,

«Сахабэчээт» САТ генеральнай дириэктэрэ.

Добавить комментарий

Ваш адрес email не будет опубликован. Обязательные поля помечены *