ХАМИС ШАМИЛОВА (Дагестан)

Даргин омук поэтессата Хамис Ахмедхановна Шамилова 1973 сыллаахха Дагестан АССР Аку­ша оройуонун Муги сэ­лиэн­ньэтигэр төрөөбүтэ. Дагестан судаарыстыбаннай универ­си­тетын филологияҕа факультетын уонна А.М. Горькай ааты­нан Литература институтун бүтэрбитэ, Дагестан судаа­рыс­тыбаннай университетын юридическай факультетын аспи­ран­туратыгар, Дагестан судаарыстыбаннай педагогикаҕа уни­верситетын психологияҕа факультетыгар үөрэнэ сылдьыбыта.

Махачкала куоракка олорор. Бэчээт эйгэтигэр үлэлээбитэ, били­гин олохтоох телевидениеҕэ тус бырайыактарын салайар, ону тэҥэ документаль­най киинэлэри устар. Икки хоһоон хомуурун­ньу­гун ааптара, Россия Суруйааччыларын сойууһун чилиэнэ. Дагестан Өрөспүүбүлүкэтин култуура­тын үтүөлээх үлэһитэ, Тыйаатыр искусствотыгар уонна киинэ эйгэтигэр судаарыстыбаннай бириэ­мийэ лауреата.

 

ЭБЭМ АҺЫН КЫРЫАТА

Эбээ, кэпсээ,

Эн аһыҥ кырыатын

Хайаттан саас түһэрбитэ дуо?

Эбээ, кэпсээ!

Эн үрдүгэр кэм элиэтээн

Кырыатын тохпута дуу?

Эбэтэр,

Сэриигэ өлбүт инилэриҥ

Аһыылара ааспат дуу?

Сэттиэлэр этэ кинилэр…

Эдэр-чэгиэн этилэр…

Төннүбэтэхтэрэ түөртэрэ…

Эбээ, эн сүрэҕиҥ,

Эт, ыстаал дуу, эбэтэр,

Сүрэҕиҥ оннугар түөскэр

Күн түһэн умайар дуу?

Эбээ, эн

Кутурҕан үрүҥ өҥүнэн

Хайа кубаҕай хаарыныы

Үйэҥ тухары таҥнаҕын.

Эйигин самнары охсубута

Уолгун сүтэрии алдьархайа,

Улуу сүтүгүҥ ыар баттыга

Сүрэххэр тааһыран сыппыта.

Эбээ,

Эн – мин Каабам буолаҕын,

Холобур туттар котокум –

Күн анныгар баар күндүм.

 

* * *

Сүрэхпиттэн хостоон

Таастары тамныам,

Туруулаһыы диэн ааттаах

Үөдэн түгэҕэр.

Сизиф үлэтэ.

 

* * *

Иһиллэр,

Байҕал уутун урсунугар

Сөрүүн тыал имэрийэр тыаһа.

Тыһыынчанан билгэлэммэт түүллэр,

Тыһыынчанан дириҥ толкуйдар.

Долгуннар сипсиэрдэрэ…

Бу, ханна баарый уу?

Таастар ханналарый?

 

* * *

Бэйэм күммүнээҕэр саастаахпын,

Быдан аҕабын эн күҥҥүнээҕэр –

Кырдьаҕаспын дьылҕабынааҕар.

 

* * *

Кинилэр элбэхтэр…

Мин да соҕотох буолбатахпын…

Билэҕин,

Күн түннүгүнэн киирэрин?!

Ардах эрэ аанынан киирэрин.

 

* * *

Өтөхтөн быыһаныыны көрдүүбүн.

Мэҥэ өйдөбүл улуу ньирилгэнэ…

 

* * *

Тымныы.

Кыһыҥҥы тоҥорууну

Суол ыскайдыыр.

Дьолу салгыырга

Күүс тиийбэт…

 

* * *

Кут, сыгынньахтан!

Кус сыгынньах буол…

Ыарыы дьиппиэрдэ,

Ону дьөлбөккүн,

Туус куппаккын,

Хатылаабаккын…

 

* * *

Мин сиргэ таптал өҥүн бэлэмнээтим!

Күһүҥҥү быраман

Күдэрик суолугар

Түбэһиэх ыллыктар арахсаллар.

 

* * *

Туох диэҥ этэй ону, аҕаа?

Кини тапталлааҕым,

Кини Айбыкка бэриниилээх…

 

* * *

Саҥата суох ыйытыы эйиэхэ харда…

Мин ыйытыыбар саҥата суох харда.

 

* * *

Кистэлэҥ алҕас арыллыбыта:

Хойуу иирэҕэ иилистэн

Тыал лабааларга иһийбитэ…

Тымныы.

 

* * *

Кини буруйа суох.

Кини кэрэтэ бэрт…

Бэйэм үлүһүйбүтүм

Кырыа өҥүнэн…

 

Куорсуннаах тылбааһа

 

Добавить комментарий

Ваш адрес email не будет опубликован. Обязательные поля помечены *