Хоккейга “Динамо” кубогар күрэхтэһии тэрилиннэ

Тохсунньу 9-11 күннэригэр Дьокуускай куорат “Эллэй Боотур” Муус дыбарыаһыгар шайбалаах хоккейга “Динамо” кубогар бастакы республикатааҕы турнир ыытылынна. Бу күрэхтэһии туһунан биһиги сайтпытыгар анаан Мэҥэ Хаҥалас “Манчаары” хоккейга хамаандатын салайааччыта Алексей Неустроев маннык иһитиннэрдэ.

 

 

Бу күрэхтэһиигэ түөрт хамаанда кыттыыны ылла. Ол курдук, Ис дьыала отделын бэтэрээннэрин “Динамо” хамаандата, Нам уонна Хаҥалас улуустарын холбоһуктаах хамаандата, Алдан куорат уонна биһиги, Мэҥэ Хаҥалас “Манчаары” кулууба.

Күрэхтэһии үөрүүлээх аһыллыытыгар Саха Республикатын Ис дьыалаҕа отделын салалтата, СР Ил Дарханын уонна Правительствотын дьаһалтатын салайааччы, республикаҕа шайбалаах хоккейы көҕүлээччи Афанасий Семенович Владимиров кыттыыны ылан, спортсменнары эҕэрдэлээтилэр, ситиһиини баҕардылар.

Үс күннээх күрэхтэһии түмүгэр бастакы миэстэни “Динамо” хамаанда ылла. Иккис миэстэҕэ алданнар таҕыстылар. Оттон үһүс бириистээх миэстэҕэ биһиги, манчаарылар тигистибит. Кыайыылаах хамаандаҕа кубок уонна үс бастакы миэстэни ылбыттарга харчынан сертификаттар, оонньооччуларга мэтээллэр туттарылыннылар. Бу күрэхтэһиини мантан инньэ сыллата ыытарга быһаардылар.   

Манна сыһыары тутан эттэххэ, быйыл кулун тутар – муус устар ыйдарга Дьокуускай, Нерюнгри уонна Алдан куораттарга Саха Республикатын спорт кыһыҥҥы көрүҥнэригэр IV спартакиадата ыытыллар. Спартакиада биир көрүҥүнэн шайбалаах хоккей буолар. Онон хоккеистарга бу күрэхтэһии бэлэмнэнии кэриэтэ буолла.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *