Күрэхтэһиилэр күүрээннэрин суохтаатыбыт

Ыраас, былыта суох халлааҥҥа этиҥ эппитинии, бу дьыл кулун тутар ыйын саҥатыттан биһиги дойдубутун коронавирус дьаҥа буулаан, төрдүс ыйбытын дьиэбитигэр бүгэн олоробут. Маннык буолуо диэн ким даҕаны түһээн да баттаппатах буолуохтаах. Дьэ, дьикти күннэр-дьыллар.

 

Оттон итиниэхэ диэри биһиги, этэргэ дылы, тииспитин-уоспутун оҥостон, кулун тутар 6 күнүттэн саҕаланар, сахаттан бастакы олимпийскай чемпион Роман Дмитриев кэриэһигэр эдэрдэргэ көҥүл тустууга норуоттар икки ардыларынааҕы VIII турниры кэтэспиппит ээ. Онно биллэрии быһыытынан, уонча дойду кыттыахтааҕа. Олимпийскай чемпион Анатолий Белоглазов, Россия эдэрдэргэ хамаандатын сүрүн тренерэ Абдусалам Гадисов – бочуоттаах ыалдьыттар быһыытынан кэлэллэр диэн буолбута. Онтукайбыт баара, күрэхтэһии ыы муннугар анньан кэлбитин кэннэ, эмискэ коронавирус ыарыыта тарҕаныытынан, турниры биллибэт кэмҥэ диэри көһөрбүттэрэ. Ол эрээри, сэрэйдэххэ, быйыл ыытыллыбата буолуо дии саныыбын.

Ити кэмҥэ эр дьоҥҥо тустууга хамаандабыт Бурятияҕа “Байкал Оупен” норуоттар икки ардыларынааҕы турнирга тиийэн баран, эмиэ дьаҥынан сибээстээн түһүлгэ соһуччу тохтотуллан, бөҕөстөрбүт халтай сылдьымаары – буряттары, казахтары кытта бииргэ эрчиллэн баран төннүбүттэрэ.

Коронавирус аан дойдуну аймаан, спорт күрэхтэһиилэрэ ханан даҕаны тохтотуллубуттара. Оннооҕор Токиоҕа ыытыллыахтаах сайыҥҥы Олимпийскай оонньуулар эһиилги сылга көһөрүллүбүттэрэ.

Тустуу эйгэтиттэн коронавирус дьаҥыттан Россия дьахталларга хамаандатын сүрүн тренерэ Магомед Алиомаров сырдык тыына быһынна. Аны биллиилээх бөҕөстөр: кубинец Исмаэль Борреро, дагестанецтар Шарип Шарипов, Абдулрашид Садулаев коронавирус ыарыытыгар хаптаран баран үтүөрбүттэрин туһунан суруйаллар. Онон бу ыарыы кими да харыстаабат эбит диэхпин баҕарабын.

Күн-дьыл субуллан ааһан иһэр. Билигин бэс ыйа саҕаланна. Тустуу аан дойдутааҕы холбоһугун (UWW) 2020 сыллааҕы календарын быһыытынан, кулун тутартан саҕалаан Мароккоҕа, Венгрияҕа, Кытайга, Болгарияҕа – Олимпиадаҕа сүүмэрдиир квалификационнай турнирдар ыытыллыахтаахтара. Ити курдук, элбэх улахан таһымнаах турнирдар буолуохтаахтара – барыта тохтотуллубута. Манна өссө Россия иһинээҕи күрэхтэһиилэри, ол иһигэр муус устар ыйга Улан-Удэҕэ, эр дьоҥҥо дойду сүрүн хамаандатын састаабын Олимпиадаҕа сүүмэрдиир Россия чемпионатын эбэн кэбис…

Онон күрэхтэһиилэрбит ардылара атта. Оттон спортсменнар дьиэлэригэр олорон дьарыктанан, син биир улаханы эбиммэттэр дии саныыбын. Аны күрэхтэһиитэ суох – сайдыы эмиэ кэлбэт. Арай, бары биир балаһыанньаҕа сылдьаллар диэн бэйэни уоскутунуохха эрэ сөп. Дьэ, туох-хайдах буолабыт? Оннооҕор, коронавирус намтаабатаҕына, эһиилги Олимпийскай оонньуулар ыытыллыбат чинчилээхтэр. Оччоҕо, тренердэр уонна спортсменнар хас эмэ сылы быһа ыра оҥостон бэлэмнэммит, сыал-сорук туруоруммут үлэлэрэ-хамнастара таах хаалар. Ол эрээри, барыта этэҥҥэ буоларыгар баҕарыахха.

Ылан көрдөххө, коронавирус эмискэ симэлийэн хаалыа суох. Сэрэйдэххэ, аны күһүҥҥэ диэри спортивнай күрэхтэһиилэр ыытыллыбаттара буолуо. Ол гынан, тустууну ылан көрдөххө, үөрэтэр-эрчиллэр түмсүүлэр өссө тэриллиэхтэрэ. Биир тылынан, сыллааҕы календарьга улахан хамсааһыннар таҕыстылар. Билигин иһиттэх тухары, коронавируһунан сибээстээн, спорт бары көрүҥнэрин федерациялара календарьнай былааннарын хаттаан, аччатан-кылгатан оҥорорго дьулуһуллар. Өскөтүн ыарыы тохтоотоҕуна, өссө ыкса күһүн Бурятияҕа былааннаммыт Россия көҥүл тустууга чемпионата буолуоҕа. Өссө этэллэринэн, баҕардар Саҥа дьылга диэри аан дойду чемпионатын ыытарга былаанныыллар. Ол эрээри, чопчу ханнык даҕаны этиилэр, соруктар билиҥҥитэ иһиллибэттэр. Бары уопсай балаһыанньаны кэтииллэр, ким даҕаны күттүөннээхтик быһаарбат. Оттон биһиги билэн, көрөн иһиэхпит.

Дьэ, дьикти күннэр-дьыллар үүннүлэр, барыта онлайн буолан баран олоробут. Маннык буолуо эрэ дии санаабатахпыт. Хайдах эрэ олохпут тохтоон хаалбыт курдук. Ол эрээри, маннык ыарахан кэмҥэ бары биир киһи курдук уопсай сүбэнэн, түмсүүнэн, бэйэбит уонна атыттар тустарыгар эппиэтинэспитинэн эрэ бу ыарыыны кыайыахпыт, урукку көхтөөх олохпутугар төннүөхпүт. Күрэхтэһиилэр күүрээннэринэн олоруохпут.

Дьиэҕитигэр олоруҥ! Бэйэҕитин уонна тулалыыр чугастааҕы дьоҥҥутун харыстаан! Чэгиэн-чэбдик буолуҥ!  

 

Петр ПАВЛОВ.           

Добавить комментарий

Ваш адрес email не будет опубликован. Обязательные поля помечены *