Хатыҥ арыылар үтүө бачыымнары өйүүллэр

Нам улууһун Хатыҥ Арыы нэһилиэгэ өрөспүүбүлүкэтээҕи «Оскуолаҕа бэлэмнэнэбит» аахсыйаҕа көхтөөх кыттыыны ылла. Маны тэҥэ олохтоохтор, тэрилтэлэр, уопсастыбаннай тэриллиилэр  «Чистые Берега Дальнего Востока» чэрчитинэн биэрэк кытыыларын ыраастаатылар. 


Ыарахан туруктаах уонна элбэх оҕолоох, кыаммат араҥа дьиэ кэргэттэригэр Хатыҥ Арыы нэһилиэгин тэрилтэлэрэ, уопсастыбаннай тэриллиилэр, биирдиилээн чааһынай дьон  канцелярскай табаарынан, маҕаһыыҥҥа сэртипикээтинэн, таҥаһынан-сабынан көмө оҥордулар. Уопсайа 35 дьиэ кэргэн хабылынна. Намнааҕы техникум сыллата Граф Биэрэгин оскуолатыгар маҥнайгы кылааска киирэр оҕолорго бэлэх оҥорор. Бу үтүө үгэскэ кубулуйбута хайҕабыллаах. Граф Биэрэгин уонна Кыһыл Дэриэбинэ дьахтар сүбэлэрэ (бэрэсс. Ю.М. Федорова, Р.А. Уваровская) сэмэй бэлэхтэрин элбэх оҕолоох ийэлэргэ туттардылар.

Оскуолаҕа бэлэмнэнии чэрчитинэн, нэһилиэккэ түүҥҥү профилактическай рейдэ ыытылынна. Манна нэһилиэк олохтоох дьаһалтата, тэрилтэлэр, уопсастыбаннай тэриллиилэр, ДНД «Хотой» чилиэттэрэ  уулуссаҕа, хаарбах быраҕыллыбыт эбийиэктэргэ, оҕо мустар сирдэригэр сырыттылар.

Граф Биэрэгэр дьахтар сэбиэтин тэрээһининэн (салайааччы Юлия Михайловна Федорова уонна Саргылана Петровна Сметанина) олохтоох көҕүлээһиннэри өйүүр бырагырааманан тутуллубут оҕо сынньанар былаһааккатын бөҕүн хомуйдулар, күрүөтүн кырааскалаатылар. Субуотунньукка оҕолор, Граф Биэрэгин олохтооҕо Анатолий Михайлович Гундарев, эдэр ийэлэр Надежда Семенова, Евгения Романова уонна «Самородок» СК (дир. А.А. Охлопкова) үлэһиттэрэ көхтөөх кыттыыны ыллылар.

Бүтүн Россиятааҕы «Чистые Берега Дальнего Востока» аахсыйаҕа бастакынан «Сандаара» (сэб. А.С. Оконешникова), «Хатыҥчаана» (сэб. А.С. Шумилова) оҕо сайдар кииннэрэ, Хатыҥ Арыытааҕы оҕо искусствотын оскуолата (дир. А.А. Колесова ), «Хатыҥчаан» звукостудия (дир. Г.С. Мальцев), олохтоох бибилэтиэкэ (сэб. В.Д. Носкова), «Саһарҕа» түөлбэ (сал. Л.Д. Максимова) көхтөөхтүк кытыннылар. Биэрэк кытыытыгар сытар бөҕү, быраҕыллыбыт мастары хомуйдулар.

Нам улууһун олохтоохторун улууска ыытыллар үтүө хамсааһыннарга көхтөөхтүк кыттаргытыгар ыҥырабыт!

Ааптар: Н.Д. СИВЦЕВА

Сообщение Хатыҥ арыылар үтүө бачыымнары өйүүллэр появились сначала на Ulus.Media — все главные новости из районов Якутии.

Комментарии закрыты.