Хапсаҕай: Чурапчылар сүүмэрдээһини саҕалаатылар

Чурапчы. Александр Федотов аатынан ыспартыыбынай комплекс киэҥ уораҕайыгар, нэһилиэктэр икки ардыларыгар ыытыллар ыспартакыйаада чэрчитинэн, хапсаҕай күрэхтэһиитэ буолла. Күрэхтэһии үөрүүлээх чааһыгар улуус баһылыгын 1-кы солбуйааччы Алексей Ноговицын, Чурапчы нэһилиэгин баһылыга Владимир Сивцев, улуустааҕы оҕо ыспартыыбынай оскуолатын дириэктэрэ Яков Оконешников, улуус хапсаҕайга бэдэрээссийэтин бэрэссэдээтэлэ, Хоптоҕо нэһилиэгин баһылыга Борис Архипов, күрэхтэһии сүрүн судьуйата, РФ көҥүл тустууга успуордун маастара Ануфрий Аржаков эҕэрдэ тылын эттилэр.

Улуус дьаһалтатын успуорка отделын начаалынньыга Иван Оконешников: “Кэлэр нэдиэлэҕэ о.э. олунньу 15-16 күннэригэр Хоптоҕо нэһилиэгэр, Прокопий Брызгаев-Бөҕө Тараҕай бирииһигэр өрөспүүбүлүкэ турнира ыытыллары турар. Ааспыт сылга “Чакыр Таас” хапсаҕайа буолбута (икки сыл буола-буола ыытыллар). Итини таһынан, бу сыл ахсынньы ыйыгар хапсаҕай бэдэрээссийэтин Кубогун иһин хапсыһыы биһиги улууспутугар ыытыллыаҕа. Ол Кубогы ылар иһин мантан салгыы биһиги бэлэмнэниэхтээхпит. Манна даҕатан эттэххэ, өссө биир сүрүн сыалбыт, аны балтараа сылынан буолуохтаах, 21-с төгүлүн ыытыллар Баһылай Манчаары оонньуулара буолаллар. Ол онно анаан бу бүгүҥҥү күрэхтэһииттэн старт саҕаланна!” – диэн иһитиннэрдэ.

Күрэхтэһиигэ Хоптоҕо, Сылаҥ, Мырыла, Чурапчы нэһилиэктэрэ ордук күүстээх састааптаах кэлэн кыттыыны ыллылар. Манна биирдиилээн бэлиэтээтэххэ, түһүлгэни Айаал Павлов, Александр Андреев, Николай Аянитов, Семен Аммосов о.д.а. ааттаах-суоллаах ыспарсымыаннар киэргэттилэр. Маны таһынан, нэһилиэк баһылыктара Ньургун Попов уонна Борис Архипов кытыннылар. Көрөөччү даҕаны тоҕуоруһа мустубута, биһиги улууспутугар хапсаҕайы таптааччылар, успуорка сүгүрүйээччилэр баалларын туоһулуур.

Уопсай хамаанданан түмүккэ 1 миэстэ – Чурапчы, 2 миэстэ – Хоптоҕо, 3 миэстэ – Сылаҥ, 4 миэстэ – Төлөй, 5 миэстэ – Мугудай нэһилиэктэрэ буоллулар.

Хапсаҕай бэдэрээссийэтэ 75 киилэҕэ диэри ыйааһыннаах бөҕөстөргө муҥутуур кыайыылааҕы быһаарар иһин хапсыһыытыгар уопсайа 12 бөҕөс суруттарбытыттан, финалга СӨ успуордун маастардара Петр Жегусов уонна Айаал Павлов тахсан кииристилэр. Түмүккэ Саха сирин биллиилээх тустууга, институт старшай тириэньэрэ Айаал Романович утарылаһааччытын кыайан, бэдэрээссийэ бэрэссэдээтэлиттэн 15 тыһ. солк наҕараадаланна, Петр Жегусов 5 тыһ. солк тутта.              

Сэмэн ЖЕНДРИНСКЭЙ.

Ааптар хаарыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *