Көһүтүллэбэтэх көрдөрүүлэр, эбэтэр “Маастары отунан-маһынан оҥорбоккун”

Эрдэ иһитиннэрбиппит курдук, “Кыайыы 50 сыла” Спорт дыбарыаһыгар икки көбүөрүнэн Дьокуускай куорат көҥүл тустууга аһаҕас чемпионата ыытыллан түмүктэннэ. Биллэрин курдук, республикабыт киин куоратын чемпионатыгар былырыын – ССРС спордун маастара, Саха сирин үтүөлээх тренерэ, РФ физическэй култууратын үтүөлээх үлэһитэ Валерий Петрович Керемясов аата иҥэриллибитэ. Онон аны Дьокуускай тустууга чемпионата кини кэриэһигэр ананан ыытыллар.

 

Чемпионат үөрүүлээх аһыллыытыгар Дьокуускай куорат физическэй култуураҕа уонна спорка управлениетын нчаалынньыга Константин Бурцев, куорат 3 №-дээх спортивнай оскуолатын тренерэ Петр Петрович Черкашиҥҥа “Российскай Федерация иитиигэ уонна үөрэтиигэ бочуоттаах үлэһитэ” диэн, РФ миниистирэ О.Ю. Васильева илии баттааһыннаах түөскэ анньыллар бэлиэни туттарда.

Ити курдук, чемпионаты кыттыылаахтарын Олимпиада-76 үрүҥ көмүс призера А.Н. Иванов, СР Спорка бэлэмнэнии киинин дириэктэрэ Л.Н. Спиридонов, В.П. Керемясов бииргэ төрөөбүт эдьиийэ Л.П. Керемясова, чемпионат кылаабынай судьуйата С.Е. Афанасьев эҕэрдэлээтилэр.

Александр Иванов: “В.П. Керемясов аатын үйэтитиллэрэ кэрэхсэбиллээх. Мин кинини эрчийбитим. Валерий тренер тылын ылынар, истэр, бэйэтин тустуутун сөптөөхтүк ырытар спортсмен этэ. Ол иһин, ситиһиилээҕэ. Оттон тренер быһыытынан саамай үлэлиир үгэнигэр сылдьан олохтон хомолтолоохтук туораата. Кини иитиллээччитэ Владислав Андреев тренерин сүтэрэн улахан охсууну ылла, өссө даҕаны тахсан иһиэхтээх этэ. Чемпионат састааба күүстээх. Кыттааччытын ахсаана өссө элбииригэр баҕарабын”, — диэтэ, итиэннэ парадтаан турар тустууктарга туһаайан, хаһан баҕарар тренердэрин ытыктыылларыгар ыҥырда.

Ити курдук, тыл этээччилэр бу күрэхтэһиигэ Валерий Керемясов аата иҥэриллибитин биһирииллэрин биллэрдилэр. Кини аатын биһиги умнубакка үйэтитэ турарбытыгар баҕардылар. Уопсайынан, көҥүл тустууга күрэхтэһии элбииригэр, маннык түһүлгэттэн саха бөҕөстөрө үүнэн-тахсан иһэллэрин эттилэр.

Валерий Петрович дьиэ кэргэнэ, бииргэ төрөөбүттэрэ, аймахтара, кинилэр чугас киһилэрин аатынан күрэхтэһии иккис сылын тэриллэрин иһин Дьокуускай куорат дьаһалтатыгар, спорка управлениетыгар махталларын тиэртилэр. Итиэннэ, Валерий Петрович чугас доҕоро, Дьокуускай куорат 3 №-дээх спортивнай оскуолатын дириэктэрин солбуйааччы Николай Петрович Ивановка, Керемясовтар ааттарыттан бэйэлэрин тус стипендияларын туттардылар. Манна даҕатан эттэххэ, тустуук Егор Потапов, судьуйа Владислав Кривошапкин – чемпионат түмүгүнэн Керемясовтар анаабыт бириистэрин хаһаайыннарынан буоллулар.

Быйылгы түһүлгэҕэ уон хамаандаттан 113 бөҕөс кыттыыны ылла. Ол курдук, тренердэр Р.Г. Окоемов (Бүлүү), Ю.Ю. Константинов (Мирнэй), К.А. Сивцев (Нам), И.П. Пантилов (Уус Алдан), К.Н. Захаров (Чурапчы) иитиллээччилэрин аҕалан кытыннардылар. Онон састаап даҕаны куһаҕана суох.

Чемпионат кэнниттэн кылгас ырытыы курдук оҥордоххо, бастатан туран, орто уонна ыарахан ыйааһыннарга тыыппалаах саха эдэр ыччата тахсан эрэрэ бэлиэтэннэ. Ол курдук, саамай ыарахан ыйааһыҥҥа Баир Укоев урут Дьокуускай түһүлгэтигэр аҥардастыы аатырар эбит буоллаҕына, билигин кинини эдэр уолаттар, Горнай Маҕыраһыттан төрүттээх Эдуард Максимов (8:0) уонна Муома ыччата Никита Хабаров (3:1) ахсаанынан эрэллээхтик кыайан, этэргэ дылы, өр сыл бүөлээн сылдьыбыт бөрөстүөлүттэн сууллардылар. Бу уолаттары, уонна Хаҥалас ыччата Даниил Иванову – сөптөөх, сыаллаах-соруктаах, үчүгэй былааннаах үлэ ыытылыннаҕына, элбэҕи ситиһэр кэскиллээх тустууктар диэххэ сөп.

Кинилэр үһүөн билигин Р.М. Дмитриев аатынан Олимпийскай эрэл училищетыгар тустуу маастарыстыбатыгар үөрэнэ сылдьаллар. Ол аата, эрэллээх илиигэ, сөптөөх көрүүгэ-истиигэ, анал дьарыкка сылдьаллар диэхпин баҕарабын.

Эчэйиилээх буолан кылгас тохтобул кэнниттэн Ньургун Александров уонна Костантин Власов күрэхтэһиилэрин сөргүтэн эрэллэрэ үчүгэй. Өссө, Ньургун түһүлгэ 65 киилэҕэ диэри кыайыылааҕынан тахсан, сөхтөрдө. Кини күрэхтэһиини ыарахан соҕустук саҕалаан баран, финалга маастар Семен Владимировы кытта тыҥааһыннаах тустууга туох да мөккүөрэ суох баһыйа тутта (4:2). Манныгы этэн эрдэхтэрэ, “маастары отунан-маһынан оҥорбоккун” диэн, оттон Ньургун Александров – норуоттар икки ардыларынааҕы кылаастаах спорт маастара буоларын санатабын. Кини билигин да сааһынан эдэр, 24-дэ эрэ. Онон биһиги элбэҕи кэтэһэбит. Ньургун өссө даҕаны үрдүк кирбиилэри ылар кыахтаах.

Биир бэйэм Намтан бөҕө-таҕа көрүҥнээх Леонид Данилов тустуутун сөбүлүү көрдүм. Дыгын оонньуутун сэттэ төгүллээх муҥутуур кыайыылааҕа Уйбаан Белолюбскай төрөппүт уола Айаал Белолюбскай күрэхтэһииттэн күрэхтэһии аайы үүнэн-сайдан иһэрин көрдөрдө. Манна сыһыары тутан эттэххэ, Айаал быйыл улахан дьоҥҥо Петр Алексеев аатынан республика хапсаҕайга чемпионунан буолбута.

Биир кэрэхсэбиллээх түгэнинэн, уолаттарга Россия уонна аан дойду чемпиона буола сылдьыбыт Иван Оконешников төрөөбүт дойдутугар ытык иэһин төлөөн кэлэн, бастакы күрэхтэһиитигэр куһаҕана суох өйдөбүлү үөскэттэ. Эт-сиин, күүс-уох өттүнэн сайыннаҕына, бэлэм чемпион бу сылдьар. Маныаха биллэн турар, тустууга таптал, тустууга бэриниилээх буолуу, үрдүк сыал-сорук туһугар бэйэни харыстаммака үлэлээһин – элбэҕи быһаарарын умнумуохха.

Эдэр талааннаах уолаттар суох буолбатахтар, ылан көрүҥ Чурапчыттан 17 саастаах Олег Фомины, Олимпийскай училищеттан 18-таах Андриан Ленскэйи, 17 саастаах Айтал Уйгуровы… Боруоста сиэҕи ньыппарынан туран үлэлиэххэ наада. Ким билэр, сөптөөхтүк үлэлээтэххэ, бу ааттаммыт уолаттар сотору кэминэн төһө баҕарар бурҕайан туруохтарын сөп.

Дьэ, ити курдук, биир күрэхтэһии бүттэ. Аны тустууктарбыт салгыы Казахстаҥҥа, Хотугу Осетияҕа, Бурятияҕа ыытыллар күрэхтэһиилэргэ кыттыахтара. Уолаттарбытыгар ситиһиини баҕарыахха!

Чемпионат түмүк көрдөрүүтэ:

57 кг (20 кыттааччы): 1. Алексей Копылов, 2. Айаал Белолюбскай, 3. Иван Оконешников, Петр Копылов (бары – ОЭУ), 5. Дмитрий Илларионов (ЦСП), Дьулус Неустроев (ЦСП-Чурапчы).

61 кг (19): 1. Егор Потапов (Дьокуускай), 2. Георгий Окороков (ЦСП), 3. Олег Фомин (ЦСП-Чурапчы), Виталий Эспек (ХИФУ), 5. Дархан Игнатьев, Александр Иванов (ОЭУ).

65 кг (21): 1. Ньургун Александров (ЦСП), 2. Семен Владимиров (ХИФУ), 3. Егор Дмитриев (Дьокуускай), Яков Павлов (ЦСП-Чурапчы), 5. Айтал Уйгуров (ОЭУ), Дьулусхан Тотонов (ХИФУ).

70 кг (14): 1. Дьулустан Булатов (ХИФУ), 2. Константин Капрынов (ЦСП-Чурапчы), 3. Албан Аввакумов (ОЭУ), Егор Захаров, 5. Николай Сивцев (иккиэн – ХИФУ), Ньургун Андреев (Мирнэй).

74 кг (10): 1. Тимур Николаев, 2. Револий Самсонов (иккиэн – ХИФУ), 3. Андриан Ленскэй (ОЭУ), Василий Кириллин, 5. Стив Попов (иккиэн – ЦСП-Чурапчы), Андрей Винокуров (ЦСП).

79 кг (11): 1. Иван Ефремов (ХИФУ), 2. Константин Власов (ХИФУ), 3. Никита Софронов (ХИФУ), Ларион Андреев (Мирнэй), 5. Василий Стрекаловскай, Айсен Копырин (иккиэн – ЦСП).

86 кг (7): 1. Леонид Данилов (Нам), 2. Петр Захаров (ЦСП-Чурапчы), 3. Анатолий Сивцев (ХИФУ).

92 кг (4): 1. Софрон Софронов (Военкомат), 2. Александр Филиппов, 3. Семен Аммосов (иккиэн – ЦСП-Чурапчы).

97 кг (3): 1. Ньургун Сергин (ЦСП), 2. Даниил Иванов (ОЭУ), 3. Байан Афанасьев (Дьокуускай).

125 кг (4): 1. Никита Хабаров, 2. Эдуард Максимов (иккиэн – ОЭУ), 3. Баир Укоев (Дьокуускай).

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *